IXAHER CATÊJÊ WỲR
Jũm Jõ Kàhhôc
Ỹhỹ, cute ihkàhhôc ita hôc catê te nee kam amji japrỳ xir nare, ne ihhêj ne Pawrô te mõrmõ ihhôc. Ne Ixaher catêjê te Jeju to amji mã mehhimpej atajê cunea mã ri cute ihhôc ne ihkujahêc. Na ri ihkàhhôc ita japrỳ te Ixaher Catêjê Te Jeju To Amji Mã Mehhimpej Atajê Wỳr, Jũm Jõ Kàhhôc (Ixaher).
Pê ihhêj ne Ixaher na mehkwỳ nare atajê hacpỹa mã Jeju na mehkwỳ to, mam menquêtjê te amji kam me hapac xà tũm ata wỳr ipipkjêr prãm. Cwỳrjapê ri ihkàhhôc ita nee cute Jeju to amji mã mehhimpej jicu nare name cumã apô. Ne Jeju te amji kam hapac xà tuwti ita ri, mam Ixaher catêjê te amji kam hapac xà tũm ata jirôa pê impej. Ne ite nee Ixaher catêjê wỳr ihkàhhôc tẽ ita cunea to ipintuw nare, ne ihkwỳ jatujre atajê ri ite to ipintuw.
11
Pahte Pahpãm to amji mã me pahhimpej xà kôt harẽn xà
Ixaher 11.1-40
2 Petrô 3.5-7
1 Ỹhỹ me ikwỳ pê Juta catêjê pê Ixaher catêjê, wa ha me amã me ate Pahpãm to amji mã me ahimpej to hahkre, ne to capô, mãr ca me hahkre pej pejtu ne. Quê ha Pahpãm te me pamã ampo to hũjahkre xà ata, cormã nee me pahwỳr cator xà narecakrô, cu ha pahtỳj ampeaj kam, cormã me pamã hõr na amji mã me to hane, ne ihtỳj hikaj. Cu ha pahte Pahpãm to amji mã me pahhimpej na, quê ha ihtỳj mepamã ampo pupun xà nare ata te ihkrĩ na hahkre peaj to hahkre pej. Nãmri cu ha pahte Pahpãm to amji mã me pahhimpej nare na, cu ha nee me hahkre pej nare.
2-3 Ne cu Pahpãm to amji mã me pahhimpej, cwỳrjapê ri me pamã Pahpãm jarkwa kôt pjê me côjkwa kam ampo cunea to amji ton nahahkre pej. Na ri me pamã, pahte nee me ampo pupun xà nare ata te ri ampo itajê cunea ton na hahkre pej. Nepê me panquêtjê ihtỳj Pahpãm to amji mã mehhimpej, cwỳrjapê ri Pahpãm te me to ihcakôc to impejti, ne me ahna amji caxàr.
Pê Ixaher catêjê quêtjê itajê ihtỳj Pahpãm to amji mã mehhimpej
4 Pê ajco Aper xwỳ Pahpãm to amji mã hane, cwỳrjapê ri Pahpãm mã cute Cãn xwỳ jirôa pê ampo jõr xà ata peaj to impej. Mã Pahpãm te, cute cumã ampo jõr xà ita na cupê catyt kam ipa catê na harẽn to impeaj to impej. Na pê ihtỳj ihkôt Aper xwỳ na amji capa. Ne pê ramã Aper xwỳ ty cakrô, mã cormã cute Pahpãm to amji mã ihhimpej xà ata, ihkôat me pamã to hahkre.
5 Pê Enoc hanea ne Pahpãm to amji mã hane, na pê ihcajpuaw pê Pahpãm ahna amji jarẽ, na pê nee pjêita kam ihtyc nare, pê Pahpãm amji mã ihtĩar na to api, pê nee hipêr jũ caxuw jũm cumã cator ne hõmpun nare.
6 Jũ wỳr cu Pahpãm to me pahte amji mã hajỹr nare xà ata kam ihcajpuaw. Quê ha jũm te Pahpãm wỳr hàhtêp na amji to hàhcukjêr na, quêha ihtỳj Pahpãm te ihkrĩ na amji mã to hane. Ne quê ha hanea ne caxwãm catia mã Pahpãm kôt me ipa prãmte ahna ahcukij, quê ha ihtỳj cute ahna hàhcukjêr ata jahpan xà na, cute ahna amji caxàr na amji mã to hane.
