37
Fiyu runacuna imano cashanpis
David isquirbishan alabansa.
Álef
1 Fiyu runacuna-jananga ama rabyacuychu.
Fiyu runacuna charashantapis ama munapaychu.
2 Paycunaga guewa chaquejnöpis rätumi ushacäcun.
Llullu guewa wañuytacäcojnömi ruracäcun.
Bet
3 Allillata rurashpayqui Tayta Diosllaman yäracuy.
Cay pachacho goyashpayqui Tayta Dios munashannölla caway.
4 Cushishalla Tayta Diostaga sirbiy.
Paymi llapan munashayquita tarichishunquipaj.
Guímel
5 Tayta Diospa maquincho cachun bïdayquega.
Payllaman yäracuptiquega yanapäshunquipämi.
6 Chauraga Diosmi allita ruraj cashayquita ricacächenga.
Alli runa cashayquitana pï-maytapis musyachenga.
Dálet
7 Tayta Diospa ñaupanchöga upällalla cacuy.
Pay yanapäshunayquita shuyaray.
Ama rabyapaychu alli cayman chayajcunata,
ni mana allita rurayta yarpajcunatapis.
He
8 Fiyucuna-jananga ama rabyashalla cacuychu.
Rabyaga mana allimanmi chayachishunquipaj.
9 Fiyucunataga Tayta Diosmi illgächenga.
Tayta Diosman yäracojcunallanami alli pachacho cawanga.
Vav
10 Manapis aycällatanami fiyucunaga illganga.
May-jina ashirpis mananami tarinquipänachu.
11 Umildicunami ichanga alli pachacho tiyanga.
Tayta Diosmi jauca goyächenga.
Zayin
12 Fiyucunaga alli runacunata mana alliman chayachiytami yarpan.
Fiyu ñawillanwanmi ricapanpis.
13 Tayta Diosmi ichanga paycunapaj asicun.
Musyaycannami fiyucuna illgänanpaj cashanta.
Jet
14 Fiyucunaga sablinta,
lëchanta, lëcha jitacunanta camaricun
pobricunata, alli runacunata wañuchinanpaj.
15 Ichanga quiquinpa sablillanmi shongupa tucsipaycongapaj.
Lëchancunapis agullashami ricacongapaj.
Tet
16 Aypallata chararpis fiyu runa cananchïpa ruquenga
pobrilla carpis alli runa caymi mas alliga.
17 Fiyucunapataga callpantapis ushajpämi Tayta Dios ushacächenga.
Allicunatanami ichanga yanapanga.
Yod
18 Alli runacunataga Tayta Dios waran-waranmi ricaycan.
Paycunaga chasquengapaj imaypis mana ushacajtami.
19 Llaquicuy junajcunachöpis paycunaga manami pengaycho cangachu.
Muchuy wichanpis paycunapaga micuynin puchu-puchumi caycangapaj.
Caf
20 Fiyucunaga ushajpämi illgangapaj.
Tayta Diosta chiquejcunaga gaushusha jachanömi rupanga.
Goshtaynömi illgacäconga.
Lámed
21 Fiyucunaga ristacurcurpis manami päganchu.
Alli runami ichanga cuyapäcoj cashpan pï-maytapis macyaycun.
22 Tayta Dios bindisyunta goshan cajcunallami alli pachachöga tiyanga.
Pay maldisyunta goshan cajcunami ichanga illganga.
Mem
23 Tayta Diosmi runataga alli caminullapa pushan.
Allilla goyaptin Tayta Diosga cushicunmi.
24 Chay runaga Tayta Dios pushaptinmi
tunirpis jatarenga.
Nun
25 Unay mösu cashä wichanpis, canan auquinna cashäcamapis manami ricashcächu alli runa pishipacaycho goyajtaga.
Ni wamrancunapis manami mañapacur purishachu.
26 Alli runacunaga imaypis cuyapäcunmi.
Chaymi pitapis ristaycun.
Wamrancunapis bindisyunyojmi canga.
Sámej
27 Llutancunataga ama ruraychu. Allillata ruray.
Chauraga Tayta Dios aunishushayqui pachallachömi tiyanquipaj.
28 Tayta Diosga cuyan allita rurajtami.
Pay munashannölla cawajcunataga manami gonganchu.
Juchasapacunatami ichanga illgächin.
Chaynöpami paycunapaga wamrancunapis mana cangachu.
Ayin
29 Alli runacunami ichanga alli pachacho tiyanga.
Chayllachömi imaycamapis goyäconga.
Pe
30 Tayta Diosman yäracoj runaga sumaj yarpachacurcurmi riman.
Alli runaga alli cajllatami parlan.
31 Tayta Dios yachachishallantami yarparan.
Manami mana allimanga chayanchu.
Tsade
32 Fiyu runaga michipaycanmi alli runata wañuchiyta yarpapashpan.
33 Chaypis Tayta Diosga manami camacächengachu fiyu runapa maquinman chayanantaga;
pipis «payga juchayojmi» ninantapis.
Qof
34 Gamga Tayta Diosllaman yäracuy.
Payllata wiyacuy.
Paymi alliman chayachishunquipaj.
Aunishushayqui alli pachatapis goycushunquipaj.
Ñawiquiwanmi ricanquipaj fiyu runacunata illgächejtapis.
Resh
35 Fiyucunataga ricashcä rabyar
fiyupa alli-tucojtami.
Rämasapa jacha tunir may-maypa chayashannömi chayasha.
36 Chayno caycashanpitami illgacäcusha.
Chauraga ashirpis mananami tarishcänachu.
Shin
37 Masqui ricay juchaynaj runata, Dios munashanno goyaj runata.
Chay runaga shamoj watacunacho allillami goyanga.
38 Mana wiyacoj cajcunami ichanga ushajpaj ushacanga.
Fiyucunaga shamoj watacunacho llapanmi illganga.
Tav
39 Alli runacunataga Tayta Diosmi yanapan.
Ñacaycuna caycaptinpis Tayta Diosmi pacan.
40 Tayta Diosmi imanöpapis gueshpichin.
Tayta Diosman yäracuptinmi
fiyucunapitapis salban.