10
Yanapänanpaj Diosta mañacushan
Lámed
1 Tayta Dios ¿imanirtaj carullacho cacunqui?
¿Imanirtaj pacacunqui llaquicuycuna cashan öra?
2 Fiyu runacunaga alli-tucushpanmi umildicunata achäquita ashipan.
Chaypis fiyucunaga quiquincunami rurashan togllallacho watacäconga.
3 Fiyu runacunaga quiquincuna alli cashanta yarparmi alabacun.
Yargajcunaga Tayta Diosta manacajman churarmi disprisyan.
4 Chay runacunaga alli-tucur nin:
«Diosga manami canchu.
Piräshi nogata jusgamanman imata rurashätapis» nir.
Chayllatami imay örapis yarparaycan.
5 Imata rurashanchöpis allimi llojshipacun.
Paycunaga jusgacänanpaj cashanta manami yarpanchu.
Chiquinacushantaga manacajmanmi churan.
6 Paycunaga yarpaycan pipis mana alliman mana chayachinantami,
imaypis inrïduman mana chayaytami.
Pe
7 Paycunaga manacajcunatami llullacun, engañacunmi, ashllicunmi.
Shimi puncullanchömi caycan pitapis imatapis ninanpaj.
8 Marca llojshinacho, yaycunacho pacacuycur shuyarpan.
Nircur juchaynajcunataga wañuchin.
Pipis washänanpaj mana cajcunataga watgarcaycan.
Ayin
9 Liyun machaypita ricchacojnörämi,
pacarashanpita pobritaga watgarcaycan.
Chariycärerga garchacarcärir apacun.
10 Umpurcur, ñuquircur,
shuyarpaycaptillannami pipis washänanpaj mana cajcunaga maquinman chayan.
11 Fiyucunaga yarpan «Diosga pobricunata gongaycushami.
Cäranta chapacurcur imaypis mana ricanchu» nir.
Qof
12 ¡Tayta Dios apuray ari!
¡Ama wiyaräcuychu!
¡Pobricunataga ama gongaychu!
13 ¿Imanirtaj fiyucunaga manacajman churashunqui Tayta Dios?
Paycunaga yarpan «imaypis Diosga manami jusgamangachu» nir.
Resh
14 Gamga quiquiquimi ricashcanqui fiyupa mana allita rurashanta.
¡Ricasha carmi, castiganquipaj imano rurashanpitapis!
Gammanmi yäracamun pïninpis mana cajcunaga.
Gamllami wacchacunata yanapanqui.
Shin
15 ¡Fiyucunataga maquintapis paquirgäriy!
¡Llapan mana allita rurashancunapita jusgay!
16 Cay pachachöga Tayta Diosllami imaycamapis ray.
¡Payta mana rispitajcunataga gargongami!
Tav
17 Tayta Dios, umildicuna mañacamushushayquitaga wiyashcanquimi.
Chaymi shacyächir yanapanqui.
18 Wacchacunata, ñacaycajcunataga washar yanapaycuy ari.
Chaura fiyu runacunaga manacaj caycar mananami paycunata mancharachenganachu.