16
1 ’Kain jiꞌi ntatjunta ixi tsintueꞌanta ngeꞌe juintakuanꞌannta.
2 Ni judío tsajonꞌa na̱ juachaxin tsixinꞌinnta niꞌngo ko tsiji nchakon ixi ni naatsóñaxónnta xroxraxaon na̱ ixi ti ncheꞌe na̱ meꞌe naa xrée ndo Dio.
3 Jaña sincheꞌe na̱ ixi chúxinꞌa na̱ Ndotána ko chúxinꞌa na̱ najanꞌan.
4 Ko ntatjunta kain jiꞌi ixi nchakon jaña tsonꞌen, xroxraxaonnta ixi ó ntatjunta saꞌó jaña tsonꞌen.
Ixra̱ ncheꞌe Espíritue ndo Dio
’Ti xrangíxixión ntatjuꞌinta jiꞌi ixi bakeꞌe ngajinnta.
5 Ko jai satsji ti jii ngisen xruanꞌanna juiꞌi. Ko ninaánta tjanchangínta no satsji
6 ixi tsango jitoniꞌe asáanta ixi ntatjunta kain jiꞌi.
7 Nduaxin, cháña satsji ixi jaꞌanta jian tsakeꞌenta. Ko siá satsjiꞌa tsiꞌa ngisen tsingijnanta. Ko siá satsji, janꞌan xroxruanꞌan ndo tsi̱i̱ ndo.
8 Ko nchakon tsi̱i̱ ndo sinchexraxaon ndo chujni nunte xasintajni ixi chónda na̱ ijie̱, ko jii naa chaꞌo ndako xroruéꞌe na̱ ko ndo Dio sinchéñeꞌe ndo na̱ ijie̱.
9 Jeꞌe na̱ chónda na̱ ijie̱ ixi titikaonꞌa na̱
10 ko tsonoꞌe na̱ ixi jii naa chaꞌo jian ko ixi janꞌan satsji ti jii Ndotána ko ítsikonꞌantana,
11 ko tsonoꞌe na̱ ixi ndo Dio sinchéña ndo ijie̱ ixi ó juexin juinchéña ndo ijie̱ ngajin Xixronꞌanxrée, xi tituenꞌen nunte xasintajni.
12 ’Xrarichonda itsjé ngeꞌe xrontatjunta, ko jai juaꞌi tsienxinnta.
13 Nchakon tsi̱i̱ Espíritue ndo Dio nduaxin, jeꞌe ndo sintakuanꞌannta ndo kain ngeꞌe nduaxin ixi jeꞌa ngeꞌe tjaun ndo xrontatjunta ndo. Naꞌi. Xrontatjunta ndo kain ngeꞌe tsinꞌen ndo ko sintanoꞌanta ndo ngeꞌe tsonꞌen.
14 Jeꞌe ndo tsajon ndo juasaya ngajin janꞌan ixi tsayéꞌe ndo kain chijnina ko ngeꞌe tikinixinna ko sintanoꞌanta ndo kain jiꞌi.
15 Kain ngeꞌe chónda Ndotána naꞌna kaxon. Méxin, ndachrja̱n ixi Espíritue ndo Dio tsayéꞌe ndo ngeꞌe tikinixinna ko tjumeꞌe sintanoꞌanta ndo kain jiꞌi.
Ti toniꞌe aséenni xrokjan juaxruxin
16 ’Xra íseꞌa í tsikonꞌantana. Ko kaxon íseꞌa tsikonntana íjngo ixi satsji ti jii Ndotána.
17 Ko kaxin sen chrikao ndo ndache kichuu sen:
―¿Ngeꞌe xrondachro jiꞌi ixi íseꞌa tsikonna ndo ko kaxon séꞌa tsikonna ndo íjngo ixi satsji ndo ti jii Ndotée ndo?
18 ¿Ingeꞌe tjaun ndo xrondachro ndo ixi: “íseꞌa”? Tianxinꞌana ngeꞌe ndachro ndo.
