١٣
ثَايْرِي
١ ”مَاعْلِيكْ نشّْ سَّاوَاڒغْ
س إِڒْسَاونْ ن إِوْذَانْ ذ لْمَالَاكَاثْ،
مَاشَا وَارْ غَارِي بُو ثَايْرِي،
أَقَا ذوْڒغْ ذ نّْحَاسْ إِتّنْثُوننْ،
نِيغْ ذ أَدْجُونْ إِدّنْذُوننْ.
٢ مَاعْلِيكْ غَارِي ثَاوْهِيبْثْ مَاحنْذْ أَذْ نبّغْ،
فهّْمغْ مَارَّا ڒسْرَارْ
ؤُ غَارِي مَارَّا ثُوسّْنَا ذ مَارَّا لْ-إِيمَانْ
أَڒْ ذ سّْمُوطِّييغْ إِذُورَارْ،
مَاشَا وَارْ ذ أَيِي ثدْجِي ثَايْرِي،
خنِّي نشّْ ذ وَالُو إِ دْجِيغْ.
٣ معْلِيكْ بْضِيغْ مَارَّا أَڭْڒَا إِنُو
ذ مَاشَّا خْ إِمزْڒَاضْ،
مَاعْلِيكْ وْشِيغْ أَرِّيمثْ إِنُو
حِيمَا أَذْ ت سّْشمْضنْ،
مَاشَا وَارْ ذَايِي ثدْجِي ثَايْرِي،
وَارْ ذ أَيِي ثْنفّعْ ذِي وَالُو.
٤ ثَايْرِي ثدْجَا غَارسْ تَّاسِيعْ ن ڒْْخَاضَارْ ذ ڒضْرَافثْ،
ثَايْرِي وَارْ ذَايسْ بُو ثُوسْمِي،
ثَايْرِي وَارْ ثتّْفيّشْ س يِيخفْ نّسْ،
وَارْ ذَايسْ بُو نّْفَاخثْ،
٥ ثَايْرِي وَارْ ثتّڭّْ بُو ڒفْضِيحثْ،
وَارْ ثَارزُّو ثِيزِي نّسْ،
وَارْ ثتّْوَاسَّارْزَاڭْ،
ؤُشَا وَارْ ثتّْخمَّامْ ذِي مِينْ إِدْجَانْ ذ أَعفَّانْ.
٦ أَقَا وَارْ ثْفَارّحْ شَا زِي ڒْْغشّْ،
مَاشَا ثْفَارّحْ زِي ثِيذتّْ.
٧ أَقَا ثْصبّرْ ذِي مَارَّا،
ثتَّامنْ ذِي مَارَّا،
ثسَّاثمْ مَارَّا،
ؤُشَا ثَاربُّو مَارَّا.
٨ ثَايْرِي وَارْ ثْفنِّيعمَّارْصْ،
مَاشَا أَوَاڒنْ ن نُّوبُووَاثْ
أَذْ غَارْسنْ يِيڒِي ؤُنڭَّارْ،
إِڒْسَاونْ أَذْ ڭْنُونْ،
ؤُ ثُوسّْنَا أَذْ ثبْضڒْ.
٩ مِينْزِي أَقَا نسّنْ غَارْ إِجّْ ن ؤُغزْذِيسْ وَاهَا،
ؤُشَا نتّْنَابّْ مْغِيرْ إِجّْ ن وزْينْ،
١٠ مَاشَا خْمِي د غَا ثَاسْ ڒكْمَارثْ
ڒخْذنِّي مِينْ إِدْجَانْ غَارْ إِجّْ ن وزْينْ أَذْ إِبْضڒْ.
١١ ڒَْامِي ثُوغَا أَيِي ذ أَحنْجِيرْ،
سِّيوْڒغْ أَمْ ؤُحنْجِيرْ،
فكَّارغْ أَمْ ؤُحنْجِيرْ،
خَارْصغْ أَمْ ؤُحنْجِيرْ،
مَاشَا ڒَْامِي ذوْڒغْ ذ أَرْيَازْ،
جِّيغْ أَوَارْنِي أَيِي مِينْ إِدْجَانْ ن ؤُحنْجِيرْ.
١٢ ڒخُّو نتّْوَاڒَا س إِشْثْ ن ثِيسِيثْ إِبَارْشْننْ
غَارْ إِجّْ ن وَارْوَاسْ،
مَاشَا خنِّي أَذْ نْژَارْ ثِيفْرَاسْ غَارْ ثِيفْرَاسْ.
ڒخُّو سّْنغْ غَارْ إِجّْ ن وزْينْ وَاهَا،
مَاشَا خنِّي أَذْ سّْنغْ
مَامّشْ ثُوغَا تّْوَاسّْنغْ نشّْ.
١٣ مَاغَارْ ثْڒَاثَا-يَا أَذْ قِّيمنْ:
لْ-إِيمَانْ، أَسِيثمْ ذ ثَايْرِي،
مَاشَا أَمقّْرَانْ نْسنْ أَقَا-ت ذ ثَايْرِي.“