١١
١ ”ذڭْ ؤُسڭّْوَاسْ أَمزْوَارُو ن ذَارِييُوسْ، أَمَاذَايْ، بدّغْ نشّْ أَكِيذسْ مَاحنْذْ أَذْ ث سّجهْذغْ ؤُ أَذْ أَسْ سّنْذغْ.
٢ ڒخُّو أَذْ أَشْ إِنِيغْ إِجّْ ن وَاوَاڒْ ذ ثِيذتّْ! خْزَارْ، أَذْ كَّارنْ عَاذْ ثْڒَاثَا ن إِجدْجِيذنْ ذِي لْفُورْسْ ؤُشَا ونِّي وِيسّْ أَربْعَا أَذْ إِڭّْ أَڭْڒَا أَمقّْرَانْ إِ يِيخفْ نّسْ، كْثَارْ خْ مَارَّا إِنّغْنِي. ؤُ أَوَارْنِي خْمِي غَا إِطّفْ ثِيزمَّارْ س وَاڭْڒَا نّسْ، أَذْ إِسّْنكَّارْ مَارَّا مِيدّنْ نّسْ ضِيدّْ إِ ثْڭلْذِيثْ ن يَاوَانْ.
٣ خنِّي أَذْ إِكَّارْ إِجّْ ن ؤُجدْجِيذْ إِجْهذْ ونِّي إِ غَا إِصلّْطنْ س صُّولْطَا ثَامقّْرَانْثْ ؤُ نتَّا أَذْ إِڭّْ مِينْ إِخْسْ نتَّا.
٤ خْمِي غَا إِكَّارْ، ڒخْذنِّي أَذْ ثَارژْ ثْڭلْذِيثْ نّسْ، أَذْ ثتّْوَامْصبْضَا خْ أَربْعَا ن ثْغمُّورَا ن ؤُسمِّيضْ ن ؤُجنَّا، مَاشَا وَارْ ثتِّيڒِي ثْڭلْذِيثْ إِ ثَارْوَا نّسْ ؤُ وَارْ غَارسْ ثتِّيڒِي صُّولْطَا أَمْ ثنِّي إِ زِي ثُوغَا إِتّْصلّضْ نتَّا، مَاغَارْ ثَاڭلْذِيثْ أَذْ ثتّْوَاقْڒعْ ؤُ أَذْ ثِيڒِي إِ إِنّغْنِي وَارْ إِدْجِي إِ يِينَا.
٥ خنِّي أَجدْجِيذْ ن لْجَانُوبْ أَذْ إِذْوڒْ إِجْهذْ، مَاشَا إِجّْ زِي ڒْْحُوكَّامْ نّسْ أَذْ إِذْوڒْ إِجْهذْ خَاسْ ؤُ وَانِيثَا أَذْ إِصلّطْ س صُّولْطَا ثَامقّْرَانْثْ خْ صُّولْطَا نّسْ.
٦ أَوَارْنِي ڒَْامِي عْذُونْ شَا ن إِسڭّْوُوسَا، نِيثْنِي أَذْ ڭّنْ إِجّْ ن ڒْْعَاهْذْ ؤُ يدْجِيسْ ن ؤُجدْجِيذْ ن لْجَانُوبْ أَذْ د-ثَاسْ غَارْ ؤُجدْجِيذْ ن شَّامَالْ مَاحنْذْ أَذْ ت ثْسڭّمْ، مَاشَا نتَّاثْ وَارْ ثْزمَّارْ أَذْ ثحْضَا جّهْذْ ن ؤُغِيڒْ نّسْ ؤُ نتَّا وَارْ إِزمَّارْ أَذْ إِقِّيمْ إِبدّْ، ؤُ أَغِيڒْ نّسْ أَمْ نّغْنِي. نتَّاثْ أَذْ ثتّْوَاسلّمْ ؤُڒَا ذ يِينِّي ت إِوْينْ ذ ونِّي إِ-ت-إِ-د يُورْونْ ذ ونِّي ت إِسّْجهْذنْ ذڭْ وُوسَّانْ نِّي.
