2
Pahpãm te mehkwỳ mã pahhi capi ne hãm na mencrer
1 Ampo na mã amji caprỳ to krĩxàre kôt
ame côjkwa kam Pahhitipê Pahpãm kam mencryc,
ne cute ame hapu prãmte ame cuprõ?
Jũ wỳr quê ame amji mã hamã.
2 Ne ampo na mã me cupê mehcahkrit atajê jõ pahhi kwỳ,
hãn nePahhiti te me cumã hõ pahhi xãm ata cuna mã ame cuprõ,
ne ahna ame ajpẽn pa?
Ne me hõ pahhi catêjê me amji to cuprõ,
ne tee ahna me ajpẽn cukij to:
“Jũ mã cu ha ajte me,
ne cute me pahto ihhimpej xà ita pê me pahcato?” hane.
3 Ne amji caprỳ to me amji mã:
“Jũ wỳr cu ha me harkwa kôt ame papa!
Ne nee quê ha me cupê me pajõ pahhi nare!
Ne nee cu ha me pahnõ amjimã me hũpa to ame papa nare!
Quê ha pea cute me pahto ihhimpej xà ita caxuw
me cupê me carôt hamre,
na cu ha pahtỳj ame papa” hane.
4 Mã côjkwa kam Pahhiti,
cute me to ihhimpej xà krĩ xà impejti ata kam jỹ,
ne nee me harkwa ita kam apu amji to hàptõ nare,
ne cama ame ahna acxa, ne ame ahna xwỳ, ne amji mã:
“Me cumã ipar prãm nare catêjê amji caprỳ to ame ijũhhyr prãm,
ne jũ wỳr quême ito cô, ne me ijũhta” hane.
5-6 Pahhiti te me cumã me hõ pahhi xãm,
mã mehkwỳ ma amehcaca atajê kam ri incryac to incryc.
Na quê ha ihtỳj jũ caxuw incryac kam, ame cumãnkam tẽ,
ne me cumã:
“He itea wa amji mã me gõ pahhi ata capi,
cupê pjêcunea kam me gõ pahhi xà caxuw!
Ne quê ha ihtỳj Xijãw jõ kẽn kamihkrĩ xà ata kam ihkrĩ,
quê ha pjê cunea kam mehcunea me kampa!” hane.
Quê ha me hũpar nare atajê me kampa,
ne ampeaj kam me cumã hũpaa tohũpa,
ne mehkrã acto tu ne.
7 Mã Pahhiti te pjê cunea caxuw,
me cumã me hõ pahhi xãm ata te mehkwỳmã amji jarẽn to:
“Wa ha Pahhiti te ito hũjarẽn xà ata kôt me amã harẽ.
He cute cumã:
‘Apê ikra, ne ita caxuw ipê Apãm Cati.
8 Na ca ha ate mehcunea to ahimpej xà caxuw ina ahwỳ.
Wa ha amã krĩxàre cunea jahkre ne amã cugõ,
ca ha me to ahimpej to apa, quê ha me akampa.
9 Ne ca ha acarôt tỳjti ita to me to ahimpej to ihtỳaj to apa.
Ne me hũpar nare atajê, ca ha me to pjê te pot pyràac,
ne cute me amji kam me hapac xà kên mea mã,
me kam acryac kam me gãn partu’ hane”.
Hõ, pê Pahhiti me to hũjarẽn to hane.
10 Cwỳrjapê ca ha me apê pjê jõ pahhi catêjê,
me amji to akrã krejapêa ne me ikampa!
Ne me apê meto ahimpej catêjê cunea, ajco me ikam gapac peaj ne!
11 Na ca ha amji mã me Pahhiti cupa to kryjre nare.
Ne ate amji mã hũpahti na cute gahkre pej prãmte,
ca ha cuna mã akõn krã na jỹ, ne cumã amjijarẽn to:
“Wa ha ite amji kam ijapac xà cunea kam,
itỳj ihcunea na akampa” hane.
12 Hõhõ, ca ha ita to hajỹr nare na,
quê ha ihprõt pê akam incryc pyrentu,
ne ihtỳj akên catia mã amẽ,
ca ha gamre.
Ne por me amji pytàr prãmte,
Pahhiti wỳr me pra atajê,
quê ha quêt ame hakry.