10
Tjako chꞌín Jesús kíxin chrókjuáke̱hya kíchó sín
(Mt. 19.1-12; Lc. 16.18)
1 Na ntá chꞌín Jesús mé kꞌuaxrjexín chꞌán chjasin Capernaum sákjuí chꞌán nó estado Judea la ko nó tóhe nta̱río Jordán. Ntá nchónhya chojni kójnkotsé sín tí tjen chꞌán ntiha. Ntá kjua̱ko̱he̱ chꞌán tí jehe sín kíxin xi̱kaha kuènhen chꞌán.
2 Ntá iso sín fariseo mé kóchjinehe sín chꞌán kjuanchankíhi sín chꞌán nkehe, chrókjua̱cha̱xi̱n sín chꞌán. Ntáchro sín kíxin:
―¿Á siín kjuachaxin tsjáke̱he̱ chojni ntoa ichjién? ―ichro sín.
3 Ntá kjuáte̱he chꞌán ntáchro chꞌán kíxin:
―¿Nkehe tí kꞌue̱tua̱nhanrá tí chꞌín Moisés? ―ichro chꞌán.
4 Ntá ntáchro sín kíxin:
―Chꞌín Moisés kjuanjon chꞌán kjuachaxin kíxin tsꞌóna ijnko xroon tsakja tí ichjién kíxin tsꞌitjíexín kíchó sín ―ichro sín.
5 Ntá chꞌín Jesús ntáchro chꞌán kíxin:
―Ntá jahará icha a̱sánrá títekákonhyará ntá kꞌue̱to̱an chꞌán tsꞌóna tí xroon a.
6 Kjánchó tí xrankíxixín tió kjuíchꞌéna Dios kaín xín nkehe la kjuíchꞌéna chꞌán ijnko chojni ntoa la ko ijnko chojni chjin.
7 Méxra̱ tí chojni ntoa tsíto̱he chꞌán tí itꞌé chꞌán la ko ìné chꞌán kíxin tsakja chꞌán ichjién chꞌán
8 ntá yóí sín tsꞌóna sín éxí jnkoko̱á chojni. Méxra̱ jehya yaá chojni. Náhí, jnkoko̱á.
9 Na mé xi̱kaha tí kjuachaxin kuènte Dios kójnkojiéxin sín ntá jehe sín chrókꞌuitjíehya kíchó sín ―ichro chꞌán.
10 A̱ ntá tjejó sín nchia ntá tí sín kꞌuájiko chꞌán a mé kjuanchankíhi sín chꞌán ínaá kíxin á xitjahya tsꞌitjíhi kíchó sín.
11 Na ntá ntáchro chꞌín Jesús kíxin:
―Tí jnkojín nkexro tsjáke̱he̱ ichjién ntá tsakja chꞌán í jnko chjin na mé xi̱kaha tsja̱che̱he̱ chꞌán tí tjan tsíkóte̱he chꞌán sa̱oxín.
12 La ko kja̱xin tí chojni chjin tsíkjáke̱he̱ xìi tsakja tjan í jnko chojni ntoa na mé xi̱kaha kja̱xin tjan tjasin tjan jie̱ ―ichro chꞌán.
Chꞌín Jesús kjuíncheyaon chꞌán xjan
(Mt. 19.13-15; Lc. 18.15-17)
13 Ntá kjui̱ka̱o sín xjan kíxin tjinkaon sín tsjakꞌetja tja chꞌín Jesús tí xjan a. Ntá tí sín kꞌuájiko chꞌán mé kóninkakonhen sín tí sin kjui̱ka̱o xjan.
14 Ntá kꞌuíkon chꞌín Jesús ntá kónínkaon chꞌán ntáchro chꞌán kíxin:
―Nté ti̱to̱hérá tí xjan tsoxrakoa tí tjén janhan la tꞌinkakuènhyará xjan kíxin tí sín kuènte kjuachaxin kuènte Dios la mé tóyóhe̱ éxí tí xjan a.
15 Ntá chaxín ntáxrja̱n kíxin tí nkexro tsꞌónahya éxí ijnko chánjan xitjaha tsꞌejó sín tí tsꞌe̱to̱an Dios tí kjuachaxin kuènte chꞌán ―ichro chꞌán.
