٥
أَسْحيّذْ ن إِجّْ ن ؤُمذْنُوبْ زِي ثْمسْمُونْثْ
١ ڒْْحَاسُوڒْ، إِتّْوَانَّا بلِّي أَقَا ذِينْ جَارْ أَومْ فَارْقْ-شّْغڒْ، ؤُ أَنشْثْ ن فَارْقْ-شّْغڒْ نِّي وَارْ إِدْجِينْ قَاعْ جَارْ لْكُوفَّارْ، أَقَا إِجّْ ن مِّيسْ غَارسْ ثَامْغَارْثْ ن بَابَاسْ.
٢ كنِّيوْ ثسُّوفَّامْ إِخفْ نْومْ، وَاخَّا إِتّْخصَّا أَومْ ذِي ثِيذتّْ أَذْ ثْشضْنمْ، حِيمَا أَذْ ثْحيّْضمْ ونِّي إِڭِّينْ مَانْ أَيَا زِي ڒْْوسْطْ نْومْ.
٣ وَاخَّا نشّْ أَڭّْوجغْ عْلَاحْسَابْ أَرِّيمثْ، أَقَا أَيِي حْضَارغْ ذِي أَرُّوحْ، ؤُشَا أَقَا حكْمغْ أَخْمِي حْضَارغْ خْ ونِّي إِڭِّينْ مَانْ أَيَا.
٤ إِتّْخصَّا أَذْ ثْمُونمْ مَارَّا ذڭْ يِيسمْ ن سِيذِيثْنغْ يَاسُوع لْمَاسِيحْ، ؤُ نشّْ أَكِيذْومْ ذِي أَرُّوحْ، س جّهْذْ ن سِيذِيثْنغْ يَاسُوع لْمَاسِيحْ،
٥ ؤُشَا كنِّيوْ أَذْ ث ثْسلّْممْ إِ شِّيطَانْ إِ ثْخسَّارْثْ ن أَرِّيمثْ نّسْ، حِيمَا أَذْ إِدَّارْ ذِي أَرُّوحْ ذڭْ وَاسّْ ن سِيذِيثْنغْ يَاسُوع لْمَاسِيحْ.
٦ وَارْ د خَاومْ يُوسِي ؤُفيّشْ! مَا وَارْ ثسِّينمْ شَا بلِّي شْوَايْثْ ن ونْثُونْ إِسّْممّْ مَارَّا ثَاعبُّوزْثْ ن وَارشْثِي؟
٧ سِيزذْڭمْ إِخفْ نْومْ خنِّي زڭْ ونْثُونْ أَقْذِيمْ، حِيمَا أَذْ ثِيڒِيمْ ذ إِشْثْ ن ڒْْعجْنثْ ن وَارشْثِي ن جْذِيذْ. أَقَا كنِّيوْ ذ أَغْرُومْ بْڒَا أَنْثُونْ، مِينْزِي ثَاغَارْصْثْ نّغْ ن ؤُسعْذُو أَقَا ثتّْوَاغَارْصْ إِ نشِّينْ، أَقَا نتَّا ذ لْمَاسِيحْ.
٨ س ؤُينِّي أجّْ أَنغْ أَذْ نْعيّذْ، وَارْ إِدْجِي س ونْثُونْ أَقْذِيمْ نِيغْ س ونْثُونْ ن ثُوعفّْنَا ذ ڒْْغَارْ، مَاشَا س ونْثُونْ ن ڒصْفَايثْ ذ ثْقدَّاسْثْ.
٩ أَقَا ؤُرِيغْ أَومْ-د ذِي ثبْرَاثْ، إِتّْخصَّا وَارْ تّْعَاشَارمْ أَيْثْ ن فَارْقْ-شّْغڒْ
١٠ وَارْ سِّيوْڒغْ خْ أَيْثْ ن فَارْقْ-شّْغڒْ نِّي إِدْجَانْ ذِي دُّونشْثْ-أَ، نِيغْ خْ إِضمَّاعنْ نِيغْ خْ إِبعَّاجْ نِيغْ خْ يِينِّي إِعبّْذنْ لْ-أَصْنَامْ، مَاڒَا أَمُّو، إِڒِي أَذْ ثفّْغمْ زِي دُّونشْثْ-أَ.
١١ مَاشَا ؤُرِيغْ أَومْ-د ڒخُّو، حِيمَا وَارْ ثتّْعَاشَارمْ شَا حذْ، وَاخَّا قَّارنْ أَسْ ؤُمَا، مَاشَا أَقَا-ث ذ بُو-فَارْقْ-شّْغڒْ، نِيغْ ذ أَضمَّاعْ، نِيغْ ذ ونِّي إِعبّْذنْ لْ-أَصْنَامْ، نِيغْ ذ أَمْشقَّافْ، نِيغْ ذ أَسْكَارْجِي، نِيغْ ذ أَشفَّارْ. أَكْ-ذ حذْ أَمْ وَانِيثَا وَارْ كِيسْ ثتّتّمْ عَاذْ أَغْرُومْ!
١٢ مِينْزِي مَانْ ڒْْحقّْ غَارِي، حِيمَا أَذْ حكْمغْ خْ يِينِّي إِدْجَانْ بَارَّا؟ حكّْممْ كنِّيوْ خْ يِينِّي إِدْجَانْ ذَاخڒْ!
١٣ مَاشَا إِنِّي إِدْجَانْ بَارَّا، أَربِّي أَذْ خَاسنْ إِحْكمْ. سْحيّْذمْ خَاومْ أَعفَّانْ!