5
Tí libro la ko tí Kolélo
1 A̱ ntá tí tja chjina tí nkexro tjetja̱xi̱n tí trono, kꞌuíkua̱n ijnko libro mé tsíkjin sín nkaxenhen la ko nóton la ko mé tsíkjèxin yato sello.
2 La kꞌuíkua̱n ijnko ángel chónta kjuachaxin ntá kjuanchankí chꞌán itsen ntáchro chꞌán kíxin:
―¿Nkexro tí jína chrókjuacha chrókuakitje̱he̱ tí libro la ko chrókóchríto̱n tí sello chónta?
3 La ninkexró ní nka̱jní o̱ ní chjasintajni o̱ ní chrínkí nonte tsjachahya tsakitje̱he̱ tí libro la ní komáhya sín.
4 A̱ ntá janhan la imá tsja̱nka kíxin na̱xa̱ tónoxínhya ninkexró chrókjuacha chrókuakitje̱he̱ tí libro o̱ chrókjuinchekuáxin tí libro o̱ chrókomá nkehe tí ntáchro tí libro.
5 Ntá ijnko tí sín táda ntá nixja̱na ntáchro kíxin:
―Tsja̱nkahya, tsjehé ntihi tí Koxra̱ kꞌuaxrjeníxin Judá la ko tsíkꞌaxrjeníxin rey David. Mé kjuacha la ó tsjacha tsakitje̱he̱ tí libro la ko tsóchríto̱n tí yato sello ―ichro chꞌán.
6 A̱ ntá jnko̱siné tí trono la ko tí tjejó tí noó tí nkexro tjejóchón la ko jnko̱siné tí tjejó tí sín táda ntaha mé kꞌuíkua̱n tjexín to̱té ijnko Kolélo tsjehe éxí tsíkꞌóyán sín mé chónta yato ntèé la ko yato ikon. A̱ ntá tí kon mé tí yato Ncha̱kuen Dios la táha mé tsíkꞌítuenhen tꞌayakonhen kuenté chjasintajni.
7 A̱ ntá tí Kolélo a kuákja tí libro itjen tja chjina tí nkexro tjetja̱xi̱n tí trono.
8 A̱ ntá tió kꞌuáyéhe̱ chꞌán tí libro la ntá tí noó sín tjejóchón la ko tí veinticuatro tí sín táda kꞌuéjóxin tochꞌin sín nkayakon tí Kolélo. A̱ ntá kaín tí jehe sín chónta sín ison arpa la ko xraá sín ihnti tsíkꞌóna chica oro tsíkaón chji̱nco̱. Tíha mé oración nixje̱he̱ Dios kaín tí sín tsíkjinchetjóá chꞌán.
9 Itsje sín nkehe ni̱xin ntáchro kíxin:
Jaha mé ijnko nkexro jína kjuacha kuákja tí libro la ko kóchrítuan tí sello;
kíxin tsíkꞌóyán sín tí jaha la ko tí ijni̱á kꞌue̱na̱xian tí jeheni tsꞌáyéhe̱ Dios,
mé tsꞌáyéhe̱ chꞌán kenxín chojni kjónté nkexrí tsjehe sín la ko kjónté nkexrí nixja sín la ko chojni kénxín chjasin la ko kaín nación.
10 Jaha tsíkji̱chꞌénani reyes la ko ncha̱tꞌá sichꞌeheni xra̱ Dios kuènteni,
la ko jaha tsíkjánjuan kjuachaxin tsꞌe̱to̱anni chjasintajni.
Mé xi̱kaha ichro sín.
11 Ntá tuénxín kꞌuíkua̱n la ko kui̱nha̱n itén nchónhya sín ángel tjejó sín jnkonta̱tjen tí trono la ko tí sín tjejóchón la ko tí veinticuatro tí sín táda. Nchónhya millones la ko millones tí jehe sín.
12 Itsen nixja sín ntáchro sín kíxin:
Tí Kolélo tsíkꞌóyán sín,
tíha mé kjuacha kꞌuáyéhe̱ kjuachaxin tsꞌe̱to̱an la ko kꞌuáyéhe̱ tí nkehe tjete kuènte Dios,
la ko tí kjuaxrexinkaon jína la ko kjuachaxin sichꞌe xra̱
la ko mé xi̱kaha tjikosáyeheni chꞌán.
13 Kja̱xin kui̱nha̱n kíxin kaín nkehe kjuíchꞌéna Dios siín nka̱jní la ko chjasintajni la ko tí nkehe siín chrínkí nonte la ko kaín nkehe siín nta̱yaon la kaín tíha mé ntáchro kíxin:
Chjéheni kjuasáya tí nkexro tjetja̱xi̱n tí trono la ko tí Kolélo
kíxin chónta kjuachaxin jnkochríxín.
14 A̱ ntá tí noó sín tjejóchón ntáchro sín kíxin:
―Xi̱kaha tso̱nhen. Amén.
La ko tí veinticuatro tí sín táda kꞌuejóxin tochꞌin sín la chjéhe sín kjuasáyé tí nkexro tjechón jnkochríxín.