18
Babilonia marca ushacänanpä cangan
1 Tsaypitanam ricargä jucna puëdeg angel chipipirrä ciëlupita uraycämogta. Tsay angelpa chipipiyninga entëru patsatam atsicyapargan.
2 Tsaynö uraycämungantam gayaraypa caynö nimurgan:
“¡Ushacashganam, ushacashganam Babilonia marca!
Cananga supaycunallanam tsaychöga taycäyan.
Wiscurcuna, condorcuna, tucucunallanam jiruruycäyan.
3 Babiloniachö tärag runacuna mana pengacuypa jutsata rurayanganta ricarmi waquin runacunapis jutsa rurayman chäyashga.
Babilonia runacunawan yätsinacurmi maytsay nacioncunapa mandagnincunapis Tayta Diospa contran imaycatapis rurayashga.
Tsay runacuna imaycatapis ricayangan cagtaga rantiyaptinmi negocianticunapis pasaypa rïcuyäyashga” nir.
4 Tsaynö angel nisquiptinnam wiyargä Tayta Dios ciëlupita caynö nimogta:
“Nogaman criyicamog cagcunaga, tsay marcapita jucläman aywacuyay.
Jutsa ruraychö cawagcunaman ama tacucäyaynatsu.
Aywacuyaptiquega paycunaman castïguta cachaptïpis gamcunataga manam imanayäshunquitsu.
5 Paycunaga jutsallachömi cawaycäyan.
Llapan mana alli ruraynincunatam noga Diosniquicuna musyaycä.
6 Jutsata rurayanganpita paycunaga alläpam castïguta chasquiyanga.
Waquin runacunata ñacatsiyanganpita paycunaga masran ñacayanga.
7 Imaycachöpis munayninchö runa tucur cayanganpitam pasaypa castigacashga cayanga.
Paycuna shonguncunachöga caynömi yarpäyan:
‘Nogaga imaycawanpis munayyogmi cä.
Nogaga imaypis manam wactsayäshätsu.
Y manam imaypis ñacashätsu’ nir.
8 Tsaynö cayanganpitam pasaypa ñacaycuna paycunaman changa.
Wanuypis, ñacaypis, y mallagaypis mana yarpashgatam changa.
Imaycawanpis munayyog Diosniquicuna carmi tsay marcata ninawan rupatsir ushacätsishä”.
9 Ciëlupita Tayta Dios tsay nimungannömi Babilonia marcapita goshtay sharcogta ricar maytsay nacioncunapa mandagnin reycunapis llaquicurnin wagayanga. Tsay mandacogcunaga Babilonia runacunawan goricar Tayta Diosta mana cäsucurmi jutsallachö cawacuyashga.
10 Tsay ushacanganta ricarmi carullapita sicsicyarrä ricaräyanga caynö nir:
“¡Allau, Babilonia marca rupar ushacasquin!
¡Tagay marcaga imaycawan munayyog marcam cargan!
¡Cananga mana yarpashgatam ushacasquillan!” nir.
11 Tsay marca ushacangantaga llapan negocianticunapis wagayangam. Manam canganatsu negociuncunata pipis rantiyänanpä.
12 Tsay marcamanga ranticuyänanpä apayagmi örutapis, gellëtapis, perlastapis, cuyayllapä chipipeg rumicunatapis, lïnupita sëdapita tëlacunatapis, y tiñishga chaniyog granäti y puca tëlacunatapis. Nircur apayagmi tucuyläya fïnu tablacunatapis, marfilpita, broncipita, jërrupita, y marmolpita rurashga aläjacunatapis y imaycacunatapis.
13 Tsaynöllam ranticuyänanpäga apayag canëlata, inciensiuta, mirrata, y tucuyläya mucuchag jachacunatapis. Tsaynöllam apayag vïnuta, acëtita, jarinata, trïguta, cargacuna cag ashmacunata, üshacunata, cawallucunata, y cärrucunatapis. Y hasta runacunatapis ranticuyagmi esclävuncunapä.
14 Tsaychömi tsay negocianticuna tsay marcata gayarar niyanga: “¡Tsayläya imayca jananchö cacog marca ushacashganam caycanqui! ¡Rïcu imaycayog cangayquiman alläpa alli röpashga cangayquimanga imaypis mananam cutinquinatsu!” nir.
15 Tsay marcachö pasaypa rïcuyag negocianticunaga marca rupaycanganta ricaycurmi wagarnin carullapita mantsacashga ricaräyanga caynö nir:
16 “¡Allau tsayläya cuyayllapä marca chipyaypanachä ushacasquin!
Tagay marcaga imanötä cuyayllapä caycurgan, imayca fïnu granäti y puca tëlacunapita rurashga röpan jatipäcushga warminörä.
Örupita, perlaspita, y cuyayllapä chipipeg rumicunapita aläjacunawan adornashga warminömi caycurgan.
17 Tsayläya imayca riquëzancuna ¿maypatä aywasquishga?”
Büqui manijag runacunapis y büquichö llapan arogcunapis carullapitam ricaraycar quëdacuyanga.
18 Tsay marcapita goshtay sharcogta ricarmi pasaypa wagayanga: “Manam may marcapis cashgatsu tagay marcanö alläpa cag alli marcaga” nir.
19 Pasaypa wagar gayararmi allpatapis junishta jitayanga umancunaman caynö nir:
“¡Allau, allau tsayläya cuyay alli marca!
Tagay marcachömi büquiyogcunapis y llapan negocianticunapis rïcuyäyashga.
Cananga wapmi tsay marca rupar ushacasquishga” nir.
20 Gloriachö cagcuna, cushicuyay cay Babilonia marcata Tayta Dios ushacätsinganpita.
Tayta Diospa apostolnincuna, profëtancuna, y payman llapan criyicogcunapis cushicuyay.
¡Gamcunata imaycata rurar ñacatsiyäshungayquipitam Tayta Dios tsay marcata ushacätsishga!
21 Tsaynam juc puëdeg angel mulinutanö rumita jayarircur lamarman jitariycurgan caynö nir:
“Babilonia marcachö tagcuna,
cay rumita illacagpä jitangänöllam gamcunatapis Tayta Dios illacätsiyäshunqui.
Cananpitaga imaypis manam runacuna ricayäshunquinatsu.
22 Manam imaypis wiyayanganatsu arpata, pinculluta, ni cornëtatapis cällicunachö tucaycäyagta.
Tsaynömi cay marcachöga ima runapis canganatsu ima aruytapis aruyänanpä, ni mulinuta jirurutsiyänanpäpis.
23 Pipis manana captin manam chiuchicunapis atsicyanganatsu.
Y mananam casacuy fiestapis canganatsu.
Babilonia marcachö negocianticuna gellënincunawan pasaypa poderösu tucuyaptinpis tsaynömi marcancuna ushacanga.
Brüjucuna carnin maytsay runacunata engañayanganpitam tsaynö ushacanga.
24 Tagay Babilonia runacunam Tayta Diospa willacognin profëtacunata y maytsaychöpis payman criyicogcunata wanutsiyashga. Tsaynö cayanganpitam ushacayman chäyanga”.