١٠
ثْنَاينْ ن ثڒْوِيحِينْ نّغْنِي ن وژْرُو
١ ”ذِي ڒْْوقْثْ نِّي ذ إِجّنْ إِنَّا أَيِي سِيذِي: ’نْقشْ ثْنَاينْ ن ثڒْوِيحِينْ ن وژْرُو أَمْ ثِينِّي ثِيمزْوُورَا ؤُشَا ڭعّذْ-د غَارِي غَارْ وذْرَارْ ؤُشَا أڭّْ إِ شكْ إِشْثْ ن تَّابُوثْ ن ؤُكشُّوضْ.
٢ أَذْ أَرِيغْ ذِي ثڒْوِيحِينْ أَوَاڒنْ نِّي ثُوغَا ذِي ثڒْوِيحِينْ ثِيمزْوُورَا نِّي ثَارْژِيذْ ؤُشَا أَذْ ثنْثْ ثسَّارْسذْ ذِي تَّابُوثْ.
٣ نشّْ ڭِّيغْ إِشْثْ ن تَّابُوثْ ن ؤُكشُّوضْ ن ؤُكَاسِييَا ؤُشَا نقْشغْ ثْنَاينْ ن ثڒْوِيحِينْ ن وژْرُو أَمْ ثْمزْوُورَا. ڭعّْذغْ غَارْ وذْرَارْ س ثْنَاينْ ن ثڒْوِيحِينْ ذڭْ ؤُفُوسْ إِنُو.
٤ يُورَا خْ ثڒْوِيحِينْ، أَنشْثْ ن ثِيرَا ثَامزْوَارُوثْ،عشْرَا ن وَاوَاڒنْ نِّي ثُوغَا إِسِّيوڒْ سِيذِي ذڭْ وَاسّْ ن وڭْرَاوْ ن ڒْْڭنْسْ خْ وذْرَارْ زِي ڒْْوسْطْ ن ثْمسِّي ؤُشَا إِوْشَا إِ-ثنْثْ أَيِي-د سِيذِي.
٥ ذوْڒغْ-د ؤُ هْوِيغْ-د زڭْ وذْرَارْ ؤُشَا سَّارْسغْ ثِيڒْوِيحِينْ ذِي تَّابُوثْ نِّي ڭِّيغْ ؤُشَا ذِيهَا إِ دْجَانْثْ عَاذْ، أَمْ مَامّشْ ذ أَيِي يُومُورْ سِيذِي.“
٦ فسْينْ أَيْثْ ن إِسْرَائِيل إِقِيضَانْ نْسنْ زِي بِيعْرُوثْ-بَانِي-يَاعْقَانْ، فّْغنْ غَارْ مُوسِيرَا. ذِينِّي إِمُّوثْ هَارُونْ ؤُشَا إِتّْوَانْضڒْ ذِينْ. مِّيسْ أَلِيعَازَارْ إِذْوڒْ ذ أَكهَّانْ ذڭْ ومْشَانْ نّسْ.
٧ سّنِّي مُّوطِّيينْ غَارْ جُوذْجُوذْ ؤُ زِي جُوذْجُوذْ غَارْ يُوطْبَاثَا، ثَامُّورْثْ ن ثْغزْرَاثِينْ ن وَامَانْ.
٨ ذِي ڒْْوقْثْ نِّي ذ إِجّنْ إِحُوزّْ سِيذِي ثَاقْبِيتْشْ ن لَاوِي حِيمَا أَذْ أَرْبُونْ تَّابُوثْ ن ڒْْعَاهْذْ ن سِيذِي مَاحنْذْ أَذْ بدّنْ زَّاثْ إِ وُوذمْ ن سِيذِي، أَذْ أَسْ سخَّارنْ ؤُ أَذْ بَارْكنْ ذڭْ يِيسمْ نّسْ، أَڒْ أَسّْ-أَ.
٩ خْ ؤُيَا لَاوِي وَارْ غَارسْ ثُوغِي شَا ن ثسْغَارْثْ، ؤُڒَا ذ شَا ن ڒْْوَارْثْ أَكْ-ذ أَيْثْمَاسْ. سِيذِي ذ ڒْْوَارْثْ نّسْ، أَمْ مَامّشْ ذ أَسْ إِنَّا سِيذِي، أَربِّي نّشْ.
١٠ ”ؤُشَا نشّْ قِّيمغْ خْ وذْرَارْ، أَمْ وُوسَّانْ إِمزْوُورَا، أَربْعِينْ ن ؤُسَّانْ ذ أَربْعِينْ ن دْجْيَاڒِي ؤُشَا إِسْڒَا أَيِي سِيذِي عَاوذْ ثْوَاڒَا-يَا، أَقَا سِيذِي ثُوغَا وَارْ إِخْسْ أَذْ كنِّيوْ إِسّخْسَارْ.
