13
Pimeaari
1 Wiàna go pwa
pâ pairi pâ âboro diri,
ma pâ pai tèpa *angela,
â wiàna ticè pimeaari gooò,
â nye po pwa aio co,
pwacèwii kilo,
é, târa ilò na é tûu.
2 Wiàna go pame
popai kà Pwiduée;
wiàna go tâmogòori diri
pâ muru ni gòropuu,
pâ muru na tâa na wâbinyiri;
â wiàna ticè pimeaari gooò,
â nye piticèmuru naa gooò.
Wiàna dau maina cèikî kôo,
ma go pagù pâ jaa,
â wiàna ticè pimeaari gooò,
â nye piticèmuru naa gooò.
3 Wiàna go naa
diri pâ neemuruô
tà tàpé na ticè kàra;
â wiàna go panuâ naiio
ba na go pi-ina kôo,
â wiàna ticè pimeaari gooò,
â nye piticèmuru naa gooò.
Wàéni pai pwa wàra pimeaari
4 Wàéni ê pai pwa
wàra ê pimeaari:
Jè pidàpwicâarijè.
Jè pitu tà pàra tàpé.
Câjè caa tèpa piboo.
Câjè caa pi-ina kâjè.
Câjè caa tèpa maina nüma.
5 Câjè caa pwa-imudiri muru.
Câjè caa piniimirijè co.
Câjè caa tèpa putàmu.
Câjè caa tèpa tà niimiri na èpà
naa na pwâranümajè.
6 Wàéni ê pimeaari:
Na jè ipwàdée
goro ê âjupâra;
â jè pikîri goro
ê pwina càcaa *tàrù.
7 Jè nye ciburà cèikî.
Jè nye ciburà tapacîri.
Jè nye ciburà kakeri.
 càcaa oratâjè goo.
Ée mwa tâa dàra gòiri awé
8 Dà na ée mwa tâa
dàra gòiri awé?
Nye ê pimeaari!
[O nye cau tiàu
pâ âraimeai]:
O nye tiàu
tèpa *péroféta.
O nye tiàu
pai pipa popai
naa pwâratùra na ité.
O nye tiàu
pai tâmogòorimuru.
9 Càcaa tâbawêe
ê autâmogòorimuru
na naa tâjè.
Càcaa tâbawêe
ê popai kâjè
naa na nee Pwiduée.
10 O tiàu diri
ê pwina càcaa tâbawêe,
ba ée mwa tèepaa me
pwina tâbawêe!
11 Na go bwaa èpo,
â go tùra pwacèwii nari èpo,
â go niimiri pwacèwii nari èpo.
Ûna go jèe maina,
â go naaco diri
pai pwa kâra nari èpo.
12 Bwaa câjè pâji côo bwàti;
jè niâ naa na garaaci [na tòri].
Êco na, na jè tòotù,
âna jè o mwa bàra côoê
naa na pai tâa kêe.
Bwaa câjè caa tâmogòori diri.
Êco na, na jè tòotù,
â jè mwa bàra tâmogòori bwàti,
pwacèwii Pwiduée,
na é tâmogòorijè bwàti.
13 Tâa tâjè pâ muru na âracié:
Ê cèikî, ê pitapacîri,
bau ê pimeaari.
 wà pimeaari,
na dau maina naa nadàpàra.
Nabwé!