16 Ntá kjóa chꞌán tí xjan a kjuakꞌetja tja chꞌán xjan la kjuíncheyaon chꞌán.
Ijnko chꞌín ntasoá rico nixje̱he̱ chꞌán tí chꞌín Jesús
(Mt. 19.16-30; Lc. 18.18-30)
17 A̱ ntá tió sákjuí chꞌín Jesús ínaá ntá xrakoa ijnko chꞌín tinká chꞌán kjuákꞌexín tochꞌin chꞌán nkayakon tí chꞌín Jesús kjuanchankí chꞌán kíxin:
―Jaha, maestro jína. ¿Nkexrí chrókjuichꞌeni kíxin chrókꞌuitjani kjuachón jnkochríxín? ―ichro chꞌán.
18 Ntá ntáche chꞌín Jesús tí jehe chꞌán kíxin:
―¿Nkekuènté ntáchrua kíxin jína tí janhan? Jehó jnkoko̱á nkexro mé jína la tíha mé Dios.
19 Ntá jaha ó noha kíxin nkexrí kꞌue̱to̱an Dios kíxin: “Chrókjuacheéhya kíchuá la chrókꞌoyánhya chojni la chrókue̱ehya la chrókjóntahya kíchuá la chrókjui̱chꞌiahya la ko chróchontehé kjuasáya itꞌá la ko ìná” ―ichro chꞌán.
20 A̱ ntá jehe chꞌán kjuáte̱he chꞌán ntáchro chꞌán kíxin:
―Maestro, kaín tíha kjuínchexiteyáni desde ntasoáni ―ichro chꞌán.
21 Ntá chꞌín Jesús mé komá chꞌán la ko tjuèhe chꞌán tí chꞌín a. Ntá ntáchro chꞌán kíxin:
―Na̱xa̱ tꞌitjáyan jnkoko̱á nkehe chrókjui̱chꞌe. Sátjia nchekjia kaín tí nkehe chonta. A̱ ntá tí chichaon si̱nchekjixián tí nkehe chonta la mé ncheki̱to̱nhén tí chojni nòa, a̱ ntá tí nkehe tjete tsochonta nkaya nka̱jní. A̱ ntá tió tsjixin tsjánjuan kaín ntá tsjihá tamá tí ntacruz kuènta la chréhé tí janhan ―ichro chꞌán.
22 Ntá tió kuínhin chꞌán xi̱kaha ntá kꞌuává chꞌán sákjuí chꞌán, kíxin imá tsjé nkehe chónta chꞌán.
23 Ntá chꞌín Jesús komá chꞌán tí sín siín ntiha ntáche chꞌán tí sín siín kꞌuájiko chꞌán kíxin:
―Imá xra̱ ijnko chojni chónta imá tsjé nkehe tsꞌixenhen sín tí tjen Dios tꞌe̱to̱an ―ichro chꞌán.
24 Ntá tóxakonhen tí sín kꞌuájiko chꞌán kíxin xi̱kaha ntáchro chꞌán. Ntá chrónka chꞌán ínaá kíxin:
―Tí sín tjekonhen tí nkehe chónta sín na imá xra̱ tsꞌixenhen sín tí tjen Dios tꞌe̱to̱an.
25 A̱ntsí xra̱hya chrókꞌuátsínka ijnko kocamello ijnko tja̱rꞌin ntachica tjexrja. A̱ ntá a̱ntsí má xra̱ ijnko chꞌín chónta itsjé nkehe chrókꞌuixenhen chꞌán tí tjen Dios tꞌe̱to̱an ―ichro chꞌán.
26 Ntá jehe sín kuínhin sín xi̱kaha ntá imá chrakon sín. Ntá tjanchankíhi kíchó sín kíxin:
―Tí xi̱kaha la, ¿xá nkexro chrókjuacha chrókuaá? ―ichro sín.
27 Ntá komá chꞌín Jesús tí jehe sín ntáchro chꞌán kíxin:
―A̱ ntá chojni ó tsjachahya sichꞌe tíha, a̱ ntá Dios jína sichꞌe kaín nkehe, kixin Dios la kohya nkehe tsjachahya sichꞌe ―ichro chꞌán.
28 Ntá chꞌín Pedro ntáchro chꞌán kíxin:
―Ìnchéni, kaín ni mé kuíto̱heni kaín nkehe chóntani ntá chréhe̱ni tí jaha ―ichro chꞌán.
