4
Tarpu runamanta yuyachina kwintuwa Jesus yachachiskamanta
(Mt. 13.1-9; Lc. 8.4-8)
Kutillata Jesus Galilea kucha patapi yachachinkapa kallaripi achka runakuna chaypi munturinakurka. Chasnapi Jesus shu boti ukuma yaykurka. Yaku chupinayashtuma wampurisa botipi tiyarisa yaku patapi sakiriska runakunata yachachirka. Paykunata achka yuyachina kwintukunawa unayta yachachirka. Chasna yachachiraskapi rimarka:
—¡Kasilla tukusa alita uyaychi! Muyukunawa imasna pasanamanta yuyarichi. Shu runa chakrama tarpunkapa rirka. Shitasa tarpupi mayka muyukuna ñampipi urmanakurka. Chakrapi allpata ñutusa tikrachirka. Ranti ñampipi urmaska muyukunata pishkukuna shamusa mikunakurka. Mayka muyukunaka ansalla allpayu rumi tiyaskapi urmanakurka. Chay muyukuna mana yapa allpa ukupi kasa utkalla wiñanakurka. Ranti intiwa chay wiñaska muyukuna mana alita ankuyaska kasa illakta chakirinakurka. Shu muyukunaka urmanakurka kashayu kiwapa muyukuna tiyaska allpapi, kashayu kiwapa muyukuna tiyaska allpapi. Kiwa ali muyuwa parihu wiñasa chay ali tarpu wiñaskata tapasa wañuchirka. Chayrayku chay tarpukuna mana aparinakurka. Shu muyukunaka ali allpapi urmanakurka. Suma wiñanakurka, achkata aparinakurka. Mayka muyumanta wiñasa kinsa chunka muyuta aparinakurka, maykamanta sukta chunka muyuta, maykamanta shu pacha muyuta wankupi aparinakurka.—
Jesus rimasa katirka:
—Kankuna shutipa uyanata munasaka yachaychi imatami rimanayani.—
Imarayku yuyachina kwintukunallawa yachachin Jesus rimaskamanta
(Mt. 13.10-17; Lc. 8.9-10)
10 Jesus yachachiskata uya runakunamanta achka rinakuskawasha maykankunalla sakirinakurka. Chay sakiriska runakuna, Jesus yachachiskata katikamakunapas Jesusta mayayasa tapunakurka:
—Kan yuyachina kwintuwa yachachiska imatami rimanayan.—
11 Chasna tapunakupi Jesus kutiparka:
—Kankunallata Dios paypa shunku ukupi kaska yuyayta riksichirka, imasna pay kay allpapi runakunata amuyanka. Dios paykunata amuyankapa mana munakama runakunarayku ranti mana pasakta yuyachina kwintukunallawa yachachirani. 12 Chasna ñuka yachachipi mana pasakta yuyachina kwintukunallawa runakunawa tukunka imasna Dios ñupa uras killkachiska kasna:
Kay runakuna ñuka ruranakunata rikunakusapas
chaywa ñuka rikuchinayaskata mana yachanakunchu.
Ñuka yachachiskata uyanakusapas
mana yachanakunchu imamantami rimarani.
Paykuna yachanakunma karka
hucha ruranata sakisa ñukata uyasa kawsa runakuna tukunakunma karka.
Chasna ñukawa aylluyasa
huchamanta pichay tukunakunma karka— nisa Dios ñupa uras rimarka.
Muyumanta yuyachina kwintuwa yachachinayaskata Jesus rimaskamanta
(Mt. 13.18-23; Lc. 8.11-15)
13 Jesus muyukunamanta yuyachina kwintuwa yachachinayaskamanta tapukama runakunata rimarka:
—Kankuna muyumanta yuyachina kwintuwa ñuka yachachiskata manachu yachankichi. Chasna kapi mana ushankichimi yachanata shu laya yuyachina kwintukuna yachachinayaskata. 14 Muyumanta yuyachina kwintuwa kasnami ñuka rimani: Diospa shimita yachachikama runa chay kwintuwa yuyachiska shitasa tarpukama runashinami kan. 15 Chay kwintuwa yuyachiska ñampipi urmaska muyukuna kasnami yuyachin: Maykan runakuna Diospa shimita uyanakun. Uyaskallapita supaykunapa apu shamusa chay shimita runakunapa yuyaymanta anchuchisa kunkachin. 16 Chay kwintuwa yuyachiska ansalla allpayu rumi tiyaskapi urmaska muyukuna kasnami yuyachin: Maykan runakuna kushiyasa Diospa shimita uyanakun. 17 Chasna kallapita paykunapa shunku ukupi mana yaykunata sakinakunchu. Shukratulla chay shimiwa sinchikunakun. Diosta kasunata kallariskarayku llaki shamupi, ñakachi tukunakupi, mana ña sinchikunakunchu. 18 Chay kwintuwa yuyachiska kashayu kiwapa muyukuna tiyaska allpapi urmaska muyukuna kasnami yuyachin: Maykan runakuna Diospa shimita uyanakun. 19 Chaywasha ranti kay pachapi kawsankapa munaskakunata yapa yuyarisa kawsanakun, kullkiyu tukunata yapa munasa, tukuy laya ruranakunata kamanayasa kawsanakun. Chasna tukusa chay Diospa shimi uyaskata kunkachinakun. Chay shimika yanka niskami kanka. 20 Chay kwintuwa ali allpapi urmaska muyukuna kasnami yuyachin: Maykan runakunaka Diospa shimita uyasa alita yuyaypi wakachinakun. Diosta kasusa alikunata rasa kawsakuna tukunakun. Tarpu alita aparishina kanakun, maykankuna kinsa chunka muyuta aparishina, maykankuna sukta chunka muyuta aparishina, maykankuna shu pacha muyuta aparishina kanakunmi.—