7 Pê Nowe xwỳ hanea ne ajco Pahpãm to amji mã ihhimpej, na pê ihtỳj cumã, por rỳ nee jũm te ta catia pupun nare ata cawpa. Pê cute cumã ihcawpa xà ata kôt, amjimã pàr kreti to, mãr quê kaam mehkra me, amji to mehtyc xà jahpa. Mã ihkĩnte cute nee Pahpãm to amji mã mehhimpej nare atajê te amji curêmã me amji mẽn, ne mehcunea jamre. Mã Pahpãm te Nowe xwỳ te amji mã tohajỹr xà ata kôt ahna amji caxàr, ne cumã:
— Ate ikam gapac pejti, na ri apê catyt kam apa catê — hajỹr.
Aprãw pê cute Pahpãm to amji mã mehhimpej catêjê xakat
8 Pê Aprãw xwỳ hanea ne ajco Pahpãm to amji mã ihhimpej to ipa, pê Pahpãm cumã jũ ri cute pjê to hõ tekjê xà ata to, hũjahkre xà ata na, amjimã to hane. Ne ma harkwa kôt, nee jũ ri cute hõ pjê ata jahkre pej nare kam, ihwỳr mõ.
9 Pê Pahpãm Aprãw mã pjê to hũjahkre xà ata kôt, ihkôat ihwỳr mõ ne curi cato, ne kam ihkrĩ. Ne hanea ne ihkra pê Ixac me, ihtàmxwỳ japrỳ te Jaco ata me, kammehkrĩ. Ne pê hanea ne Pahpãm Aprãw tàmxwỳ tàmxwỳ mã, menquêtti kôt pjê ata to awjahkre. Ne pê me cupê mehcahkriat, ne ajco pryre kà te ikre ata kam mehkrĩ.
10 Ampo na? Nee mã ampo na nare. Pahpãm te me cumã amji ton xà ataa na, cute me cumã jũ caxuw krĩ jamre nare ata xãm na, cormã me hikaj.
11 Pê Aprãw ramã ihweaj to ihwej, ne hĩxi pê Xarakwỳj ihkre crà cakrô, pê Pahpãm ahnaa cumã ihkra to awjahkre. Mã cute cumã ihkra tohũjahkre xà ata na amji mã to ihhimpej, ne ihtỳj hikaj, mã cumã ihkra pê Ixac pỳm.
12 Hõ, pê hũmre pyxit peaj ne ajmãr ty, ata kôt ri mehtàmxwỳ jàhtôa to hàhtô, ne me cupê caxêre jàhtô pyràac, nare, me cupêcôxwa tohkà na pjênxôm carôt jàhtô pyràac.
13 Ne ite me amã me panquêtjê jarẽn xà kôt harẽn itajê ri, Pahpãm to amji mã mehhimpej to me ipa ita kam amehtyc. Ne nee cute me Pahpãm te me cumã ampo to hũjahkre xà atajê cwỳr nare kamamehtyc. Ne cute cormã me ampo cunea to Pahpãm te me cumã hũjahkre ata jarẽn par, ne nee cormã me hõmpun pej nare kam, ihhêj ne ramã cute me hõmpun, na ri ame hakry, ne ihtỳj ahna me amji jarẽn to me hane he:
— He nee me ipê pjê ita tekjê nare, ne me ipê mehcahkrit, na wa pjê nõa pĩn icator, ne ma ihnõ ita wỳr mõ — hane.
14 Ne cute me amji jarẽn xà ita kôt, cu ramã pahte me hõ pjêa japên na me hahkre pej.
15 Quê rỳ mã pjê pĩn me cator ata wỳr hacpỹa mã me amji jaxà, ne nee hipêr hacpỹ mã cute me amji jaxàr xà to ame amji kam hapac nare.
16 Ne quêt ame côjkwa jõ pjê impejti ata pit japên to me ipa. Ne atajê pê Pahpãm kra impeaj, na ri nee me hũ na ihpahàm nare. Na ri ramã cute me cumã côjkwa kam mehkrĩ xà ata ton.
17-18 Pê Pahpãm Aprãw mã ihkra pê Ixac to hũjahkre to hane he:
— Ixac pê akra ita cucwa kam, quê ha amã me atàmxwỳ hàhtôa to hàhtô — hane. Pê Pahpãm Aprãw mã hajỹr cakrô, cute ihkra pê Ixac na capi prãmteihcuran na cumã harkwa. Mã Pahpãm jarkwa kôt ramã cute ihkra curan ne to caxàr xàa kam, cute amji mã harkwa to:
19 — Wa ha ihcura, quê ha ihtỳj Pahpãm hacpỹa mã ikra to ihtĩr — hajỹr. Mã Pahpãm te cute ihkra curan tête huwahi xà ata pê ihhêj rũm ramãhacpỹa mã ihtĩr.
