8
Ixi ndo Jesús ti̱ꞌxi̱n naa juachaxin natjúá
1 Ti ícha tjintee stenichjana ixi ndotánai̱na, ndo ícha tetuanꞌan, jii ndo ngajní, ndatsjonxin jian ti tetuanꞌan ndo Dio,
2 ko jeꞌe ndo ncheꞌe ndo ixra̱ ngaxinꞌin niꞌngo tsijinchekonchjian ndo Dio, niꞌngo nduaxin; jeꞌa niꞌngo juinchekonchjian chujni.
3 Kain ndotaana ícha tetuanꞌan tsikayéꞌe ndo ixra̱ ixi tsajon ndo ngeꞌe tsayéꞌe ndo Dio ko tsóña ndo iko tsoméxin jíee ni tjajnée ndo. Méxin, ndo Jesucristo kaxon xrokonda tsajon ndo xrojan ngeꞌe.
4 Siá jeꞌe ndo xrobakeꞌe ndo ngataꞌa nunte xasintajni, jeꞌe ndo xrojuincheꞌa ndo xrée naa ndotaana, ixi ntiꞌi ó jii ndotaana tajon ngeꞌe xranchi tsiketuanꞌan ley kuajon ndo Moisés.
5 Sen taana, sen ste ntiꞌi ncheꞌe sen xra̱ ko stetanseya sen xranchi ngeꞌe jitonꞌen ngajní. Ko noi̱na kaxon ixi meꞌe kuituenꞌen ndo Moisés ixi xrojuinchéña ndo niꞌngo manta xranchi ndo Dio tsindachro ndo: “Jian tsjeꞌe kain ngeꞌe xranchi jii niꞌngo juakoꞌa ngataꞌa ijna̱.”
6 Ko ndotánai̱na, Jesús, ndo ícha tetuanꞌan, jeꞌe ndo kuayéꞌe ndo naa ixra̱ ícha jian meꞌe jeꞌe ndo tinóatée ndo ixi jai̱na, ko meꞌe juinchéña ndo naa juachaxin natjúá ko tsajon ndo ícha jian ngeꞌe tsayéꞌena.
Juachaxin saꞌó ítundaꞌi jai
7 Siá juachaxin saꞌó nduaxin xrokuindoxin ti ndakoꞌa kuancheꞌe chujni, íxrokondaꞌi xrokonoxin juachaxin yuxin.
8 Jeꞌe ndo Dio bikon ndo ixi juachaxin saꞌó kuitikaonꞌa na̱ ko kuindoxinꞌa ti kuancheꞌe na̱, méxin, ndachro xroon chijnie ndo Dio:
Ncháina Dio ndachro:
Tsi̱i̱ nchakon janꞌan tsajon inaa juachaxin natjúá ngajin ni tjajna Israel ko ni tjajna Judá.
9 Juachaxin jiꞌi jeꞌa xranchi juachaxin saꞌó kuajon ngajin sen tachríꞌanta xranchrjen,
nchakon janꞌan kuantsjexin sen tjajna Egipto;
ko jeꞌe sen kuitikaonꞌa sen ti juachaxin kuetuanꞌan sen,
méxin, janꞌan kuintuꞌa sen, ichro Ncháina Dio.
10 Juachaxin sintaña ngajin tjajna Israel ti tsatsingaja kaxin nano,
jaꞌin tsonꞌen, ichro Ncháina Dio:
Janꞌan sintaxraxaꞌon sen ley tsitikaon sen,
ko xrokjin ley meꞌe ngaya aséen sen.
Janꞌan xrokjanna ndo Dio neꞌe sen,
ko jeꞌe sen, sen tjajnána.
11 Ko íxrokondaꞌi ixi ikaxin sen sinchekuenꞌen kichuu sen
xranchi xrochuntia sen Ncháina,
ixi nchakon meꞌe kain ichjan nchínchín ko kain sen ícha icha xrochuxinna sen janꞌan.
12 Ko janꞌan sintamaꞌa kain ti ndakoꞌa juincheꞌe sen
ko janꞌan íxroxraxaonꞌa ijie̱ kuachónda sen.
13 Ti ndachro ndo Dio ixi ti juachaxin natjúá meꞌe xrondachro ixi juachaxin saꞌó ó jitjexin juachaxin ko íseꞌa tsitjáña juachaxin meꞌe.