19 Ko konoꞌe ndo Jesús ngeꞌe tjaun sen tsjanchangíꞌe sen ndo ko ndache ndo sen:
―Janꞌan ntatjunta ixi íseꞌa ítsikonꞌantana ko kaxon séꞌa tsikonntana íjngo. ¿Á jiꞌi ritjanchiangíꞌe kichuunta?
20 Nduaxin ntatjunta ixi tsango xrotsjanganta ko tsoniꞌe asáanta, ko ni nunte xasintajni tsakeꞌe na̱ juaxruxin. Ko maski tsango tsoniꞌe asáanta ko tjumeꞌe xrokjan tsakeꞌenta juaxruxin.
21 Hora naa nchri sinchejongíꞌe nchra chjenꞌen nchra, tsango tsoniꞌe aséen nchra ixi ó kuiji hora tsjongíꞌe xjan. Ko tjexin tjongíꞌe xjan, tjumeꞌe ísintexiꞌañao nchra juachjaon kuatsinga nchra ixi juaxruxin takeꞌe nchra ixi juinchejongíꞌe nchra naa chjan ngataꞌa nunte xasintajni.
22 Jaña jaꞌanta kaxon toniꞌe asáanta jai. Ko tjumeꞌe tsikonntana íjngo ko tsango tsakeꞌe juaxruxin asáanta ko ninaa chujni tsantsjaꞌanta juaxruxin meꞌe.
23 ’Nchakon meꞌe xroꞌan ngeꞌe tsjanchangínanta. Nduaxin ngeꞌe ntatjunta. Ixi Ndotána xrotjáanta ndo kain ngeꞌe tsjanchaxinnta nombréena.
24 Jaꞌanta xraxroꞌan ngeꞌe tjanchiaxinnta nombréena jai. Ko jai tjanchianta ko tsayeꞌenta, ko tsango tsakeꞌenta juaxruxin.
Ncháina Jesucristo juacha ndo kuetuanꞌan ndo nunte xasintajni
25 ’Ntatjunta jiꞌi jeꞌo xranchi tekini naa ngeꞌe. Ko tsi̱i̱ nchakon ítsekiaꞌinta jaña ixi ndako xrontatjunta ixi Ndotána.
26 Nchakon meꞌe tsjanchiaxinnta ngeꞌe nombréena. Ko ndachrja̱nꞌi ixi janꞌan xronichjaxinnta ngajin Ndotána
27 ixi jeꞌe Ndotána tjuaꞌanta ndo. Tjuaꞌanta ndo ixi jaꞌanta tjuananta janꞌan ko ixi titikaonnta ixi janꞌan juixin ti jii jeꞌe ndo.
28 Kuachrjexin ti jii Ndotána ixi juiꞌi nunte xasintajni. Ko jai tintuꞌa nunte xasintajni ixi satsji ti jii Ndotána íjngo.
29 Tjumeꞌe ndachro sen chrikao ndo:
―Jai ndako ritjakua ko ítjakoxinꞌa ixi xrojan chijni,
30 jai tienxinna ixi noꞌa kain ngeꞌe ko xrokondaꞌi ixi xrojan ngisen tsjanchangiꞌana. Méxin, titikaꞌonna ixi jaꞌa juixian ti jii ndo Dio.
31 Ndo Jesús juateꞌe ndo:
―¿Jai ché kuitikaonnta?
32 Ko tsi̱i̱ nchakon ko jai hora meꞌe ixi jaꞌanta xrochjeyanta ko satsjinta ko tsintunantana janꞌon. Ko jeꞌa janꞌon ritjén ixi Ndotána jii ndo ngaji̱n.
33 Jiꞌi ntatjunta ixi kainnta juaxruxin tsakeꞌe asáanta ixi titikaonntana. Ko ntiꞌi nunte xasintajni tsatsinganta juachjaon, ko xronkaꞌinta ixi janꞌan ó juacha tetuanꞌan nunte ntiꞌi.