20 Pê Ixac xwỳ hanea ne ajco Pahpãm to amji mã ihhimpej to ipa, na pê Pahpãm mã mehkra pê Jaco me Exaw tàmxwỳ te amji to me ipijapar xà na mehcajrẽn, ne me cumã:
— Quê ha Pahpãm ihtỳj jũ caxuw ato impej cati, me atàmxwỳ mea mã — hajỹr.
21 Pê Jaco hanea ne ajco Pahpãm to amji mã ihhimpej to ipa, na ri ramã ihtyc xàa kam, cute Pahpãm mã mehtàmxwỳ pê Joje xwỳ kra pijakrut atajê cajrẽn, ne ihtỳj cormã hàwkô ata na cute amji cajparne xa ne Pahpãm pejti na harẽn, ne to amji kampa.
22 Pê hanea ne Joje ajco Pahpãm to amji mã ihhimpej to ipa, ne ihtyc xà wỳr, mehkjêjê pê Ixaher catêjê te Ejit jõ pjê pê me cator na me cumã harẽ. Ne cute me cumã harkwa hyr, mãr quê jũ caxuw hacpỹ mã me amjijaxàr xà wỳr mehhi to mõ, ne ma Pahpãm te me cumã pjê to hũjahkre xà ata ri me harêt.
23 Pê Mojxe xwỳ pãm me inxi hanea ne ajco Pahpãm to amji mã mehhimpej to me ipa. Na pê Mojxe cumã ihpỳm, pê Paro xwỳ pê pahhi me ahkrare curan na me cumã harkwa ata kaj na, me to amxu. Ne pê ihkra ata impeaj to impej, pê me hõmpu, na pê nee amji mã me pahhi atacupa nare, ne cama me to ipimxur to putwrỳ incrê.
Pê Mojxe Ixaher catêjê mã cute mehkritxwỳ curan na to hahkre
24 Pê Mojxe hanea ne ajco Pahpãm to amji mã ihhimpej to ipa, ne ihkà, ne ma apu cute me, cupê Paro kra cahãj ata kra na me harẽn na ihcaca.
25 Na pê cute ampo kên cunea to amji cajpuaw to ipa xà to hatujre xà ata kam pê hicu, ne quêt ma mehkwỳ mã hàr na amji to. Ne me cumã axà ne me cahê na amji pupun xà kêanre to amji pupun to ipa.
26 Ne pê amji mã:
— He quê ha ihtỳj jũ caxuw Pahpãm ite amji pupun xàita jahpan xà na hirôa pê imã amgõ. Na wa ha Ejitjõ pjê jàhcukrêj pejti itajêcunea to amji pê ijapac kêt. Ne Pahpãm te me pamã cute ampo kên cunea pê me pahpytàr catê to hũjahkre ata cwỳrjapê, wa ha cute ame icurê catêjêkam amji pupun to kêanre ne — hane.
27 Pê Mojxe ajco amji mã Pahpãm to ihhimpej to ipa, na pê nee cumã pahhi pê Paro ata te kam incryc xà ata cupa nare, na pê ihtỳj Ejit jõ pjê pê mehkwỳ to cato, ne ma me to mõ. Ne me to mõr xà ata kam, ihtỳjihhêj ne, por me Pahpãm pupun xà nare ata pupun to me mõ. Na pê kypê me cumã hũcanãr nare.
28 Ne pê Pahpãm to amji mã ihhimpej, na pê me Hakrenxà jõ amji kĩn to Pahpãm jarkwa kôt mehkwỳ mã ihhimpej, ne to hahkre. Ne amji kĩn ata kam, pê ikre cunea kôt cute ame carà cahàcrekra pê mehkritxwỳ caprô jaxwỳr na me cumã harkwa ta. Mãr quê ame haxwỳ, quê Pahpãm pĩn ajpên me ahkrare cakônĩ curan catê ata tẽ, ne mehkritxwỳ caprô pupu, nenee mehkwỳ pê Ixaher catêjê nõ pê ihkra curan nare.
29 Ne pê Ixaher catêjê hanea ne Pahpãm to amji mã mehhimpej, na pê ma Côxwatepti cajpuw amcràre ata na me rê. Pê Ejit catêjê me cuxà ahna me irêr prãm cakrô, pê cama cô me hipej.
30 Pê Ixaher catêjê Pahpãm to amji mã mehhimpej, na pê Cana jõ pjê mã me hàr xà ata kam, ihtỳj Pahpãm jarkwa kôt Krĩcuxwati ata pu na me ipijarõa to me amcro to xet, me ajkaam pê krĩ tête kwỳc ata cunea apu ajxwỳ, ne pê kam mehkrĩ catêjê atajê cunea jipej tu.