٧ مَاشَا زڭْ إِشْثْ ن ثْغدُّوثْ ن إِژوْرَانْ نّسْ أَذْ إِكَّارْ إِجّنْ ذڭْ ومْشَانْ نّسْ. نتَّا أَذْ إِفّغْ ضِيدّْ إِ ڒْْعسْكَارْ ؤُشَا أَذْ يَاذفْ لْبُورْجْ إِجهْذنْ ن ؤُجدْجِيذْ ن شَّامَالْ ؤُ أَذْ ذَايْسنْ إِڭّْ مِينْ إِخْسْ ؤُ أَذْ د-إِبَانْ إِجْهذْ قَاعْ.
٨ أَربِّيثنْ نْسنْ أَكْ-ذ ڒخْيَاڒَاثْ نْسنْ إِفسْينْ ذ ڒقْشُوعْ نْسنْ إِغْڒَانْ إِ إِتّْوَاڭّنْ س نُّوقَارْثْ ذ وُورغْ أَذْ ثنْ يَاوِي ذ ثْكشَّاضْثْ غَارْ مِيصْرَا ؤُ خنِّي أَذْ إِبعّذْ شَا ن إِسڭّْوُوسَا خْ ؤُجدْجِيذْ ن شَّامَالْ.
٩ ؤُ نتَّا أَذْ يَاذفْ ثَاڭلْذِيثْ ن لْجَانُوبْ ؤُ أَذْ إِعْقبْ غَارْ ثمُّورْثْ نّسْ.
١٠ إِحنْجِيرنْ نّسْ أَذْ حزّْمنْ إِ ؤُمنْغِي ؤُ أَذْ سّْمُوننْ إِجّْ ن ؤُبَارُّو ن ڒْْعسْكَارْ أَمقّْرَانْ ؤُ نتَّا أَذْ د-يَاسْ ؤُ أَذْ إِعمَّارْ ثَامُّورْثْ ؤُ أَذْ خَاسْ إِعْذُو. ؤُ أَوَارْنِي ڒَْامِي د-إِعْقبْ، أَذْ حزّْمنْ عَاوذْ إِ ؤُمنْغِي أَذْ يَاذفْ أَڒْ لْبُورْجْ نّسْ إِجهْذنْ.
١١ ؤُشَا أَذْ إِمُّوزَّارْ ؤُجدْجِيذْ ن لْجَانُوبْ ؤُشَا إِڭُّورْ أَذْ إِفّغْ أَكِيذسْ إِمّْنغْ أَكْ-ذ ؤُجدْجِيذْ ن شَّامَالْ، ونِّي إِ غَا إِسّْمُوننْ إِجّْ ن ؤُبَارُّو أَمقّْرَانْ ن ڒْْعسْكَارْ، مَاشَا أَبَارُّو نِّي أَذْ إِتّْوَاسلّمْ ذڭْ ؤُفُوسْ نّسْ.
١٢ مَاڒَا إِمّكْسِي ؤُبَارُّو نِّي، خنِّي ؤُڒْ نّسْ أَذْ إِسّْڭعّذْ إِخفْ نّسْ ؤُ نتَّا أَذْ إِسّغْذڒْعشْرَا ن ڒُْوڒُوفْ، مَاشَا نتَّا وَارْ إِتّْمَارْنِي ذِي جّهْذْ.
١٣ أَجدْجِيذْ ن شَّامَالْ أَذْ د-إِذْوڒْ ؤُ أَذْ إِسّْمُونْ إِجّْ ن ؤُبَارُّو أَمقّْرَانْ كْثَارْ زڭْ ؤُمزْوَارُو. أَوَارْنِي ڒْْمِيجَاڒَاثْ ن ڒْْوقْثْ ذ إِسڭّْوُوسَا أَذْ د-يَاسْ س يِيجّْ ن ڒْْعسْكَارْ أَمقّْرَانْ ؤُ س وَاطَّاسْ ن ڒسْنَاحْ.
١٤ ذڭْ وُوسَّانْ نِّي أَذْغوّْغنْ أَطَّاسْ خْ ؤُجدْجِيذْ ن لْجَانُوبْ ؤُ أَيْثْ ن بُو-ڒخْشُونثْ ن ڒْْڭنْسْ نّشْ أَذْ سّْڭعّْذنْ إِخفْ نْسنْ حِيمَا أَذْ سّْقفْڒنْ إِجّْ ن ڒوْحِييْ، مَاشَا نِيثْنِي أَذْ وْضَانْ.
