73
Pahpãm catyt kam mehkrã pej me mehkrã kên to ipicokjêr na mencrer
1 He imã, Ixaher catêjê te amji kam hapac xà cunea kam
mehkên nare, ne mehtetetti atajê caxuw ri,
Pahpãm peaj to impej na,
imã hahkre pej.
2-3 Ne mam pê wa nee hahkre pej to hajỹr nare.
Pê wa mehkrã kên me,
amjia kôt ame ipa catêjê atajê jũ na,
apu cute me amji kam hapac xà pê mehàhcukrêj cati atajê kĩn.
Na pê wa ajmãr Pahpãm kôt ipa xà ita na atij, ne ipỳm,
ne ajmãr ikên mã axà.
4 Ampo na?
Me cumãa, cute me amji kam hapac xà cunea kam mehcarĩcti.
Ne nee ame hà nare, ne me capẽnti, ne mehtỳjti.
5 Ne me cumãa, cute me amji pupun xà kêanre nõ hamreare.
Pom ahnaa mã mehkwỳ te me amji pupun xà kêanre to
me amji pupu ita na,
cute me hajỹr nare.
6 Ne por me hakràj cati na amji to me ipipẽ to me ipa atajê ri,
ihhêj ne me cumã impeaj to impej.
Ne ramã cute me cupê hamreare,
ne me cupê mehkryjreatajê to me hàprê to me ipa to
cute me amji pyràc tu.
7 Ne cute amji kam me hapac xà kên to pit mã,
cute ame caxwỳn to hipu tu.
Ne ramã amji jirôa pê
cute me amji kam hapac xà kên jàhtôa to
amji to mehhimpej to me ipa.
8 Ne mehcunea mã xwỳ xà kêanre to me ipa,
ne ampo kên to pit mã mehcakôc to me ipa.
Ne ihtỳj mehcunea jirôa pê amji to me cati prãm tome ipa.
Ne cute me cupê hamreare, ne mehpeacre atajê mã mehhêj,
ne mehkên mã me irẽn to pit mã me amji kampa.
9 Ne ihtỳj côjkwa kam Pahpãm to mehcakôc kêanre to me ipa.
Ne cute amji to me cati prãmte,
ihtỳj pjê kam mehcunea mã me harkwa jirê,
ne tee ampo cunea to mehhimpej to me ipa prãm.
10 Hõhõ, ata to ri Pahpãm na mehkwỳ to ihcuhhê ne mehhi kẽhkẽ,
mã ma mehkôt me ipa,
ne ihtỳj cute me ampo jarẽn xà atajê kôt me ipa.
11 Mã ajpẽn mã ame hũjarẽn to:
“Quê ha nee Pahpãm ampo itajê nõ na me pajahkre pej nare.
Quê ha Carôt Tỳjti ata nee ampo itajê nõ na
me pamã cator nare” hane.
12 Mehkrã kên catêjê te me hajỹr he.
Me cumã ampo catia,
ne ma hõtpê me ipicamẽn to me ipa,
ne ampeaj kam me hakràj.
13 Cwỳrjapê wa ajmãr ite amji jarẽn to hajỹr he:
“He wa ihhêj ne amji caprỳ to,
ite ikên ton tête amji jiprõn to ipa.
Ne mẽr ampo caxuw mã waikên pê ijũhkra to awpjê,
ne to ihtetetti to prãm?
14 Ne pom ite ipej cwỳrjapê amji cajpẽr xà kêanre itajê to,
ite amji pupuan to pyt ita?
Ne wa ipej ton to ipa cakrô,
amcro cunea kam ajte ihhêjne ampo kên mã icjêj to ipa” hajỹr.
Hõ, wa ajmãr ite amji jarẽn to hajỹr.
15 Ỹhỹ ijõ Pahhiti, wa ha ampo itajê na amji jarẽ na mã,
wa ha ramã ipê aracri me akwỳ kên mã me irẽn catê hiahpuro.
16 Cwỳrjapê wa ite ampo itajê cunea jahkre pej xà na,
ite amji to hahkre ne hahkre pej.
Na ri imãa ampo itajê jahkre pej xà nee hirã pê nare.
17 Ỹhỹ me ijõ Inxũ Cati,
wa amã icakôc prãmte gũrkwa mã ixàr,
ne ite mehkrã kên catêjê te amji kam me hapac xà jicu xà mã mẽn na,
me hahkre pej pyrentu.
18 Ca ate mehkrã kên catêjê itajê kên mã me irẽn xà itajê pê ihhêj rũm
ate pry cuwrỳhti kôt ame hũxwỳr,
mã me hàtij to me ipa,
ne ma mehkênxà ata mã mehpỳpỳm, ne me hamre ata pyràac.
19 Ne quê ha ihprõt pê, me mõr pejti kam,
por amji mã me ampo cupahtiata pê Pahhiti te me to hamre xà ata,
me hỹrmã cato ne me kam tẽ,
ne me to hamre partu.
20 Ỹhỹ me ijõ Pahhiti, he ihhêj rũm mehkrã kên atajê pê,
pom me amti, ne me ahna apẽ,
mã jũ kam me cupê pra ata pyràac.
Wa ha amti ne ampra ne to ijapac kêt,
ita jĩkjê na,
ca ha ma amji cuna mã amehkrã kên catêjê atajê caca.
21 Ne pa, pê wa ajmãr acuna mã ixãm tỳj pyrentu,
ne ajmãr akêanre na ato amji kampa.
22 Ne pê wa ihhêj rũm ipê ampo jũpar nare ta,
ne ihhêj rũm ipê mehkrã nare ata pyràac,
ne nee ajte ate amji kam gapac xà itajê na
gahkre pej nare.
23 Cakrô ca atỳj icahi na apa,
ne awpôc rũm ate ipa na ijuwahi tu,
na wa ha nee ikên mã ipỳm nare.
Ne ikĩnte nee ate mehkrã kên atajê juwahi nare.
24 Na ca ha ate amji jahkre pejti ita to ijapackre to mõ,
ite amji kam ijapac xà itajê cunea kam.
Jirô pê mã, ca ha ma amji wỳr ijaprô,
ne côjkwa kam, amji jĩkjê rũm ijỹr.
Quê ha mehcunea acahê na me ipupu.
25 Ne jũm to wa aràn xà na amji mã ijõ Inxũ Cati?
He aràn xà na jũm hamreare!
Ca imã akrĩ ita kam,
wa nee pjê me côjkwa kam imã jũm na prãm nare.
Ne ampo na wa amji cuna mã ihprãam to prãm?
Ampo nare, he ca!
Ana wa ihprãam to prãm!
26 Quê icapẽnti xà ita ihtỳj ipê hamre,
quê ha ijĩ cunea ihtỳj ipê hà,
ne apê ri imã ijĩ to ihtỳj catê.
Ne apêa ri côjkwa kam imã,
ite amji kam ijapac xà to impej,
ne to hakràj catê rohnỳtti mã.
27 Ne por jũm apu amji tête acurê ne ma apu acaca ata,
quê ha ihtỳj hamre.
Ne por quê ha jũm amã hikra ne apê hawry ata,
ca ha ihkên mã amẽ, ne to hamre.
28 Ne wa pa ate amji cahi na ito apijapar ita na ite amji cajpẽr,
ne ahna imã impeaj to impej.
Ỹhỹ me ikwỳ, Pahpãm pê ri me pantête hàmtàr catê,
cwỳrjapê wa mehcunea mã,
cute imã ampo ton itajê cunea na, harẽn to ipa.