32
Cu ha Pahpãm mã pahte me to kên xà na me amji jarẽna mencrer
1 Ỹhỹ me ikwỳ!
Ampo pyrên cu ha ame pajakry?
He Pahpãm te me pamã, por pahte harkwa jirô pê me pahpỳm,
ne ihkaj na me pahkên xà ton atajê jicu,
ne to tojnõ ne ihhur ata pyrên,
cu ha ame pajakry.
2 Por Pahpãm te ampo kên ton atajê na
me pajarẽn kên nare atajê pyrên,
cu ha ame pajakry.
Por me pahcaxwãm pê
me pahte amji kam me pajapac xà hêj xi nare atajê pyrên,
cu ha ame pajakry.
3 Ne pê wa cumã ite ikên ton xà to icakôc nare ri mã,
ajco amcro cunea kam icwỳr to amji pectu, ne ipeacre.
4 Ỹhỹ, ijõ Inxũ pê Pahpãm,
wa itỳj ite ikên ton jahpan xà na,
ajco amcro me caxwa cunea kam ate ito kên xà atajê cajpẽ,
ne ramã ipê icarôt jamre to mõr te hajỹar,
pom quê pyt cacro atàr to incrà to ipa he.
5 Jicu xà kam, pê wa amji mã:
“Wa ha Pahpãm mã ite to kên na amji jarẽ” hane.
Pê wa amã ikên xà cunea na amji jarẽ.
Ne nee pê wa ite ampo kên ton xà atajê nõ to apê ipimxur nare.
Ne ite amã ihcunea to icakôc xà ata kam,
pê ca ampo to ite ato kên atajê cunea to tojnõ, ne hicu.
6 Ne por mehcunea mã akĩn,
mã amji mã me ato ihhimpej atajê te ri,
ihtỳjme amã amji cajrẽn to ipa xà.
Mãr quê jũ caxuw me hỹrmã ampo kên catia te cator xà ata kam,
nee cute me amã amji cajrẽn catêjê wỳr cator nare.
7 He apêa ri ito apimxur catê.
Ca ampo kên atajê cunea pê ito amxu ne itête amtà.
Wa ate itête me cupê gàmtàr xà ita pyrên ijakry to
kỳj cati pêa mã, amã cre.
8 Ỹhỹ me ikwỳ, Pahpãm te me pamã amji jarẽn to:
“Wa ha jũ ri me amõr xà ata jõ pry to me amã hahkre,
ca ha ihkôt me mõ.
Wa ha pa me gapackre, ne me gamãr to mõ.
9 Na ca ha nee me apê cawrô me,
cawrô cahàcre jũpar nare atajê te mempar prãmte,
mehkrã na hê,
ne jũ kam me to mõr xà ata wỳr
mehkjên to meipa atajê pyràc nare” hajỹr.
10 Ỹhỹ me ikwỳ, ampeaj kam ri,
mehkên catêjê hãn ne me amji pupun kên to ihkryjre nare.
Ne quêt me Pahpãm to amji mã mehhimpej catêjêatajê ri,
Pahpãm te me to ihhêj rũm pryjara pyràc,
ne ma mentête hara to kwỳcto ipa ita na,
ampo kên atajê cupate.
Ne ihtỳj hàhcajrẽan kam, cumã mehkĩan kam,
mentête hàmtàr to ipa.
11 Ne pom ca me acunea catyt kam me apa atajê,
me acunea me gakry!
Ne Pahpãm te me ato impejti xà atajê pyrên
hanea ne me amã amji kĩan ne!
Pom ca me amji mã kam gapac pejti,
ne catyt kam me apa itajê,
me gakrya ne,
ne pom me gakryti itajê to, me cumã cre!