١٥ خنِّي أَذْ د-يَاسْ ؤُجدْجِيذْ ن شَّامَالْ، أَذْ إِسّْبدّْ إِجّْ نْ ڒْحِيضْ إِ ڒحْصَارثْ ؤُ أَذْ إِطّفْ إِشْثْ ن ثنْذِينْثْ إِفَارْينْ. إِغَادْجنْ ن لْجَانُوبْ إِجهْذنْ وَارْ زمَّارنْ أَذْ قِّيمنْ تّْقَاوَامنْ ؤُڒَا ذ ڒْْڭنْسْ ن يِينِّي زَّايسْ إِتّْوَافَارْزنْ لَّا. وَارْ ذِينْ إِتِّيڒِي جّهْذْ حِيمَا أَذْ قِّيمنْ تّْبدَّانْ.
١٦ ونِّي د-يُوسِينْ ضِيدّْ نّسْ، أَذْ إِڭّْ مِينْ إِخْسْ. ؤُڒَا ذ إِجّْ وَارْ إِزمَّارْ أَذْ إِبدّْ زَّاثْ إِ وُوذمْ نّسْ ؤُ نتَّا أَذْ إِبدّْ ذِي ثمُّورْثْ ن ثلْوِيزْثْ ؤُ أَردّدْجْ أَذْ يِيڒِي س ؤُفُوسْ نّسْ.
١٧ نتَّا أَذْ يَارْزُو أَذْ إِسّمْثنْ ثِيزمَّارْ نّسْ ذِي مَارَّا ثَاڭلْذِيثْ نّسْ ؤُ غَارسْ إِمْثَاوِييّنْ إِسڭّْذنْ ؤُ أَذْ زَّايْسنْ إِڭّْ. نتَّا أَذْ أَسْ إِوْشْ يدْجِيسْ ن ثمْغَارِينْ حِيمَا أَذْ يَاردّدْجْ ثَاڭلْذِيثْ نِّي، مَاشَا نتَّاثْ وَارْ ثتّْبدَّا ؤُ وَارْ ذ أَسْ ثفِّيغْ.
١٨ خنِّي أَذْ يَارّْ أَغمْبُوبْ نّسْ غَارْ ثڭْزِيرِينْ ؤُشَا أَذْ إِطّفْ أَطَّاسْ زَّايْسنْثْ. مَاشَا إِجّْ ن ؤُكُومَانْذَارْ ن ڒْْعسْكَارْ أَذْ إِسّْبدّْ ڒْْحڭْرَا نّسْ خَاسْ، بْڒَا مَا إِزمَّارْ نتَّا أَذْ أَسْ إِخدْجصْ ڒْْحڭْرَا نّسْ.
١٩ نتَّا أَذْ يَارّْ أَغمْبُوبْ نّسْ غَارْ لْبُورْجَاثْ ن ثمُّورْثْ نّسْ ؤُ خنِّي أَذْ إِنْقَارْضْ، أَذْ إِوْضَا ؤُ وَارْ إِتّْوِيفِّي عَاذْ.
٢٠ أَذْ إِكَّارْ إِجّنْ ذڭْ ومْشَانْ نّسْ ونِّي إِ غَا إِسّعْذُونْ إِجّنْ خْ ثمُّورْثْ نِّي إِ غَا إِسّهْوَانْ أَعُودْجِي ن ثْڭلْذِيثْ، مَاشَا وَانِيثَا أَذْ إِتّْوَارْژْ ذِي شَا ن وُوسَّانْ، وَارْ إِدْجِي س إِمْشُوبّشنْ ؤُڒَا س ؤُمنْغِي.
٢١ خنِّي أَذْ د-إِكَّارْ إِجّْ ن بْنَاذمْ أَحڭَّارْ ذڭْ ومْشَانْ نّسْ ونِّي وَارْ ذ أَسْ تِّيشنْ لْعَاضَامَا إِڭلّْذنْ. نتَّا أَذْ د-يَاسْ س ڒْْغفْڒثْ ؤُ أَذْ إِطّفْ ثَاڭلْذِيثْ س ثحْرَايْمشْثْ نّسْ.