29 Ntá kjuáte̱he chꞌín Jesús ntáchro chꞌín kíxin:
―Chaxín ntáxrja̱n kíxin jnkojín nkexro tsíto̱he nto̱e sín la o̱ tí kíchó ntoa o̱ tí kíchó chjin la o̱ itꞌé o̱ ìné sín o̱ ichjién sín o̱ xje̱en sín o̱ no̱nte̱e kíxin tinkáchónki sín tí janhan la ko tjinkaon sín chrókjuako sín tí tan tsjanjon kjuachón
30 na mé ntihi chjasintajni tsochónta sín ciento veces nchónhya nto̱e sín la ko éxí kíchó sín la ko éxí ìné sín la ko éxí xje̱en sín tsꞌikon sín itsjé chojni kjé la ko éxí no̱nte̱e sín xi̱kaha tsꞌikon sín itsjé nonte. Kjónté tsjasóte sín ntihi chjasintajni ntá chrꞌéxi̱n tsochónta sín tí kjuachón jnkochríxín.
31 A̱ ntá itsjé tí sín tꞌe̱to̱an ijie mé tsjixixín tsochréhe̱ sín. A̱ ntá itsjé tí sín tꞌítuenhen ijie, na mé tí sín a mé tsꞌe̱to̱an sín tí ntiha.
Níxin chronka chꞌín Jesús kíxin itsꞌen chꞌán
(Mt. 20.17-19; Lc. 18.31-34)
32 Ntá tjejótji sín chrìin sín tí nti̱a sátsji̱ chjasin Jerusalén. Ntá chꞌín Jesús mé tjetaón chꞌán nti̱a ntá tí sín kꞌuájiko chꞌán mé tóxakonhen sín chrakon sín chréhe̱ sín. Ntá kꞌuíye̱he̱ chꞌán jehó tí teyó sín ínaá ntá kjuankíxin chꞌán chénka chꞌán sín nkexrí tí nkehe tso̱nhen chꞌán.
33 Ntá ntáchro chꞌán kíxin:
―Ijie sátsji̱ni Jerusalén. Na ntá tí Xje̱en Dios Kꞌóna Chojni mé tsotsé sín chꞌán tsjikénhen sín tí sín ncha̱tꞌá tꞌe̱to̱an la ko tí sín tjako tí ley. Ntá tsꞌe̱to̱an sín kíxin itsꞌen chꞌán. Ntá sinchekꞌáyéhe̱ sín chꞌán tí sín jehya judío.
34 Ntá jehe sín la tsjanoá sín tí jehe chꞌán la ko nta̱té sín tsi̱ki̱te sín chꞌán la ko tsjate sín chꞌán ntá tsꞌóyán sín chꞌán. Kjánchó tí ya̱on níxin mé tsoxechón chꞌán ínaá ―mé xi̱kaha ichro chꞌín Jesús.
Chꞌín Jacobo la ko chꞌín Juan tjanchia sín nkehe
(Mt. 20.20-28)
35 A̱ ntá tí chꞌín Jacobo la ko chꞌín Juan mé xje̱en chꞌín Zebedeo mé kóchjinehe sín tí chꞌín Jesús ntá ntáchro sín kíxin:
―Maestro, tjanchahani ijnko xra̱ ―ichro sín.
36 Ntá kjuanchankí chꞌín Jesús ntáchro chꞌán kíxin:
―¿Nkehe tí xra̱ tjinkáonrá chrókjui̱tꞌahará? ―ichro chꞌán.
37 Ntá ntáchro sín kíxin:
―Tió tséto̱anxián tí kjua̱cha̱xián jié na tjinkaonni kíxin ijnkoni chrókjuakꞌeni itjá chjina a̱ í jnkoni chrókjuakꞌeni itjá kjon ―ichro sín.
38 Ntá ntáche chꞌín Jesús tí jehe sín kíxin:
―Jahará la noahyará nkehe tí tjanchanará. ¿Á chrókjuachará chrókꞌuirá tí nkehe itsjá itsꞌia janhan la ko á chrókjuachará chrókuikiterá éxí tsikite janhan? ―ichro chꞌán.
39 Ntá jehe sín kjuáte̱he sín ntáchro sín kíxin:
―Kja̱ tsjachani ―ichro sín.
Ntá ntáche chꞌín Jesús tí jehe sín kíxin:
―Chaxín itsꞌirá éxí tí nkehe tsjá itsꞌia la ko tsikiterá éxí tsikite janhan.
40 Kjánchó janhan xitjahya tsjánjuan kjuachaxin kíxin ijnkorá chrókjuakꞌerá tjaná chjina la í jnkorá chrókjuakꞌerá tjaná kjon kíxin janhan na tónahya tocar tsjánjuan tíha kíxin tí sín a la xráxín ó tsíkónoxín ―ichro chꞌán.