31 Pê Rapekwỳj xwỳ pê mempijapit xyre ata, ihtỳj Pahpãm to amji mã ihhimpej, na pê Ixaher catêjê te krĩ pupun catêjê atajê na amji capa, pê nee cute me Pahpãm par nare atajê kôt me cahãj ata curan nare.
Pê menquêtjê kwỳ te Pahpãm to amji mã me hajỹr atajê, ihtỳj me ampo cwa
32 Hamre ramã ite me amã ijũjarẽn xà ita jamre. Ampo na? He ampeaj kam cute mam Pahpãm to amji mã mehhimpej catêjê jàhtô, na wa rỳ mã me amã Gitõ me, Parac me, Xãnxã me, Jeta me, Tawi me, Xamer me, Pahpãm jarkwa to mehcakôc catêjê kwỳ jarẽ.
33 Ne itajê pê hanea ne ajco Pahpãm to amji mã mehhimpej to me ipa, na pê krĩxàre kwỳ jõ pjê kôt ajco me ajpu ne me hipej, ne amji mã me hõ pjê atajêcunea pytà, ne me to hõ tekjê. Ne pê catyt kam, mehkrã kên me, mempej catêjê atajê to ajpẽn pê me ajcokjê. Ne pê ihtỳj Pahpãm te me cumã ampo to hũjahkre atajê incwa, ne ihtỳj amji tête me ropcahàcti jõkre hôhti ata jarkwa to me ajpỳ.
34 Ne pê hanea ne mehkwỳ, cuhy kam cute me irẽn xà ata kam, ihtỳj cuhy pôc kam ame ipa, ne nee jũm caxàr nare. Ne pê hanea ne mehkwỳ, wapo xwahhihti to cute mehcuran xà ata pê me amji pytà, na pê neeme jũm curan nare. Ne pê mehkwỳ peacre atajê, carôt tỳj mã me axà. Pê mehkwỳ mã me hàprê xà caxuw ampeaj kam me carôt tỳj cati, ne pê ihtỳj krĩxàre jõ krãhtare jàhtôa ne ajco me tohjê.
35 Ne pê pyjê kwỳ te ramã mehkjêjê tyc atajê tĩar na hacpỹ mã amji mã me huwahi.
Catyt kam Pahpãm kôt ame ipa atajê, ihtỳj me amji pupun xà to kêanre
Ne pê mehkwỳ hanea ne Pahpãm to amji mã mehhimpej cakrô, ihtỳj cute amji pupun xà kêanre to me amji pupu. Ne ma me amji mã hikran caca, ne ihtỳj Pahpãm cwỳrjapêamji na me curê xwỳn jamã, mã me cumã mehkàj xà ton to me ipa ita to mehcura. Ne pê ajco mehkàj xà na me amji pupun xà ata kam me amji mã:
— Quê ha ihtỳj Pahpãm ite incwỳrjapê amji pupun xà kêanre to amji pupun xà ata jahpan xà na, hacpỹa mã cute ito itĩr xà ata kam, hirôa pê imã amgõ — hane.
36 Ne pê mehkwỳ na cute me xwỳ xà kêanre xà atajê to me cumã ihpahàm catia to, ne mehcahhyr xà kêanre to mehcahhy. Ne wakỳre te mehcajpre xà to mehkwỳ cajpre, ne me hacjên xà kam me hacjê.
37 Ne pê kẽn to mehkwỳ capê ne to mehcura. Ne pĩ cokjêr xà to mehkwỳ tĩar kam mehcokjê. Ne pê wapo xwahhihti to mehkwỳ cura. Ne pê mehkwỳ pê hamreare, pê me curê xwỳn cama ame hahêr to mehcapôrto me ipa, ne ame to kêanre, pê ajmãr mehcakrô ame ipa, ne prykà to pit mã me amji pro to me ipa.
38 Ne kẽn me põti kam me hamreare ata kam me acto ne ihtỳj kẽn kre me, pjê kre kam ajco amehkrĩ. Ne Pahpãm mã pjê kam mehcunea mehkrĩ atajê jirôa pê quêt mempeaj to mempej.
39 Ne atajê cunea, pê ihtỳj Pahpãm to amji mã mehhimpej to me ipa, na pê Pahpãm mã mempej pit, pê me ahna amji capa cakrô, pê nee cormã cute me, por Pahpãm te me cumã ampo to hũjahkre ata cwỳr nare.
40 Ampo na? Pahpãm mã cormã cute me ampo cwỳr xà ata jõr xà nare, quê ha cormã me to me pajikaj, mãr cu ajkaam, Pahpãm te ihcuneana me pahto impej prãmte me pamãhàmjõr xà impejti catia ata to me pamã amgõ.