١١ إِنَّا أَيِي سِيذِي: ’كَّارْ، ؤُيُورْ ذڭْ وبْرِيذْ زَّاثْ إِ وُوذمْ ن ڒْْڭنْسْ، حِيمَا أَذْ أَذْفنْ غَارْ ثمُّورْثْ، ثنِّي جُّودْجغْ إِ ڒجْذُوذْ نْسنْ أَذْ أَسنْ ت-إِ-د-وْشغْ، أَذْ ت كْسِينْ ذ ڒْْوَارْثْ.‘
١٢ ڒخُّو خنِّي، أَ إِسْرَائِيل! مِينْ زَّايكْ إِتَّارْ سِيذِي، أَربِّي نّشْ، مْغِيرْ أَذْ ثڭّْوذذْ سِيذِي، أَربِّي نّشْ، أَذْ ثُويُورذْ ذڭْ إِبْرِيذنْ نّسْ ؤُ أَذْ ث ثخْسذْ ؤُشَا أَذْ ثْسخَّارذْ إِ سِيذِي، أَربِّي نّشْ س مَارَّا ؤُڒْ نّشْ ؤُ س مَارَّا ڒعْمَارْ نّشْ،
١٣ ؤُشَا أَذْ ثحْضِيذْ ڒُْومُورَاثْ ن سِيذِي ذ ثْوصَّا نِّي نشّْ خَاكْ شَارْضغْ أَسّْ-أَ إِ ثِيزِي نّشْ.
١٤ خْزَارْ، أَجنَّا ذ ؤُجنَّا ن إِجنْوَانْ ذ مَارَّا مِينْ ذَايسْ إِ سِيذِي، أَربِّي نّشْ إِ إِدْجَانْ.
١٥ مْغِيرْ غَارْ ڒجْذُوذْ نّشْ وَاهَا إِ إِقّنْ سِيذِي إِخفْ نّسْ حِيمَا أَذْ ثنْ إِخْسْ ؤُ نتَّا إِخْضَارْ زَّارِيعثْ نْسنْ أَوَارْنِي أَسنْ، أَقَا ذ كنِّيوْ، زِي مَارَّا ڒڭْنُوسْ، أَمْ ثدْجَا أَسّْ-أَ.
١٦ خثْنمْ خنِّي إِ ڒعْذَاڒْيثْ ن وُوڒْ نْومْ، وَارْ سْقسِّيحمْ شَا عَاذْ كْثَارْ ؤُڒَاونْ نْومْ،
١٧ مِينْزِي سِيذِي، أَربِّي نْومْ، ذ أَربِّي خْ مَارَّا إِربِّيثنْ ذ سِيذِي خْ مَارَّا إِسِيذِيثنْ، إِجّْ ن أَربِّي إِمْغَارْ ذ أَجبَّارْ ذ أَمڭّْوذْ، ونِّي وَارْ إِتّڭّنْ ڒْْفَارْزْ ذڭْ إِوْذَانْ نِيغْ إِكسِّي شَّارْضْ،
١٨ ونِّي إِتّڭّنْ ثَاسڭْذَا إِ ؤُيُوجِيڒْ ذ ثَاجَّاتْشْ، ونِّي إِتّخْسنْ أَبَارَّانِي ؤُ إِوْشَا أَسْ أَغْرُومْ ذ أَرُّوضْ.
١٩ إِتّْخصَّا أَذْ ثخْسمْ أَبَارَّانِي، مِينْزِي ثُوغَا كنِّيوْ ذ إِبَارَّانِييّنْ ذِي ثمُّورْثْ ن مِيصْرَا.
٢٠ أَذْ ثڭّْوذذْ سِيذِي، أَربِّي نّشْ، أَذْ أَسْ ثْسخَّارذْ ؤُشَا أَذْ أَسْ ثْڒصْقذْ ؤُ س يِيسمْ نّسْ أَذْ ثجَّادْجذْ.
٢١ أَقَا نتَّا ذ أَسبَّاحْ نّشْ، ؤُشَا نتَّا ذ أَربِّي نّشْ، ونِّي غَاركْ إِڭِّينْ ڒْْخذْمثْ-أَ ذ ثَامقّْرَانْثْ ؤُڒَا ذ مَارَّا ثِيمسْڒَايِينْ-أَ إِسَّاڭّْوَاذنْ ثِينِّي ژْرِينْثْ ثِيطَّاوِينْ نّشْ.
٢٢ ڒجْذُوذْ نْومْ هْوَانْ-د س سبْعِينْ ن ڒعْمُورْ غَارْ مِيصْرَا ؤُشَا ڒخُّو إِڭَّا إِ-شْ سِيذِي، أَربِّي نّشْ، أَطَّاسْ أَمْ يِيثْرَانْ ن ؤُجنَّا.“