25
Abraham sao seluꞌ
1 Abraham sao seluꞌ inaꞌ esa, nade Ketura.
2 Ketura boki fee ni anaꞌ. Nade nara siꞌ: Simran, Yoksan, Medan, Midian, Isbak, ma Sua.
3 Yoksan ana nara, siꞌ Seba ma Dedan. Dedan tititi-nonosin, siꞌ lahenda Asyur, Letus, ma lahenda Leum ara.
4 Midian ana nara, siꞌ: Efa, Efer, Henok, Abida, ma Eldaa. Basa sira nana, Ketura tititi-nonosin.
5-6 Tepoꞌ fo Abraham bei nasoda a, ana bati fee Hagar no Ketura ana nara, esaꞌko noꞌ hata-heton. Basa de ana nadenu si, fo reu leo rai dae Kanaꞌan pooꞌ dulu, fo ela ara dooꞌ a reme ana ni Isak mai. Tehuu basa hata posaka nara, ana fee katemaꞌ asa leo Isak reu.
Abraham maten
7-8 Abraham maten neuꞌ teu ni natun esa hituhulu lima.
9-10 Basa de ana nara, Isak ma Ismael ratoin nai lea Makpela, fo riꞌ naneneaꞌ no Mamre. Maulu na Abraham asa na okaꞌ ria neme lahenda Het, riꞌ Sohar anan, Efron. Maulu na, ara ratoi Sara nai leaꞌ ria boe.
11 Abraham mate ni, basa boe ma Manetualain fee ua-naleꞌ neuꞌ Isak, losaꞌ ana nasoda no mole-dame. Tepoꞌ ria, Isak leo naneneaꞌ oe dodoluꞌ esa, nade Beer Lahai Roi.
Ismael tititi-nonosin
12 Ia nana Ismael tutui na. Ria nana, Abraham no sao murin Hagar anan. Hagar nana, Sara atan neme Masir mai.
13-16 Ismael ana nara, touꞌ sanahulu dua. Nade nara ratutuka ao, neme uluꞌ a losa mateꞌa tei-susuꞌ a, siꞌ: Nebayot, Kedar, Adbeel, Mibsam, Misma, Duma, Masa, Hadad, Tema, Yetur, Nafis, ma Kedma. Anaꞌ sira dadi reuꞌ bei-baꞌi reme lahenda nusaꞌ sanahulu dua mai, esaꞌko noꞌ nusa-namon. Ara fee nusa-namo sira ranade tuka sira esaꞌko bei-baꞌin naden.
17 Ismael maten neuꞌ teu ni natun esa telu hulu hitu.
18 Tehuu tititi-nonosi nara, esa musu no esa. De ara leo kofela mulai remeꞌ Hawila losa Syur, natoo no nusa Masir, naroo neu losa Asyur.
Esau no Yakob
19 Ia nana Abraham anan Isak tutui na.
20 Tepoꞌ fo Isak sao Ribka, nana Isak teun haa hulu. Ribka papa ni, Betuel. Ma naa ni, Laban. Sira nana, lahenda Aram, reme Padan Aram mai.
21 Ribka ta boki fa. Huu ria na, de Isak hule-haradoi neuꞌ MANETUALAIN ela Ribka boki. Manetualain namanene huhule-haradoi na, boe ma Ribka nairu.
22 Sekonaa te, ana nairu ana kaduaꞌ. Tehuu anaꞌ sira rafifiti raroo nai inan tein daleꞌ. Boe ma Ribka natane nai dalen daleꞌ nae, “Ubeaꞌ taon de ana kaduaꞌ ia ra, leo iaꞌ?” Basa de ana natane neuꞌ MANETUALAIN.
23 MANETUALAIN nataa nae,
“Nai o tei ma daleꞌ, hapu lahenda nusaꞌ dua fo neuꞌ ko ara ramusu ao raroo.
Neuꞌ ko muriꞌ a baraꞌai na lena neme uluꞌ a mai.
Ma aꞌa a noi-tao soa neuꞌ fadi na.”
24 Losa fai boboki na, boe ma Ribka boki ana kaduaꞌ, touꞌ mesan.
25 Ana uluꞌ a rou na pilas, ma ao-ina na nabubulu. Huu ria na de ara foin nade, Esau (hiiꞌ nae sama leoꞌ dedea fekeꞌ a sosoa na nae ‘kabubulus’).
26 Basa ria, besaꞌ ko fadi na kalua. Tehuu ana homu neuꞌ aꞌa na eitika na. Huu ria na de ara foin nade, Yakob (hiiꞌ nae sama leoꞌ dedea fekeꞌ fo sosoa na nae ‘eitikaꞌ’). Faiꞌ fo boki dua si, nana Isak teun nee hulu.
Yakob tipu-dai na aꞌan hak ulu-bauinan
27 Ana kaduaꞌ sira rambau-ina mai, Esau dadi manasopu kahereꞌ. Ana nahiiꞌ leo nai nura a. Tehuu Yakob lahenda hara taaꞌ, ma nahiiꞌ nahaniꞌ uma.
28 Isak nahiiꞌ naaꞌ paa banda fuiꞌ. Huu ria na, de ana sue na Esau seliꞌ. Tehuu Ribka sue na Yakob seliꞌ.
29 Laiꞌ esa de Yakob nasu fufue, Esau besaꞌ ko sopu fali. Ana sota ma namalaa naan seli.
30 Ana nafada Yakob nae, “Fadi, e! Fee au kua pilas ma baiꞌ nai ureꞌ a, fo ua dei! Au amalaa an seliꞌ.” (Huu ria na de raloo ni rae, Edom, hiiꞌ nae sama leoꞌ dedea fekeꞌ fo sosoa na nae ‘pilas’).
31 Boe ma Yakob nataa nae, “Malole a aꞌa. Tehuu loo fee au hak ulu-bau-ina ma dei!”
32 Esau nataa nae, “Ubea aleꞌ no hak ulu-bau-inaꞌ ria! O soan leo. Au amalaa an seliꞌ so. O sode malaiꞌ a, fo munin mai leo, huu fo au nau ua so.”
33 Tehuu Yakob dedea bali, nae, “Aꞌa, mahani deiꞌ! Aꞌa ka soo-supa dei mae, loo fee au hak ria.” Boe ma Esau soo-supa nae leoꞌ na.
34 Basa de Yakob sode feen kua fufue ria no roti. Esau naa-ninu basa, boe ma ana laꞌo heni aon.
No ria na, Esau parsen heni ria hak ulu-bau-ina na.