15
Jesus Pilatopa ñupapi kaskamanta
(Mt. 27.1-2; Lc. 23.1-5; Jn. 18.28-38)
1 Punchayamuraskapi tukuy ñukanchi Israel runakunapa apukuna Jesuswa imana ruranata kwintariranakurka. Kanakurka: Pakrikunapa apukuna, ñukanchi Israel runakunapa kamachi rukukuna, Dios ñupa uras killkachiska killkata kutillata killkakamakuna, shu apukunapas. Ñukanchi Israel runakuna Roma runakunapapi amuyay tukuska kapi ñukanchi apukuna shu yuyayllawa tukusa Jesusta watasa Romamanta apu Pilatopama pushanakurka.
2 Chayma paktachinakupi Pilato Jesusta tapurka:
—Kan Israel runakunapa hatun apuchu kanki.—
Jesus kutiparka:
—Ari, kan shutipa rimanki.—
3-4 Pakrikunapa apukuna Jesusta achkata hawachisa rimanakupi Pilato kutillata Jesusta tapurka:
—Manachu sinchikusa kutipanki. Yuyari imasna kanta achkata hawachisa rimanakunmi— nisa.
5 Ranti Jesus chunlla uyarka, mana shu shimillatapas rimarkachu. Mana imata rimapi Pilato mana yacharkachu imata yuyarisa rimanata.
—Jesusta kruspi klabasa wañuchi— nisa kaparinakuskamanta
(Mt. 27.15-31; Lc. 23.13-25; Jn. 18.38—19.16)
6 Paskwa hishta punchakunapi Pilato shu mana alita rurakuna tapana wasipi tapara runata kachari karka, ñukanchi Israel runakuna mañaska runata.
7 Chay uras shu runa tapara Barrabas shutiyu tiyarka. Roma runakunawa piñari bulamanta kasa, chay piñari bulamantalla shuk runakunawa parihu tapay tukuska kanakurka. Romamanta aputa hichunayasa paypa suldarukunawa makarinakuskapi Barrabas shuk runata wañuchirka. Chayrayku tapay tukurka.
8 Barrabas chasna tapaska kahuskapi Israel runakuna apu Pilatopama risa mañanakurka:
—Karan wata kan raskata ruray. Shu tapara runata kachari— nisa.
9-10 Apu Pilato yacharka pakrikunapa apukuna paykunalla apu kanayasa Jesuswa piñariska kanakuskata. Chasna piñariskarayku Jesusta paypama pushamunakuskata yacharka. Chayrayku mañakama runakunata tapurka:
—Kay Jesustachu kacharisha. Munankichichu kankuna —ñukanchi Israel runakunapa hatun apu— niska runata ñuka kacharinkapa.—
11 Ranti pakrikunapa apukuna chay munturiska runakunata rimanakurka —Barrabasta kachari— nisa rimanakunkapa.
12 Chasnapi Pilato chay runakunata tapurka:
—Imata ñuka rankapa munankichi chay kankuna —ñukanchi Israel runakunapa hatun apu— niska runata.
13 Tapupi sinchita kaparinakurka:
—Payta kruspi klabasa wañuchi— nisa.
14 Chasna kaparinakupi tapurka:
—Ima mana alikunata rarka.—
Paykuna astawa sinchita kaparisa rimanakurka:
—Payta kruspi klabasa wañuchi— nisa.
15 Apu Pilato runakunata kushiyachinayasa Barrabasta kacharirka. Jesusta liwachinkapa mantarka. Suldarukuna Jesusta liwachiskawasha apu Pilato paykunata rimarka:
—Chay runata kruspi klabasa wañuchichi— nisa.
Jesusta pukllaskashina ruranakuskamanta
(Mt. 27.27-31; Lc. 23.11-12)
16 Suldarukuna Jesusta hapisa apu Pilatopa wasikunawa muyukta kaska chusha pampama pushanakurka. Paykunapa suldarukuna bulamanta tukuy suldarukunata kayachisa muntuchinakurka.
17 Sani bali churanata Jesusta churachinakurka hatun apu churarina kaskatashina. Kurimanta tawasampata hatun aputa churachinashina kashawa awaskata paypa umapi churanakurka.
18 Washa payta pukllaskashina kaparisa rimaranakurka:
—Israel runakunapa hatun apu, ali shamuska kanki— nisa.
19 Chasnapi kaspiwa paypa umapi waktasa payta tyukaranakurka. Payta balichiskashina ñupapi kunkurinakurka.
20 Chasna payta pukllachiskashina ruraskawasha sani churanata churachiskata llatanachisa kuti kikin churanata churachinakurka. Chaywasha payta kruspi klabasa wañuchinkapa pushanakurka.
Cirene llakta runamanta
(Mt. 27.32; Lc. 23.26)
21 Jesusta kruspi shayachisa wañuchinkapa pushanakupi Cirene llaktamanta runa Simon shutiyuta tupanakurka. Payka Alejandropa, Rufopa yaya karka. Chakramanta shamuraskapi Jesuspa krusta aparichinakurka.
22 Jesusta Golgota niskama pushanakurka (Golgota yuyachin “Aya Uma Tullu Urku”).
Jesusta kruspi klabasa shayachisa wañuchinakuskamanta
(Mt. 27.33-44; Lc. 23.27-43; Jn. 19.17-27)
23 Suldarukuna nanayta upayachina mirra niska hampiwa masaska vinuta Jesusta upyachinayasa rikuchinakurka —upyay— nisa. Ranti Jesus mana upyanata munarkachu.