٢٢ إِغَادْجنْ إِجهْذنْ نِّي إِفيّْضنْ ثَامُّورْثْ، أَذْ تّْوَامْحَانْ زَّاثْ إِ وُوذمْ إِنُو ؤُ أَذْ تّْوَارّْژنْ ؤُڒَا ذ ڒْْحَاكمْ ن ڒْْعَاهْذْ.
٢٣ ؤُ زڭْ وَامِي إِ غَا ڭّنْ إِجّْ ن ڒْْعقْذْ أَكِيذسْ، أَذْ إِڭّْ س ڒْْغشّْ. أَذْ إِسّْڭعّذْ ؤُ أَذْ إِذْوڒْ إِزمَّارْ خَاسنْ س ذْرُوسْ ن ڒْْڭنْسْ وَاهَا.
٢٤ أَذْ يَاذفْ س ڒْْغفْڒثْ ذِي جّْوَايهْ إِسّْغمَّاينْ ن لْعَامَالَا ؤُشَا أَذْ إِڭّْ مِينْ وَارْ ڭِّينْ ڒجْذُوذْ نّسْ نِيغْ ڒجْذُوذْ ن ڒجْذُوذْ نّسْ: أَذْ يَاشَارْ ؤُ أَذْ إِكشّضْ ؤُ مَارَّا أَڭْڒَاونْ أَذْ ثنْ إِزدْجعْ جَارْ أَسنْ. نتَّا ڭُّورْ أَذْ إِخَارّصْ ذڭْ إِنْوَاينْ ضِيدّْ إِ لْقلْعَاثْ، أَڒْ إِشْثْ نْ ڒْوقْثْ إِتّْوَاڭّنْ.
٢٥ س يِيجّْ ن ڒْْعسْكَارْ أَمقّْرَانْ أَذْ يَارّْ جّهْذْ نّسْ ذ وُوڒْ نّسْ ضِيدّْ إِ يِيجّْ ن ؤُجدْجِيذْ ن لْجَانُوبْ ؤُشَا أَجدْجِيذْ ن لْجَانُوبْ أَذْ إِفّغْ غَارْ ؤُمنْغِي س يِيجّْ ن ڒْْعسْكَارْ أَمقّْرَانْ إِجْهذْ، مَاشَا وَارْ إِزمَّارْ أَذْ إِبدّْ، مِينْزِي أَذْ خَاسْ ڭّنْ ثِيمعْمَاتْشْ،
٢٦ ذ يِينِّي إِتّتّنْ زِي مَاشَّا ن ؤُجدْجِيذْ، أَذْ ث أَرْژنْ ؤُ ڒْْعسْكَارْ نّسْ أَذْ إِتّْوَامْحَا ؤُ أَطَّاسْ أَذْ تّْوَانْغنْ.
٢٧ ؤُڒْ ن ثْنَاينْ ن إِجدْجِيذنْ-أَ أَذْ يِيڒِي إِسّڭُّورْ غَارْ ڒْْغَارْ ؤُ خْ طَّابْڒَا ذ إِشْثْ أَذْ إِنِينْ إِخَارِّيقنْ، مَاشَا مَانْ أَيَا وَارْ إِنفّعْ، مَاغَارْ أَنڭَّارْ إِتّْرَاجَا عَاذْ أَڒْ ڒْْوقْثْ إِتّْوَاڭّنْ.
٢٨ س ؤُبَارُّو ن وَاڭْڒَا أَذْ يَارڭّْوحْ غَارْ ثمُّورْثْ نّسْ ؤُ ؤُڒْ نّسْ أَذْ يِيڒِي ضِيدّْ إِ ڒْْعَاهْذْ إِقدّْسنْ ؤُ نتَّا أَذْ إِڭّْ أَمنِّي ؤُ خنِّي أَذْ إِعْقبْ غَارْ ثمُّورْثْ نّسْ.
