LIBRO 3
73
(SALMOS 73–89)
Tayta Dios alli cashan
Asaf isquirbishan alabansa.
1 Tayta Diosga fiyupa allimi Israelcunapäga,
alli shongu cajcunapäga.
2 Nogami ichanga jucha rurayta yarpaycaräna.
Ichicllanami pishisha jucha rurayman chayanäpaj.
3 Nogaga fiyupami charayta munaparä alli-tucojcuna charashanta.
Fiyu runacuna alliman chayaptin pasaypami chiquiparä.
4 Fiyu runacunaga allimi goyan.
Manami gueshyanpischu.
Chaymi wañuypäpis mana yarpachacunchu.
5 Manami ñacanpischu waquin runacunanöga.
Manami waquinnöga ima ñacaychöpis cashachu.
6 Chaymi alli-tucushanga wallganno camaraycächin.
Mana allita rurashancunapis röpannömi caycan.
7 Mana allita rurananpaj yarpashanga cäranchömi rejsicaycan.
Wera caywanmi ñawinpis ñipchicashallana caycan.
8 Runacunapa washan riman.
Llapan runatami cushipan.
Fiyupa alli-tucushpan paycunaga pitapis mana allita rurayta munarcaycan.
9 Tayta Diospa contranmi riman.
Runacunapapis washantami riman.
10 Chayno captinmi chay fiyu runacunataga alaban.
Ima nishancunatapis riguin.
11 Paycunaga nin: «¿Imanöpataj Diosga musyanga?
¿Imanöpataj janajcho caycäga musyanga?» nir.
12 Chaynömi Tayta Diosta mana rispitajcunaga.
Mana ñacayllapami ima-aycatapis tarin.
13 Noga alli shongu cashäga yangami.
Yangami witicushcä mana allicunapitapis.
14 Chaycunapaj yarpachacurmi nogaga imay örapis llaquicuycä.
Cada tutami ñacä.
15 Noga paycunano yarpashpäga maynami engañäman caran acrashayqui runacunatapis.
16 Yarpachacaycächimashayquitaga llapantami tantiyayta munashcä.
Ichanga nogapaj fiyupa sasami casha.
17 Tayta Diosta rispitana wasiman yaycunäcama manami tantiyashcächu.
Yaycur-rämi paycuna imano ushacänanpaj cashantapis tantiyacushcä.
18 Paycunataga pasaypa llushcamanmi chayachishcanqui.
Chaypitami tangariycunqui quiquincunalla mana alliman chayananpaj.
19 ¡Illajpitami ushacanga paycunaga!
¡Fiyupa mancharirmi ushacanga!
20 Tayta Dios, fiyu runacunataga juc runa suyñushanta gongaycojnömi
pï-maypis gongayconga.
21 Tayta Dios, nogaga fiyupami rabyasha caycarä.
Shongöpis nanayparämi nanaycaran.
22 Pasaypa mana tantiyaj runami cashcä.
¡Ñaupayquichöga caycarä juc animalnömi!
23 Imano captëpis simrimi yanapaycämarayqui.
Derëchu caj maquëpita charirajnömi yan'gaycämarayqui.
24 Willapämashpayquimi sumaj yachachimashcanqui.
Nircurnaga allimi chasquimanquipaj.
25 ¿Pïnëtaj nogapaga syëlucho caycan? ¡Gamllami Tayta!
Yanapaycämaptiquega manami imatapis munächu cay pachachöga.
26 Callpäpis manami cajnönachu.
Chaypis gamllami imaypis yanapaycämanqui.
¡Gamllami nogataga balurta goycämanqui!
27 Gamta gongaycushoj cajcunaga llapanmi illganga.
Mana wiyacushojcunataga illgarachinquipämi.
28 Nogami ichanga Diospa ñaupallancho cawayta munä.
Chay cajmi nogapäga mas alli caycan.
Tayta Dios gammi caycanqui pacacunä.
Chaymi gam rurashayqui cajtaga llapanta willacushaj.