47
Babilonia ushacänanpaj cashan
1 Tayta Diosmi cayno nin:
«Caldeacho caycaj Babilonia jipash allicho jamaraycashayquipita llojshiy.
Allpamanna jamacuy.
Japalla jipash sillunniquipita jatariy.
Pampamanna jamacuy.
Mananami pipis ‹pishi töpay cuyayllapaj jipash› nishunquipänachu.
2 Maraycho tunaywanna machcata agay.
Shucutaraycashayqui bëluyquitapis jorguriyna.
Mayucunata päsanayquipaj falinniquita chegllayquicama jogariy.
Chaynöpa chancayquicunapis alayri ricacanga.
3 Galalla caycajtami pï-maypis ricashunquipaj.
Pengayniquitapis ricachun ari.
Chaynömi sumaj castigashayqui.
Chay castïgupitaga manami pipis gueshpengachu.»
4 Israelcunapa munayniyoj Santo Tayta Diosnin ima-aycapitapis salbacojmi cayno nin:
5 «Caldeacho caycaj Babilonia jipash upällalla jamacuy.
Mananami pipis ‹nasyuncunapa mandajnin rayna› nishunquipänachu.
Chacajmanna aywacuy.
6 Acrashä runacunapämi rabyacurcurä.
Chaymi cuyashä nasyun runacunataga pengayman churarä.
Chaynöpami gam Babiloniapa maquiquiman cachaycurä.
Chaura paycunataga manami cuyapashcanquichu.
Auquincunatapis fiyupa lasaj yüguta matancapajnömi ñacachishcanqui.
7 ‹Imaycamapis raynallami cashaj› nirayqui.
Ichanga noga ruranäpaj cashanta manami yarpashcanquichu.
Imano ushacänayquipaj cashantapis manami musyashcanquichu.
8 «Chaypita cananga wiyay Babilonia.
Fiyupa cuyayllapajcunallata cuyaj warmimi cashcanqui.
Mana yarpachacuypami mandanayqui sillunniquicho jamaraycanqui.
Shongullayquicho niycanqui:
‹Manami pipis noganöga canchu.
Nogaga manami biyüdapis quëdashächu.
Manami wawaynajpis quëdashächu› nir.
9 Ichanga illajpita juc junajllami disigrasyacuna chayashunquipaj:
Wawaynajmi, biyüdami quëdanquipaj.
Chay-jina brüju ruraj cashayquipis,
majiquëru cashayquipis manami salbashunquipächu.
10 Mana allicunata rurashpayquipis manami imatapis gocushcanquichu.
‹Pipis manami ricamanchu› nirmi yarparayqui.
Quiquiqui musyaj-yachaj cayniquimi engañashurayqui.
Shongullayquicho yarpashpayqui nirayqui:
‹Manami pipis noganöga canchu› nir.
11 Gammanga fiyupa disigrasyami chayamoj-aywan.
Chay disigrasya imay cananpaj cashantapis manami musyanquipächu.
Fiyupa mana alli chayashunayquipaj cajpitaga manami imanöpapis gueshpinquipächu.
Mana yarpashayqui fiyupa mana allicunami illajpita chayashunquipaj.
12 «Brüju rurayta yachashayquita mä sïguir ruracuycay ari.
Chaytaga yachacurayqui wamra-jipash cashayquipita-pachami.
Chaycuna mä imallapäga allichush canga.
Chaycunata ruraptiqui mä runacuna manchacushunquichush.
13 Willapäshojcunaga aypallami casha.
Asta yamacänayquicamami casha.
¡Cananga mä shamuchun ari goyllarta estudyajniquicuna,
cada quilla imano cananpaj cajtapis willashojcuna!
¡Nircur paycuna mä salbayta camashunqui ari!
14 Masqui ricay, chay musyaj yachajcunaga chaqui ogshanömi carcaycan.
Ninaga ushajpämi rupacurconga.
Chay ninapitaga manami imanöpapis salbacongachu.
Chay ninaga manami ñaupanman jamaycur mashacunapaj shanshanöchu canga.
15 Chaynömi ushacanga brüjuyquicunaga.
Wamra cashayquipita-pachami paycunawanga parlacurayqui.
Cada-ünunmi quiquin munashanno llutancunata rurasha.
Salbashunayquipäga manami pipis cangapächu.»