٢٩ ذڭْ إِشْثْ ن ڒْْوقْثْ إِتّْوَاڭّنْ أَذْ د-إِعْقبْ، أَذْ إِرَاحْ غَارْ لْجَانُوبْ، مَاشَا ثْوَاڒَا-يَا ثَانڭَّارُوثْ وَارْ ثتِّيڒِي أَمْ ثْوَاڒَا ثَامزْوَارُوثْ.
٣٠ مَاغَارْ إِغَارُّوبَا ن كِيتِّيمْ أَذْ غَارسْ د-أَسنْ ؤُ نتَّا أَذْ إِتّْوَاسِّيڭّْوذْ، أَذْ إِعْقبْ ؤُ خنِّي أَذْ إِسْخضْ خْ ڒْْعَاهْذْ إِقدّْسنْ ؤُ أَذْ إِڭّْ أَمنِّي. خْمِي د غَا إِعْقبْ أَذْ إِمّْسفْهمْ أَكْ-ذ يِينِّي د-إِفّْغنْ زِي ڒْْعَاهْذْ إِقدّْسنْ.
٣١ أَذْ قِّيمنْ بدّنْ إِغَادْجنْ ن ڒْْعسْكَارْ إِ زَّايسْ، إِنِّي إِ غَا إِغصْبنْ زَّاوشْثْ إِقدّْسنْ، لْبُورْجْ، ؤُشَا أَذْ كّْسنْ ثَاغَارْصْثْ ن ڒبْذَا ؤُ أَذْ ذِينْ سّْبدّنْ نّْعِي ن ؤُخَارّبْ.
٣٢ إِنِّي ذَايْسنْ نّيّثْ ثَاعفَّانْثْ خْ ڒْْعَاهْذْ، أَذْ ثنْ إِسُّوفّغْ زڭْ وبْرِيذْ س ثحْرَايْمشْثْ، مَاشَا ڒْْڭنْسْ، أَقَا إِنِّي إِسّْننْ أَربِّي نْسنْ، ڭُّورْ أَذْ إِڒِينْ جهْذنْ ؤُ أَذْ ڭّنْ.
٣٣ إِفهَّامنْ ن ڒْْڭنْسْ أَذْ سّْفثْننْ أَطَّاسْ، ؤُشَا أَطَّاسْ أَذْ نّْقَارْضنْ س سِّيفْ ذ إِحُوذَاقْ ن ثْمسِّي ذ ثْمحْبَاسْثْ ذ ؤُكشّضْ، أَطَّاسْ ن وُوسَّانْ.
٣٤ خْمِي غَا نْقَارْضنْ، أَذْ أَفنْ إِشْثْ ن ثْوِيزَا ثَامژْيَانْثْ ؤُ أَطَّاسْ أَذْ غَارْسنْ د-مُوننْ س ثحْرَايْمشْثْ.
٣٥ شَا زڭْ إِفهَّامنْ أَذْ نْقَارْضنْ مَاحنْذْ أَذْ تّْوَاصفَّانْ ؤُ أَذْ تّْوَاسِّيزذْڭنْ ؤُ أَذْ تّْوَاصفَّانْ أَڒْ ڒْْوقْثْ ن ؤُنڭَّارْ، مَاغَارْ أَذْ يِيڒِي أَڒْ ڒْْوقْثْ إِتّْوَاڭّنْ.
٣٦ أَجدْجِيذْ أَذْ إِڭّْ مِينْ إِخْسْ نتَّا ؤُ أَذْ إِسّْڭعّذْ إِخفْ نّسْ ؤُ أَذْ إِسّمْغَارْ إِخفْ نّسْ سنّجْ خْ كُوڒْ أَربِّي ؤُ نتَّا أَذْ يِينِي ڒعْجبْ ن ثْمسْڒَايِينْ ضِيدّْ إِ أَربِّي خْ مَارَّا إِربِّيثنْ. نتَّا أَذْ إِفْڒحْ أَڒْ غَا إِتّْوَاكمّڒْ وسْخضْ مَارَّا، مَاغَارْ أَقَا يُورَا ؤُشَا أَذْ يِيڒِي.
