34
Alli cashanpita Tayta Diosta alabana
Davidga Abimelecpa ñaupancho artita rurar löcu-tucuran. Chaymi Abimelec garguran. Chay wichan imanöpis päsashanpitami David isquirbiran cay alabansata.
Álef
1 Tayta Diostaga imay örapis alabaycäshämi.
Shimillächömi alabansacuna caycanga payta alabanäpäga.
Bet
2 Tayta Diospitami fiyupa cushisha caycä.
Umildi runacunapis wiyashpayqui cushicuy.
Guímel
3 Tayta Diosta nogawan iwal agradësicushun.
Munayniyoj Tayta Diosta llapanchi alabashun.
Dálet
4 Ruwacuptë Tayta Diosga wiyamashami.
Chaynöpami salbamasha llapan manchacuycashäpitapis.
He
5 Tayta Diosllaman ricarajcunaga cushishami carcaycan.
Paycunaga imaypis manami pengaycho cangachu.
Sayin
6 Llaquicur gayacuptë Tayta Diosga wiyamashami.
Llapan llaquicuycunapitami jorgamasha.
Jet
7 Tayta Diospa anjilninmi salban chapan Tayta Diosta rispitajcunataga.
Tet
8 Tayta Dios fiyupa alli cashanta musyanayquipaj masqui camay.
Cushishami cawanga payman yäracojcunaga.
Yod
9 Tayta Diosta rispitay pay acrashan cajcunaga.
Payta rispitajcunataga manami imapis pishengachu.
Caf
10 Rïcucunapis pobriyar muchupacarga yarganmi.
Tayta Diosman yäracojcunapaga manami ima-aycanpis pishengachu.
Lámed
11 Wamräcuna, shamuy wiyamänayquipaj.
Tayta Diosta rispitaytami yachachishayqui.
Mem
12 Gamga ¿unaycama cawaytachu munanqui?
¿Cushisha goyaytachu munanqui?
Nun
13 Chauraga llutancunata ama rimaynachu,
ama llullacuynachu.
Sámej
14 Mana allita ama ruraynachu.
Allillatana ruray.
Piwanpis allilla goyay.
Ayin
15 Alli runacunataga Tayta Dios allimi rican.
Mañacushancunatapis wiyanmi.
Pe
16 Mana allita rurajcunapami ichanga Tayta Dios contran caycan.
Paycunataga ushajpämi cay pachapita illgächenga.
Tsade
17 Allillata ruraj runacunataga Tayta Dios yanapanmi.
Ima llaquicuycho caycashanpitapis jorgunmi.
Qof
18 Jucha rurashanpita llaquicuycajcunapa ñaupanchömi caycan Tayta Diosga.
Llaquicuycajcunatapis salbanmi.
Resh
19 Allillata ruraj runacunataga imapis mana allicunarämi chayan.
Chaycunapitaga llapanpitapis Tayta Diosmi salban.
Shin
20 Tayta Diosmi tulluncunatapis rican.
Chaymi juc tullullanpis mana paquengachu.
Tav
21 Fiyu runacunamanga quiquin mana allita rurashallanmi chayan.
Allita ruraj runacunata chiquëga castigashami canga.
22 Tayta Diosga salbanmi payman yäracojcunata.
Manami castigangachu.