43
Tayta Dioslla salbacoj cashan
1 Cananmi ichanga Jacobpita mirar aywaj Israelcuna,
camashoj Tayta Diosniqui cayno nishunqui:
«Ama manchacuychu. Nogami gamtaga salbashcä.
Jutiquipami gayashcä. Nogapanami canqui.
2 Mayucunata chimpaptiquipis nogaga gamcunawanmi caycäshäpaj.
Mayu yacupis manami apashunquipächu manami shenganquipächu.
Nina chaupinpa päsaptiquipis manami rupashunquipächu.
Gamcunachöga ninapis manami ratangapächu.
3 Nogami cä gamcunapa Tayta Diosniqui, salbashojniqui.
Gam Israelcunapa Santo Diosniquimi caycä.
Gamcunata jorgamunäpäga ruquiqui churashcä
Egiptutami, Etiopiatami, Sabätami.
4 Nogaga gamcunata charänäpaj y mana wañunayquipämi
juc nasyuncunata ruquiqui churashcä.
Chayno rurashcä gamcunata cuyashpämi.
Gamcunaga ima-aycapitapis masmi bälinqui.
5 Ama manchacuychu. Nogaga gamcunawanmi caycä.
Cay pachacho inti yagamunan caj-läpitami gamcunapita mirajcunataga cutichimushaj.
Cay pachacho inti yaganan caj-läpitapis gamcunapita mirajcunataga shuntamushämi.
6 Norte caj-lä nasyun runacunatapis ‹Cutichimuy› nishämi.
Sur caj-lä nasyun runacunatapis nishaj: ‹Wamräcunataga ama charicurcuychu.›
Paycunataga ollguta warmitapis may carupita carpis cutichimushaj.
7 Nogata rispitamaj cajtaga
Noga rurashä cajtaga
Nogata aduramaj cajtaga llapanta cutichimushaj.
8 «Acrashä runacunataga apamuy ari.
Paycunaga ñawiyoj caycarpis gapranömi carcaycan.
Rinriyoj caycarpis mana wiyajnömi carcaycan.
9 Llapan nasyun runacuna shuntacay.
Llapan marca runacuna shuntacay.
Chaycho caycajcuna ¿mayganraj rimir-puntata rimaran acrashä runacunata yanapänäpaj cashanta?
Chayno cananpaj rimasha cashpanga mä testïgucunata pushamuchun.
Mä chay testïgucuna nichun paycuna willacushanta.
Wiyaj cäga llapanpis ‹¡Au, rasunpa nishannömi casha!› nengami.»
10 Tayta Diosga caynömi nin:
«Nogata sirbimaj runacuna gamcunami testïgö canqui.
Gamcunataga acrashcä rejsimänayquipämi, nogaman yäracamunayquipämi,
pï cashätapis tantiyacur musyanayquipämi.
Imaypitapis nogallami Diosga cä.
Nogapita mas juc diosga manami cangapischu.
11 Nogallami Tayta Diosga cä.
Nogallami salbacöga cä.
12 Nogaga salbanäpaj cashantami willacachirä.
Nircorga willacachishänöllami salbashcä.
Manami juc runacuna ‹diosnë› nishanchu salbashurayqui.
Noga salbashätaga gamcuna musyarcaycanquimi.
13 Imaypitapis nogallami Diosga cä.
Nogapa maquëpitaga manami pipis gueshpinchu.
Noga ruraptëga manami pipis chapata ruranmanchu.»
Israelcunata Tayta Dios alliman churananpaj cashan
14 Israelcunata salbaj Santo Tayta Diosmi nin:
«Gamcunata salbanäpäga runacunatami Babiloniaman cachashaj.
Paycunami llapan runacunata binsir gaticachanga.
Caldea runacunatapis alli-tucur büquincunacho caycajta gaticachanga.
15 Nogami Santo Tayta Diosniqui cä.
Nogami Israel nasyunta camacächishcä.
Nogami rayniqui cä.
16 Lamar chaupinpami nogaga juc nänita rurarirä.
Wac-läman cay-läman yacu cuyuycaj chaupinpami cällitano rurarirä.
17 Conträcunaga aypalla munayniyoj suldärucunawanmi gatimaran.
Llapanta usharinanpaj carrëtancunawan, cawalluncunawanmi shamuran.
Chay gaticachämajcunataga llapantami tunichishcä. Chaypitaga mananami jatarishanachu.
Achqui rataycashanpita upicäcojtanöpis illajpitami illgächishcä.
18 Cananga acrashä runacunata noga në:
Ñaupa cajcunallapäga ama yarparaychu.
Ni unay cashancunallapäpis ama yarparaychu.
19 Cananga mushojtanami ruraj-aywä.
Chayga yurimojnami-aywan. ¿Manachu cuentata gocunqui?
Chunyaj chaqui jircapami juc nänita rurashaj.
Imapis mana wayushan chaqui jircachömi mayuta yurichishaj.
20 Chauraga jirca-allgucunapis, avestruz äbicunapis agradësicamangami.
Nogaga chaqui jircachömi yacuta pashtachimö.
Chaqui jircachömi mayuta yurichimö.
Chayno yurichimö acrashä runacuna upunanpämi.
21 Chay runacunataga quiquëpämi rurarä.
Paycunataga alabamänanpämi rurarä.
22 «Chaypis gamcunaga Jacobpita mirar aywaj Israelcuna manami alabamashcanquichu.
Chaypa ruquenga yamacämashcanquimi.
23 Nogapaj uyshacunata rupachinayquipaj manami apamushcanquichu.
Rispitamashpayqui manami uywacunata garamashcanquichu.
Nogaga manami ‹chaqui micuy ofrendacunata garamay› nir yamacächishcächu.
Manami ‹insinsuta saumachiy› nir rabyachishcächu.
24 Nogapaj ofrendata apapämänayquipaj manami alli asyajcunata rantishcanquichu.
Pishtashayqui uywacunapa wirantapis cushicachimänayquipaj manami garamashcanquichu.
Chaypa ruquenga juchata rurashpayquimi yamacächimashcanqui.
Tucuy melanaypajcunata rurashpayquimi fiyupa rabyachimashcanqui.
25 «Chaypis nogaga Diosniqui cashpämi conträ rurashayquicunata gongaycöna.
Jucha rurashayquicunatapis manami yarpäshänachu.
26 ¿Imallaga canchuraj gamcuna allita rurashayqui?
Mä tapunacushun.
Mä juchaynajchush caycanqui.
27 Unay rimir-punta caj awiluyquipis juchatami ruraran.
Yachachishojniquicunapis conträmi ricacuran.
28 Mandashojniquicunapis Templöta ganrachisha.
Chaynöpami camacächishcä Jacobpita mirar-aywaj Israelcunata ushacächinanpaj, manacajman churananpaj.