6
Israel illgänanpaj cashan
1 ¡Ay imanöraj canqui Sioncho goyaj autoridäcuna!
¡Ay imanöraj canqui Samariacho tiyaj mandajcuna!
Gamcunaga charashayquiman yäracurmi munayniyoj-tucurcushcanqui.
Gamcunamanmi Israelcunaga «yanapämay» nir aywarcaycämun.
2 Calne siudäta aywar mä ricamunqui.
Chaypitaga päsar chayanqui Hamat jatun siudäman.
Chaypitana uranqui Filisteacho caycaj Gat siudäman.
¿Chay nasyuncunacho tiyaj runacunapita mas bälejchuraj gamcunaga canqui?
¿Gamcunapa nasyunniquega chay nasyuncunapita mas allichuraj?
3 Gamcunaga fiyupa ñacay junaj chayamunanpaj caycajta manami yarpayllapis yarpanquichu.
Chaypis mana allita rurar masmi gayaycanqui chay ñacay junajta.
4 Cuyayllapaj llagllaypa adurnasha jamanacho wegurpaycanqui.
Fistata rurar cushicushpayqui goyaycanqui.
Carni-mallwacunata, werannin töru-mallwacunata micur jamarpaycanqui.
5 Arpacunatapis wagay-wagayllataraj tucarmi birsucunatapis mushojcunallata jorguycanqui.
Instrumentucunatapis Davidnörämi tucuy-nirajta ruraycanqui.
6 Jatusaj cöpacunawan bïnuta upyarcaycanqui.
Cuerpuyquicunamanpis allinnin perfümicunataraj pichucuycanqui.
Nasyunniqui mana alliman chayaycashanpäga manami imapis gocushunquichu.
7 Chayno cashayquipitami gamcunataraj ñaupa-puntataga juc-läman prësu apashunquipaj.
Fistata rurar gaparpashayquicunapis manami musyacangapänachu.
8 Tayta Diosga quiquinpa jutinchömi jurasha. Munayniyoj Tayta Diosga caynömi nin:
«Jacobpita mirar-aywajcuna alli-tucushanga fiyupami rabyachiman.
Palasyuncunatapis melanäcömi.
Chaypitami paycunataga siudänintinta
cachapaycushaj chiquejcunapa munayninman.»
9 Chay öraga juc wasicho chunca runacunalla cawaycar quëdasha cashpanpis llapanmi wañonga.
10 Chaura juc famillyan ayata pampananpaj wasiman chayanga. Wasi ruricho caycajtana taponga: «¿Pillaga gamwan chaycho caycanrächu?» nir. Chaura ruripita nimonga «Manami pipis cashachu» nir. Mastapis ruripitaga nimonga: «Upälla. Tayta Diospa jutinta rimarpis rimaycunquimanchari. Chauraga castigarpis castigaycamashwanchari» nir.
11 Tayta Diosmi camacächenga jatunpis tacshapis wasicuna juchunanpaj.
Chauraga llapanmi illgangapaj.
12 ¿Cawallucuna purinmanchuraj gagapa?
¿Gagacho yapyashwanchuraj?
Chaura ¿imanirtaj gamcunaga layta benënumanno ticrachishcanqui?
¿Imanirtaj autoridäcuna alli arriglananpaj cajtapis ticrachishcanqui fiyupa ashgajmanno?
13 Gamcunaga manacajcunallapitami alabacuycanqui.
Munayniyoj cashayquipitami alli-tucur puriycanqui.
14 Cananga sumaj tantiyacuy Israelcuna.
Munayniyoj Tayta Diosga caynömi nin:
«Nogami camacächishaj juc nasyun runacuna
shaycamur fiyupa ñacachishunayquipaj.
Chaycunaga llapaniquitami ñacachishunquipaj
Hamatman yaycunapita-pacha gallaycur asta Arabá mayucama» nir.