٣٧ نتَّا وَارْ ڭُّورْ أَذْ ث شْقَانْ إِربِّيثنْ ن ڒجْذُوذْ نّسْ ؤُڒَا ذ ڒغْرِيزثْ ن ثمْغَارِينْ. نتَّا وَارْ ذ أَسْ إِشْقِي ؤُڒَا ذ إِجّْ ن أَربِّي، مَاشَا أَذْ إِسّمْغَارْ إِخفْ نّسْ سنّجْ خْ مَارَّا.
٣٨ ذڭْ ومْشَانْ نّسْ أَذْ إِوقَّارْ أَربِّي ن لْبُورْجَاثْ. أَذْ إِوقَّارْ أَربِّي نِّي وَارْ سِّيننْ شَا ڒجْذُوذْ نّسْ، س وُورغْ ذ نُّوقَارْثْ ذ يژْرَا إِغْڒَانْ ذ ڒقْشُوعْ إِغْڒَانْ.
٣٩ نتَّا أَذْ إِڭّْ ضِيدّْ إِ لْقلْعَاثْ س أَربِّي أَغْرِيبْ. ونِّي ث غَا إِقبْڒنْ، أَذْ إِكْسِي أَطَّاسْ ن شَّانْ ؤُ أَذْ إِصلّطْ خْ وَاطَّاسْ ؤُ نتَّا أَذْ خَاسنْ إِبْضَا ثَامُّورْثْ ذ ڒْْمُونثْ.
٤٠ ذِي ڒْْوقْثْ ن ؤُنڭَّارُو أَذْ أَسْ إِزْذمْ ؤُجدْجِيذْ ن لْجَانُوبْ س وَاشَّاونْ نّسْ ؤُ أَجدْجِيذْ ن شَّامَالْ أَذْ خَاسْ إِدُّوقّزْ س إِكَارُّوثنْ ذ إِمْنَاينْ ذ وَاطَّاسْ ن إِغَارُّوبَا ؤُ نتَّا أَذْ يَاذفْ ثِيمُّورَا أَمْ ڒْْحمْڒثْ ؤُشَا خنِّي أَذْ خَاسنْ إِعْذُو.
٤١ نتَّا أَذْ يَاذفْ ثَامُّورْثْ ن ثلْوِيزْثْ ؤُ أَطَّاسْ أَذْ نّْقَارْضنْ، مَاشَا إِنَا أَذْ أَروْڒنْ زڭْ ؤُفُوسْ نّسْ: إِذُومْ ذ مُوآبَ ذ ؤُمزْوَارْ ن أَيْثْ ن عَامُّونْ.
٤٢ نتَّا أَذْ إِسّْوِيژّضْ س ؤُفُوسْ نّسْ غَارْ ثمُّورَا. ؤُڒَا ذ ثَامُّورْثْ ن مِيصْرَا وَارْ ثْنجّمْ.
٤٣ نتَّا أَذْ إِصلّطْ خْ ثْخُوبَايْ ن وُورغْ ذ نُّوقَارْثْ ذ مَارَّا ڒقْشُوعْ إِغْڒَانْ ن مِيصْرَا. أَيْثْ ن لِيبْيَا ذ أَيْثْ ن كُوشْ أَذْ ثْ ضْفَارنْ ذڭْ إِصُورَافْ نّسْ.
٤٤ مَاشَا ڒخْبُورَاثْ زِي شَّارْقْ ؤُ زِي شَّامَالْ أَذْ ث سّْنخْڒعنْ. خنِّي أَذْ إِفّغْ س وسْعَارْ أَمقّْرَانْ حِيمَا أَذْ يَاردّدْجْ أَطَّاسْ ؤُ حِيمَا أَذْ ثنْ إِثحَّا.
٤٥ أَذْ إِوّثْ ثِيخُوزَانْ نّسْ إِڭلّْذنْ جَارْ ڒبْحُورْ ذ وذْرَارْ ن ثلْوِيزْثْ إِقدّْسنْ ؤُ نتَّا أَذْ يَاوضْ غَارْ ؤُنڭَّارْ نّسْ ؤُ وَارْ ذِينْ إِتِّيفْ حذْ أَذْ ث إِعَاونْ.“