24 Chasnapi payta llatanachiskawasha ña kruspi klabasa shayachinakurka. Paypa churanakunata hapinakurka. Rumikunawa shitasa kamanakurka —pita amuyanka— nisa.
25 Jesusta kruspi klabasa shayachiska uras tutamanta iskun uraspi karka.
26 Paypa kruspi talapa killkara tiyarka —Israel runakunapa hatun apu— nisa. Chay talapata churanakurka imarayku wañuchinakun nisa runakuna yachankapa.
27 Jesuswa parihu kruspi klabasa shayachinakurka ishkay runakunata, wañuchisa purikunata. Karan runata shuk shuk kruspi shayachinakurka, shukta Jesuspa yacha maki partima, shukta Jesuspa lluki maki partima.
28 Chasna ruraskawa Dios ñupa uras killkachiskashina paktarirka. Ñupa uras Dios killkachiskapi kasna nin:
Huchayu runata raskashina payta ruranakurka nisa.
29-30 Kruskuna shayaraska mayata puri runakuna umata kuyuchisa Jesusta pukllachiskashina rimanakurka:
—Kan Diosta mañana wasita urmachikama kasa, chayta kinsa punchapi shayachikama kasa, krusmanta uraykusa kan kikinllata kishpiri— nisa.
31 Pakrikunapa apukuna Dios ñupa uras killkachiska killkata kutillata killkakamakunaynti Jesusmanta asisa paykunapura rimarinakurka:
—Shukunata kishpichirka, ranti pay kikinllata kishpirinata mana ushanchu.
32 Dios mantamuska kishpichi runa kasaka ñukanchi Israel runakunapa hatun apumi, krusmanta uraykuchu, chayta rikusa ñukanchi paywa sinchikunkapa— nisa.
Jesuspa mayapi shuk kruskunapi paywa parihu wañura runakunapas paymanta asisa payta mana alita rimanakurka.
Jesus wañuskamanta
(Mt. 27.45-56; Lc. 23.44-49; Jn. 19.28-30)
33 Jesusta kruspi klabasa shayachinakuskawasha chupi punchamanta chupi chishikama tukuy partipi yanayarka.
34 Chupi chishipi Jesus sinchita kaparirka:
—Eloi, Eloi, lama sabaktani. Chay rimanayan: Ñuka Dioslla, ñuka Dioslla, imaraykuta ñukata hichuwarkanki— nisa.
35 Mayka chaypi kaskakuna rimanakurka:
—Eliasta kayaran— nisa.
36 Chasnapi shu runa kallpa risa llachapata akru vinupi hukuchirka. Pintu puntapi churasa Jesusta upyachinayasa rikuchirka:
—Hakuychi rikushunchi, Elias shamunkachu manachu shamunka payta uraykuchisa kishpichinkapa. Mana imata rasa pay utka wañunkapa chayra chapashunchi— nisa.
37 Chasnapi Jesus sinchita kaparisa wañurka.
38 Chay urasllapita Jerusalenpi Diosta mañana wasipi Dioswa tupana kwartuta harkasa warkura churana hawamanta urayma pasakta likirirka. Chay kwartu kaska kinsa pasay wasikunawa muyukta kaska pampa mayapi ka wasi ukupi.
39 Jesuspa krus shayaraska ñupapi ñawipura suldarukunapa apu shayararka. Jesus imasna wañuskata rikusa rimarka:
—Shutimi kay runa Diospa Churi karka— nisa.
40 Mayka warmikuna karumanta tukuyta rikuranakurka. Shu karka Magdala llaktamanta Maria, shu karka Santiago, Jose shutiyu wawkikunapa mama Maria, shu Salome karka.
41 Chay warmikuna Jesus Galilea allpapi kaska uras payta yanapasa katinakurka. Chaywasha chay warmikuna shuk warmikunawa Jesuswa parihu Jerusalenma shamunakurka.
Jesuspa ayata rumi hutkupi churasa tapanakuskamanta
(Mt. 27.57-61; Lc. 23.50-56; Jn. 19.38-42)
42-43 Jesus wañuskawasha, chay chishillata Jose shutiyu runa apu Pilatopama rirka. Chay chishipi ñukanchi Israel ayllukuna samana puncharayku alichirina kanakurka. Inti yaykuraskapi ña samana kallarirka. Apu Pilatopama paktasa Jose mana manchaskawa Jesuspa ayata mañarka. Jose Arimatea llaktamanta karka, ñukanchi Israel apukuna munturina bulamanta shuk apu karka. —Ali yuyayu apumi— nisa runakuna yuyarinakurka. —Dios kallarichu kay allpapi runakunata amuyankapa— nisa yuyarisa kawsarka.
44 Apu Pilato yuyarirka —Jesus chayra kawsa imachari— nisa.
45 Chayrayku suldarukunapa aputa kayachisa tapurka:
—Jesus shutipa wañuskachu— nisa.
Suldarukunapa apu ari rimapi Pilato Joseta nirka:
—Jesuspa ayata apaylla— nisa.
46 Jose risa ñutu pilluna llachapata rantirka. Washa Jesuspa ayata krusmanta uraykuchisa chay llachapawa pillurka. Sunima allaska rumi wayku hutkupi churarka. Hatun rumita tankasa punkuta taparka.
47 Magdala llaktamanta Maria, Josepa mama Mariapas rikunakurka maypi Jesuspa aya churay tukuskata.