38
Juda da Tama.
1 Nani berasi murinai Israel natuna Juda ivomiiri, varevaresina ikuyowesi ma inae da tomowa kana vava Hira gwabinai imakai, ina kwanatu na Adulam.
2 Nani dobunai imakamakai da Keinan wavine ipanani da iravaghi ma yavata ikena. Wavinena ina mamai kana vava Suwaya.
3 Wavinena iropeya ma ivi tuwa da natuna tomowa ma ivi vavei Eru.
4 Ma iropeyame na ivi tuwa da natuna tomowa ma ivi vavei Onan.
5 Ma bade ivi tuwame da tomowa ma ivi vavei Sela. Tuna na Kesibi dobunai ivi tuwei.
6 Natusi iyarokona Eru imagura na Juda inae da wavine sago irutini da Eru kawana, wavinena kana vava na Tama.
7 Ma Eru na ina berabero irakata, Bada ku matana ina bera ke biibiisi, tuna kubiine Bada ikiivunui.
8 Ma nani murinai Juda natuna Onan ivonei bo, “Ita kiki ikikava evonavona na kuna nunuri da am tuwa kwapurina kuna ravaghi ma kamonai ededa ina tupuwa na am tuwa natunatuna.”
9 Ma kegha, Onan iakovi da ti ededisi na ke tuna rapenai. Tuna kubiine maranai kwapurina yavata ikena na morona na ku tano ivivi sororoi da kwapurina ke iti ropeyi da iti tuwa da iyarokona natunatuna.
10 Ma aviyavisina iberai na Bada ke iti nuwabiibai tuna kubiine na bade ikiivunui.
11 Nani murinai Juda rawana Tama ivonei bo, “Kenae da am mamai kurina ma kemakai da tam kwapukwapurim. Ma kuna makamakai da natuku Sela ini yaraga.” Iyabumana da ikikava ina tuwa mau irabobo na nakanani Sela ita rabobo, tuna kubiine weni nakanani ivi sisiya. Ina nota gavugavuna na ke ita kayowei da Tama ita vovira da natuna ita ravaghi. Ma vaghina Tama ivovirame ina mamai kurina.
12 Madegha viya ikovi na Juda kawana irabobo. Ma Juda ina siyapa marana ikovi na kwinana Hira yavata inae ku Timna. Nani dobunai tomotomowa ina sipu vunivunisi ivivi gharitaweyana na inae kurisi.
13 Wawaya sago Tama ivi akovi da rawana Juda inenae ku Timna ina sipu gharina kubiine.
14 Tama sisiyina ivi yanei na kwapura garasi ivivi kote na ivi votaweyana. Ma gara sago iviiya da maghighina itarasovoi da wawaya ke ita vogiiya ma inae da Enayim meyagina garina matuketina ma keta inenae ku Timna na nani dobunai ivi kiimakiiyei. Iakovi da Juda ivi bero, namada Sela ivi yaraga ikovi ma ke ita verei da ita ravaghi.
15 Juda ibaba inene da Tama ikitai na inotai da tuna wavine madamadawarina iyamna maghighina ikwarewi.
16 Tuna kubiine ke damina ita viiya da tuna mani rawana keta baranai imakamakai. Inae kurina da ivonei bo, “Kepisi, tanae ma takena.”
Ma wavinena ivona bo, “Yavata takena na aviyavisina biibiina kuna vereku?”
17 Ma Juda ivona bo, “Aku gote yavona kamonai votuna sago ana vonatawei kurim.”
Ma ivonapotei bo, “Vaghina, muriyai da gote kuna vonatawei na am sawara sago kevereku ana vovotani da gote kuna vonatawei.”
18 Ivona bo, “Avi sawarina ana verem?”
Ma wavinena ivona bo, “Tam am wakima ere uravina iwamuwai kekotekotei na kuna vereku. Ma bade am diwona imamuwai kuna vereku.” Vaghina nani sawarisi iverei ma yavata ikena da iropeya.
19 Nani murinai, wavinena ivovira ina ku numa na nani garana gayamina ikwarewi na ivotawei ma kwapura garana ikote meyei.
20 Juda kwinana Hira ivonatawei da gote ita viiya ita neyei ma wavinena gwabinai Juda ina sawara ita yuname. Ma kegha, wavinena iekwa kavai.
21 Ma inae da Enayim meyaginai tomotomowa viya ivi tarakiiyanesi bo, “Wavine madamadawarina rorova keta baranai imakamakai na imapatana?”
Ma ivonapotei bo, “Ke sago weni dobunai wavine madamadawarina sago ita makamakai.”
22 Hira ivovira Juda kurina ma ivonei bo, “Wavinena ke ata panani. Ma nani dobunai tomotomowa ivoneku da ke meyani wavine madamadawarina sago nani meyaginai ita makii tovona.”
23 Ivona bo, “Vaghina, wavinena kevoterei da aku sawara ini rapenei, ke kata kayokayowei da wawaya ini nameta. Taku abera tovoni da ati miiyei ma wavinena ke kuta panani kubiine namanaki.”
24 Nawaravi aroba ikovi ma wawaya ipisi ma Juda ivonei bo, “Rawam Tama na madamadawarisi i bera iberaberai da wekarakava na tuna iropeya.”
Juda sisiya bagibagina iterei, ivona bo, “Meyagi kamonai kotinakiibuwei ma kokapuvunui.”
25 Ma itinakwarokwaroi ikiikiibau na sisiya ivonatawei rawana kurina, ivona bo, “Meni tomowina weni sawarisi iverevereku na tuna tomowina ivi ropeyiku. Weni matakira wakimina ere uravina ma weni diwonina kokitai, iyi rapenai.”
26 Juda sawarisi ikitai da ivogiini na ivona bo, “Tuna wavinena bera maninina iberai ma taku na kegha. Taku namada natuku Sela ata verei da ita ravaghi da iti tuwa na kegha, abera beroi.” Ma nani murinai Juda ke meyani Tama yavata ita kename.
27 Ma Tama ina mara itupo da iti tuwa na ivopanani da tomotomowa ruwa manawina kamonai.
28 Ma ina vivowavowa kamonai natuna sago imana iterekiibuwei na vivowavowa wavinena imana ivotani ma gara taratarana iviiya da ikuni. Ma ivona bo, “Weni tuna na iyarokona.”
29 Ma kegha, imana irurui na kwinana sago ivi nao ikiibau na vivowavowa wavinena ivona bo, “O, da tam weni nakanani, kukiibewara kukiibau.” Ma ivi vavei ‘Peres.’
30 Ma murinai na kwinana imana gara tarataranai ikukuni na ikiibau, ma tuna ivi vavei ‘Seraya.’