Jesus bilamanta yuyachina kwintuwa yachachiskamanta
(Lc. 8.16-18)
21 Jesus kasna kwintasa yachachinata katirka:
—Kankuna bilata hapichisa mala ukupi churankichimachu. Tiyarina ukupi churankichimachu. Manami ukupi churanchi. Ranti hawa partipi churanchimi pasakta rikuchinkapa. 22 Imasna bila pasakta rikuchin chasnallata runakuna pakalla ruraskakuna pasakta riksi tukuska kanakunka. Tukuy pakalla rimaskataka tukuykuna pasakta yachanakunka. 23 Kankuna shutipa uyanata munasaka yachaychi imatami rimanayani.—
24 Chasnallata Jesus rimarka:
—Ali yuyaywa uyaychi tukuy kwintay tukuskata. Kankuna ali yuyaywa uyaska tuputa Dios kankunata yuyayta kusa yanapanka, chay tupumanta yaliktapas kunka. 25 Ña yuyayta chari runa yali achka yuyaywa yanapay tukunka. Mana yapa yuyayta chari runa ansa yuyay chariskatapas kichuy tukunka.—
Imasna Dios runakunata amuyana kay allpapi Jesus wiña muyumanta yuyachina kwintuwa yachachiskamanta
26 Jesus shuk yuyachina kwintuwa yachachirka:
—Dios kay allpapi runakunata amuyankapa rahun tarpu runa muyuta shitasa tarpunashina: Tarpu runa muyuta shitasa tarpukrima. 27 Chay muyukuna tukyarisa wiñanakunma. Mana imananchu puncha kapi tuta kapipas wiñanma. Tarpu runa puñupipas trabahapipas chay muyukuna wiñanakunllami. Tarpu runa mana yachapipas imasna wiñan, amu kunkaylla kapipas muyukuna wiñanakunmi. 28 Allpaka pay kikinllata muyuta wiñachisa aparichinmi. Ñupara panka llukshin, washa wiñan, washa tuktun, washa wayuyan. 29 Wayu pukurapi amu ña pallanmi.—
Imasna Dios runakunata amuyana kay allpapi Jesus mostaza muyumanta yuyachina kwintuwa yachachiskamanta
(Mt. 13.31-32; Lc. 13.18-19)
30 Jesus kuti shuk yuyachina kwintuwa yachachirka:
—Imata nisa riksichisha Dios kay allpapi imasna runakunata amuyanka. Kay kwintuwa kankunata yuyachisa riksichisha. 31-32 Mostaza niska muyumanta yuyarichi. Tukuy muyukunamanta yali ichilla kan. Chasna ichillashitu tarpuy tukusapas wiñasa tukuy kiwakunamanta yali hawa tukun. Ichilla sacha kaspi yura tukusa pishkukuna llantuta maskasa paypa ramakunapi samanakun.—
33 Chay laya yuyachina kwintukunawa Jesus paywa kaska runakunata yachachirarka, paykuna uyanata ushaskakamalla. 34 Kwintukunallawa tukuyta yuyachisa rima karka. Ranti washa pay yachachiskata katikama runakunallawa sakirisa kwintukunawa yuyachinayaskata pasakta kwintarka.
Jesus rimasa sinchi ulasyaskata wayratapas pasachiskamanta
(Mt. 8.23-27; Lc. 8.22-25)
35 Jesus runakunata kwintukunawa yuyachisa yachachiska chishillapita ña tutayaraskapi pay yachachiskata katikamakunata nirka:
—Hakuychi kucha chimpa partima.—
36 Jesus rimaskata uyasa pay yachachiskata katikamakuna paykunawa munturiska runakunata sakinakurka. Jesus tiyariska botillapita payta pushanakurka. Maykan runakuna karan shu botipi paykunawa parihu rinakurka. 37 Ña chimparaskapi sinchi wayra kallarirka. Hatun ulaskuna hatarinakurka. Yaku sinchita waktarisa botipi yaykurka. Ñalla pampariranakurka. 38 Chasnapi Jesus boti sikipi sawnapi kunkaylla puñurarka. Pay yachachiskata katikamakuna yapa manchaywa kasa Jesusta kawsachikrinakurka. Kaparisa rimanakurka:
—¡Yachachikama, pampariranchimi! Ñukanchi chinkarinamanta kanta manachu llakinayan.—
39 Jesus kawsarisa wayrata ulaskunatapas sinchita rimarka:
—¡Pasarichi!—
Chasna rimaskallapi wayra ulaskunapas pasarinakurka. Chunlla tukurka. 40 Jesus chasnapi pay yachachiskata katikamakunata nirka:
—Imaraykuta manchaywa kahunkichi. Chayra manachu ñukawa sinchikunkichi.—
41 Paykunapura yapa mancharisa rimarinakurka:
—Manapacha, pita kan kay runa. Wayra yakupas payta uyanakunmi.—