41 A̱ ntá tió kuínhin tí ite sín xi̱kaha tsíntáchro tí sín a ntá kjuankíxin kónínkakonhen sín tí chꞌín Jacobo la ko tí chꞌín Juan.
42 Ntá kꞌuíye̱he̱ chꞌín Jesús kaín tí jehe sín ntá ntáche chꞌán sín kíxin:
―Ó nohará kíxin tí sín tꞌe̱to̱an chjasintajni la imá tꞌe̱tue̱nhen sín kaín chojni la ko tí sín imá tjetoan mé imá nchehnkehe a̱sén sín kíxin ihyé sín tsꞌe̱to̱an sín.
43 Kjánchó jahará la xi̱kahya chrókjui̱chꞌerá. Náhí. Tí jnkojínrá tjinkáonrá chrókuéto̱anrá la chrókjuínki̱tsará tí í so sín.
44 A̱ ntá tió jnkojínrá a̱ntsí chrókuéto̱anrá mé tꞌichjánxi̱n senó chrókjuáko̱xi̱nrá chrókjui̱chꞌeherá kíchuárá xra̱.
45 Kíxin tí Xje̱en Dios Kꞌóna Chojni mé kuihya chꞌán kíxin chojni chrókjuichꞌehe chꞌán xra̱. Náhí. Ikui chꞌán kíxin sichꞌehe chꞌán sín xra̱ la ko tsꞌenyákonhe̱n nchónhya chojni kíxin tsaáxin sín chꞌán ―ichro chꞌán.
Chꞌín Bartimeo kꞌuékꞌikonhya chꞌán ntá chꞌín Jesús kjuínchekito̱he chꞌán jína
(Mt. 20.29-34; Lc. 18.35-43)
46 Ntá kjuíji sín chjasin Jericó. Ntá chꞌín Jesús la ko tí sín kꞌuájiko chꞌán la ko nchónhya chojni kꞌuaxrjexín sín tí chjasin ntiha. Ntá ntiha tjen ijnko chꞌín tꞌikonhya mé itꞌin chꞌán Bartimeo ntá itꞌé chꞌán mé itꞌin Timeo. Tjetja̱xi̱n chꞌán chrínta nti̱a tjanchakꞌá chꞌán.
47 Ntá kuínhin tí chꞌín tꞌikonhya kíxin ó kuichjina chꞌín Jesús, mé tí nkexro kjui̱xi̱n chjasin Nazaret, ntá tí chꞌín tꞌikonhya kjuankíxin tꞌèya chꞌán ntáchro chꞌán kíxin:
―Jaha Jesús, tsíkꞌaxrjeníxian chꞌín David ti̱konóe̱héni ―ichro chꞌán.
48 Ntá nchónhya sín kꞌue̱tue̱nhen sín chꞌán kíxin tso̱tání chꞌán. Ntá íchá a̱ntsí má tsen tꞌèya chꞌán ntáchro chꞌán kíxin:
―Jaha, tsíkꞌaxrjeníxian chꞌín David ti̱konóe̱héni ―ichro chꞌán.
49 Ntá ntahó kjuákꞌe chꞌín Jesús. Ntá kꞌue̱to̱an chꞌán kíxin:
―Tꞌi̱ye̱hérá tí chꞌín a ―ichro chꞌán.
Ntá kꞌuíye̱he̱ sín tí chꞌín tꞌikonhya ntá chénka sín chꞌán kíxin:
―Tócháha la tꞌinkatjen kíxin tjetꞌiya̱ha chꞌán. ―ichro sín.
50 Ntá kjua̱kꞌe̱ chꞌán tí ka titsáte chꞌán ntá chrika kꞌuínkatjen chꞌán kóchjinehe chꞌán tí tjen chꞌín Jesús.
51 Ntá chꞌín Jesús kjuanchankíhi chꞌán tí chꞌín a kíxin:
―¿Xá nkehe tjinkávan chrókjui̱tꞌahá? ―ichro chꞌán.
Ntá kjuáte̱he tí chꞌín tꞌikonhya ntáchro chꞌán kíxin:
―Maestro, tjinkaonni kíxin chrókꞌuikonni ―ichro chꞌán.
52 Ntá ntáche chꞌín Jesús tí chꞌín a kíxin:
―Ijie la jína sátsjia. Ó kuíto̱ha jína kíxin kuítekávan tí janhan ―ichro chꞌán.
Ntá tuénxín tí chꞌín tꞌikonhya la ó kꞌuíkon chꞌán ntá chréhe̱ chꞌán tí chꞌín Jesús.