2
Alli goyayna cananpaj cashan
(Miq. 4.1–3)
1 Amospa wamran Isaiastami Tayta Dios ribilaran shamoj watacunacho Judá nasyunwan capitalnin Jerusalén imano cananpaj cashantapis. Chayga caynömi caycan:
2 Ushanan junajcunachöga Tayta Diospa Templun caycashan punta
waquin puntacunapitaga mas rispitashami cangapaj.
Intëru nasyun runacunami chayman shamongapaj.
3 Aypalla runacunami shamunanpaj cayno parlaconga:
«Aywashun-llapa, Jacobpa Tayta Diosninpa Templun caycashan jircaman wichänapaj.
Chaychönami willamäshun imano goyänanchïpaj cashantapis.
Chaynöpana pay munashanno llapantapis rurashun» nishpan.
Jerusalenpitami Tayta Diosga yachachimäshun.
Chay Sionpitanami parlapämonga.
4 Tayta Diosmi arriglanga llapan nasyun runacunata.
Nircorga paynami chiquinacuycaj nasyun runacunata nenga imano goyänanpäpis.
Chaura chay runacunaga sablincunatapis ticrachenga rëjancunamanmi.
Tucsicuna lansancunatapis ticrachenga ösincunaman.
Juc nasyunpa contran mananami maygan nasyun runacunapis yapayga aywanganachu pillyacunancunawan.
Chayno captin mananami guërrapäpis yachachinaconganachu.
5 Jacobpita mirar aywajcuna,
Tayta Dios pushamashallanchïpa purishun ari.
Alli-tucojcuna castigacänanpaj cashan
6 Tayta Dios, acrashayqui runacunachöga juc-läpita shamoj musyacojcunami juntasha caycan.
Filistea runacunachönöpis brüjucunami juntasha caycan.
Israelcunaga juc-lä runacunawanmi parlacurcaycan.
Chayno captinmi gamga acrashayqui runacunata cachaycushcanqui.
7 Israelchöga aypallami caycan goripis, guellaypis.
Ima-ayca riquësacunapis aypallami caycan.
Cawallupis aypallami.
Yupaytapis mana atipaypämi caycan pillyapaj carrëtacunapis.
8 Ïdulucunapis intërucho juntashami caycan.
Runacunaga adurarcaycan quiquin rurarcur «diosnë» nishantami.
9 Chayno manacajcunata rurarmi juchayoj caycan.
Chayno cashanpitaga amana perdunaynachu.
10 Runacunaga pacacongapaj gagapa shillincunamanmi.
Pampata uchcuriycärir allpa rurinman yayconga.
Chaynöga pacaconga manchacuypaj munayniyoj Tayta Diospitami.
11 Alli-tucojcunaga uysurpangami.
Ollgojcunapis manacajman churashami ricacongapaj.
Chay junäga Tayta Diosllami fiyupa munayniyoj cashpan rispitasha canga.
12 Chay junäga munayniyoj Tayta Dios manacajmanmi churanga
alli-tucojcunata, llapan ollgojcunata, munayniyoj-tucojcunatapis.
13 Libanucho jatuncaray sedru guerucunata,
Basancho caj encina yöracunatapis
Tayta Diosga illgächengami.
14 Altunnin puntacunata,
jatuncaray puytush lömacunatapis
Tayta Diosga illgächengami.
15 Ricchacunanpaj altunnin pergashancunatapis
mana tunej sinchi pergacunatapis
Tayta Diosga illgächengami.
16 Tarsispita shamoj büquicunata,
cuyayllapaj büquicunatapis
Tayta Diosga illgächengami.
17 Alli-tucojcunawan ollgojcunaga
pasaypa manacajman churashami cangapaj.
Chay junäga Tayta Diosllami fiyupa munayniyoj cashpan rispitasha canga.
18 Chay öraga ïdulucunatapis ushajpämi illgächenga.
19 Tayta Dios chayno shamuptin
runacunaga mancharishpanmi yagacaycärengapaj gagacho caycaj uchcucunaman,
pacha rurinpa caycaj uchcucunamanpis.
Chaynöga pacaconga manchacuypaj munayniyoj Tayta Diospitami.
20 Chay junäga runacuna ïduluncunata goripita, guellaypita adurananpaj rurashantapis
cachaycärengapaj ucushcuna tiyanan, chicchicuna tiyanan uchcucunachömi.
21 Chay junaj runacunaga mancharishpanmi yagacaycärengapaj gagacho caycaj uchcucunaman,
pachapa shimin uchcucunamanpis.
Chaynöga pacaconga Tayta Diosta manchacushpanmi.
22 Runacunamanga amana yäracuynachu.
Runaga manami aycäpis bälinchu.
Runaga cawanpis jämayta cacharcuynöllami.