9
Pê Jeju mento tũm to ajkrut ne me caprã
Matew 9.27-38
27 Pê pjê nõ kam Jeju apu mõ. Mã mento tũm pijakrut ne ihkôt me cumã hàkjêr to mõ, ne me cumã caràr to:
— Pahhi Tawi xwỳ tàmxwỳ ita, me icaprĩa ne — hane.
28 Mã ma Jeju mõ ne ikre nõ mã me to hàr, mã mento tũm atajê hũ na pire mã me xa. Mã cute mehcukij to:
— Xà ca ampeaj kam ajkĩ amji mã me ito ahimpej? Xà ampeaj kam ite me acaprãr na ate amji mã me ito hajỹr? — hajỹr. Mã me cumã:
— Ỹhỹ pahhi, ca ha atỳj me icaprã — hane.
29 Mã Jeju te hũhkrahhi to mento huc, ne me cumã harkwa to:
— Pom ca ampeaj kam ito amji mã me ahimpej xà ita te ri me acaprãr — hajỹr.
30 Mã hamre, mento itajê caprãr pyrentu, mã ihtỳj me rĩt. Mã Jeju te me cumã harkwa to:
— Ca ha nee jũm mã ite me ato hajỹr xà ita na me ijarẽn nare — hajỹr.
31 Mã ma me pra, ne cute me to ihhimpej xà ata kaj na, ihtỳj pjê ata kam mehcunea mã Jeju jarẽn to me mõ.
Pê Jeju ipẽrkêt caprã
32-33 Ne memprar jirô pê mã ri ajpên Jeju wỳr me jũm xũmre kam ampo carõ kên, mã ipẽrkêt ne nee ihcakôc nare to me mõ. Mã Jeju te intête ampo carõ kên ata cator. Mã cute ihcakôc kam ihtẽm. Mã cute me hõmpun catêjê atajê te amji mã me to ipikrar, ne me ajpẽn mã:
— Wa rỳ jũ caxuw ite me pajõ pjê ita kam, ite me ampo pejti te hajỹrjê nõ pupun nare — hajỹr.
34 Cakrô mã Parixêw catêjê te ajteare mã me harẽn to:
— Ampo carõ kên jõ pahhi te ri cumã cute mehkwỳ japôj xà caxuw carôt jõr, ne nee mã Pahpãm te cumã hõr nare — hajỹr.
Pê Jeju mã me caprĩ cati
35 Mã Jeju krĩ cati me krĩ kryjre cunea pupun to ihkôt hapôj to ipa. Ne ihtỳj Juta catêjê te me cuprõn xà atajê kôt, me cumã Pahpãm te me to ihhimpej xà jarẽn xà impejti na harẽn to ipa. Ne ihtỳj Hũm carôt kôt hàpên xà pihho ton, ne me hà catêjê cunea caprãr to ipa.
36 Mã Jeju te me hàhtôti atajê pupun, ne ampeaj kam cumã me caprĩ xà. Ampo na? Por atajê mã amji kĩn nare, ne me caxwãm pê mehpeacre, mã cama mehkrĩ ne ame ajkampa. Ne me cupê ihhêj rũm carà cahàcre pê hamãr catê nare ata pyràac, ne ihtỳj ame ipa, na ri ampeaj kam cumã me caprĩ xà.
37 Ne cute ihkôt me ipa catêjê mã harkwa to:
— Ampeaj kam me pajàpên xà pê Pahpãm wỳr me to me papipkjêr xà ita cati. He me pajàpên xà ita pê ihhêj rũm pur kam ampo hy to cuprõn xà pyràac. Ne me to hàpên catêjê ri cormã mencrêre.
38 Na ca ha côjkwa kam Pahhiti na me ahwỳ, mãr quê hipêr ajpên me pamã me hàpên catêjê kwỳ kujate, quê me cumã hàpên xà ita to apê — hajỹr.