111
Ima-aycatapis rurashanpita Diosta alabashan
1 ¡Aleluya! ¡Tayta Diosga alabasha cachun!
Álef
Llapan shongöpami Tayta Diosta alabashaj
Bet
alli runacuna shuntacasha caycashancho,
llapan runacunapa ñaupancho.
Guímel
2 Tayta Dios rurashancunaga fiyupa almiraypämi.
Dálet
Rurashancunata ricaycur almirajcunaga fiyupami cushicun.
He
3 Pay rurashancunaga llapanpis cuyayllapämi.
Vav
Payga imaypis allillatami ruranga.
Zayin
4 Fiyupa almiraypajcunata rurashantaga manami pipis gongangachu.
Jet
Tayta Diosga alli shongumi y cuyapäcojmi.
Tet
5 Payta rispitajcunataga micuyta tarichinmi.
Yod
Conträtuta rurar alli parlacushanta payga imaypis yarparaycanmi.
Caf
6 Acrashan runacunataga ricachiran quiquin Tayta Dios munayninwan rurashantami.
Lámed
Payta mana rispitaj runacunapa chacranta guechurcur acrashan runacunata goycuran.
Mem
7 Dios rurashanga llapanpis allimi, rasun cajmi.
Nun
Paypa mandamintuncunaga rasunpa yäracuypämi.
Sámej
8 Chaycunaga imaycamapis mana ushacajmi caycan.
Ayin
Chay mandamintuncunaga alli cajta ruranapämi rasun cajta cumlinapämi.
Pe
9 Acrashan runacunatami ñacaycajta jorgusha libri cananpaj.
Tsade
Alli parlacushanga para-simrimi canga.
Qof
Tayta Diosga juchaynajmi, fiyupa rispitaypämi.
Resh
10 Rasunpa yachaj canapäga rimëru Tayta Diostami rispitaypaj.
Shin
Tayta Diosta rispitajcunaga alli yarpayniyojmi.
Tav
¡Tayta Diosga imaypis alabashami canga!