9
Israelcuna castigasha cananpaj cashan
1 Israel runacuna, mañösa warmi runanta cachaycojnömi
gamcunapis Tayta Diosta cachaycushcanqui.
Päguta chasquinanpaj warmi runawan puñushan pengaypaj cashannömi
gamcunapis cosëchayqui alli cananta munar juc diosman yäracushayqui pengaypaj caycan.
Chayno caycarga cosëchata shuntashayquipita ama cushicuychu.
Waquin nasyun runacunanöga cushicuypita ama pinticachaychu.
2 Chaypitami Israel runacuna, gamcunapäga mana cangapänachu rïgupis ni bïnupis.
3 Gamcunaga Tayta Dios acrashan nasyunchöpis manami tiyanquipänachu.
Chaypa ruquin Efraín runacunaga yapay cutenga Egiptumannami.
Asiriachönami miconga mana micunanpaj nishä micuycunata.
4 Tayta Diostaga bïnutapis manami garanquipänachu.
Uywacunatapis manami pishtapanquipänachu.
Micushayqui tantaga canga wañupacur micunan tantanöllanami.
Pipis chay tantata micoj cäga ganranami cangapaj.
Chay tantataga quiquiquicunallami micunquipaj.
Manami allichu canga Tayta Diosta garanayquipäga.
5 ¿Imataraj ruranqui gamcunaga Tayta Diosta aduranayqui diyacho?
6 Illgächinanpita gueshpir aywacusha captiquipis
Egipto runacunami shuntashunquipaj.
Menfis partichönami pampashunquipaj.
Guellaypita caj bälej cösayquicunapa jananpapis ishancacunami wiñamonga.
Tiyashayqui particunapis shatayangami.
7 Chayamushanami juchayquiman-tupu castiganäpaj caj junajcuna.
Israelcuna, musyanquipänami castïgu mayna chayamushanta.
Gamcunaga nircaycanqui: «Profëtaga upami, löcuyaycanmi» nir.
Chaynöga nircaycanqui fiyupa juchasapa cashpayquimi, fiyupa chiquicushpayquimi.
8 Diosga profëtanta churasha Efraín runacunata ricananpämi.
Chaypis gamcunaga chay willacoj mana alliman chayananpaj trampata churaparcaycanqui.
Intëru Israelchöpis chiquircaycanqui.
9 Gabaacho cashan wichannömi gamcunaga pasaypana pirdicasha carcaycanqui.
Tayta Dios ichanga mana alli rurashayquicunata llapanta yarparaycan.
Chaymi llapan juchayquicunapita castigashunquipaj.
Juchanpita Israelcuna ñacananpaj cashan
10 Tayta Dios nin: «Israelta tariycushpäga fiyupami cushicurä,
chunyaj chaqui jircacho übasta tariycur cushicojnöraj.
Awiluncunaga noga ricaptë casha rimir-puntata pogoj ïguscunanömi.
Baal-peorman chayaycärirmi ichanga mana dios cajcunata ‹diosnë› nir aduraran.
Chaynöpami paycunaga pengayman churacaran.
Cuyashan ïduluncunano melanaypaj ricacuran.
11 Efraín runacuna alliman chayashanga ushacangapaj äbi pärir aywacojnömi.
Wamrancunapis manami masga canganachu.
Mananami warmincunapis gueshyaj ricaconganachu.
Manami masga wawata tarenganachu.
12 Yurejllan wamrancunata uywaptinpis nogaga ushajpämi guechurishaj.
¡Wawallau caycho caycaj runacuna!
Noga witicuriptë mä imanöshi canga.
13 Efraín runacunaga wamrancunata ruraycan
jirca animalta charejcuna rurashannömi.
Wasinpita jorgapaycan wañuchicojcunawan wañuchichinanpämi.»
14 Castigay Tayta Dios, ichanga ¿imawanraj castiganqui?
Paycunapa warmincunaga amana wawatapis tarichunnachu.
Warmincunapa chuchuncunapis chaquichunna.
Efraín runacunapaj Tayta Dios rabyacurcushan
15 Tayta Diosmi cayno nin: «Gilgalchömi gamcunaga rurarayqui fiyupa mana allita.
Chaychömi gamcunata chiquiyta gallaycurä.
Mana allita rurashayquipitami tiyaycashayquipita jitarishayqui.
Chaypitami manana masga cuyaycäshayquipänachu.
Llapan mandajniquicunapis mana wiyacojllanami.
16 Efraín runacunaga caycan gueshyaj-tucushami.
Paycunaga caycan sapin chaquisha manana wayoj frütanömi.
Wamrancuna captinpis nogaga ushajpämi wañuchishaj.»
17 Cay marca runacunaga Tayta Diosnëta manami wiyacushachu.
Chaypitami llapanta jitarenga.
Intëru nasyuncunachömi puricachallar tiyanga.