☰ Markus 2
2
Yesus kas sembu orang lumpu satu
2:1-12
(Mat 9:1-8; Luk 5:17-26)
1 Lewat brapa hari begini, waktu Yesus kembali ke Kapernaum, kabar tasebar ke mana-mana kalo Yesus su ada di ruma. 2 Trus orang banyak skali datang sampe tempat penu, di depan pintu juga trada tempat kosong lagi. Waktu Yesus kastau Allah pu pesan ke dorang, 3 ada orang-orang datang bawa orang lumpu satu ke Yesus, empat orang dari dong yang bantu bawa dia. 4 Dong tra bisa bawa de ke Yesus karna orang banyak skali, jadi dong buka atap yang Yesus ada bediri di bawa, trus waktu atap su tabuka dong kas turun orang lumpu itu deng tikar yang de pake tidur. 5 Waktu Yesus liat dong percaya skali, De bilang sama orang lumpu itu, “Anak, ko pu dosa-dosa su dapa kas ampun!”
6 Tapi ada brapa guru agama yang ada duduk disitu pikir, 7 “Brani skali De bicara begitu, De hina Allah! Cuma Allah saja yang bisa kas ampun dosa.”
8 Tapi, dalam hati Yesus su tau apa yang dong pikir, jadi De bilang dorang, “Knapa kam pikir begitu dalam kam pu hati? 9 Mana yang lebi gampang, bilang ke orang lumpu ini, ‘Ko pu dosa-dosa su dapa kas ampun’ ato bilang, ‘Bediri suda! Angkat ko pu tikar baru jalan’? 10 Tapi, supaya kam tau kalo di dunia ini, Sa Anak Manusia pu kuasa kas ampun dosa, liat ini!” Trus Yesus bilang sama orang lumpu itu, 11 “Sa bilang ko, bediri, angkat ko pu tikar trus pulang ke ko pu ruma!”
12 Orang itu langsung bediri trus angkat de pu tikar baru jalan kluar di depan smua orang, jadi dong smua heran trus puji Allah. Dong bilang, “Tong blum perna liat yang macam begini.”
Lewi tukang tagi pajak ikut Yesus
2:13-17
(Mat 9:9-13; Luk 5:27-32)
13 Habis itu Yesus ke pinggir danau Galilea lagi. Orang banyak smua datang ke Dia, trus De kas ajar dorang. 14 Trus waktu Yesus jalan lewat disitu, De liat Lewi, bapa Alfeus pu anak, ada duduk di tempat tagi pajak, trus Yesus bilang ke dia, “Mari, ko ikut Saya.” Dengar begitu, langsung Lewi de bediri trus ikut Dia.
15 Trus waktu Yesus ada makan di Lewi pu ruma, banyak tukang tagi pajak* deng orang-orang yang bikin dosa yang makan sama-sama Yesus deng De pu murid-murid, karna banyak orang juga yang ikut Dia. 16 Waktu guru-guru agama dari klompok orang Farisi† dong liat kalo De ada makan deng tukang tagi pajak deng orang-orang yang bikin dosa itu, dong bilang ke De pu murid-murid, “Ih, bisa eh, De makan sama-sama deng tukang tagi pajak deng orang-orang yang bikin dosa?”
17 Yesus dengar yang dong bicara trus De bilang ke dorang, “Bukan orang yang sehat yang perlu dokter, tapi orang sakit. Sa tra datang untuk panggil orang yang rasa diri benar, tapi untuk panggil orang yang bikin dosa.”
Tentang puasa
2:18-22
(Mat 9:14-17; Luk 5:33-39)
18 Satu kali begini, waktu Yohanes Tukang Baptis pu murid-murid deng orang-orang Farisi ada puasa, orang-orang datang baru bilang ke Yesus, “Knapa Yohanes pu murid-murid deng orang Farisi pu murid-murid dong biasa puasa, tapi Bapa pu murid-murid tidak?”
19 Yesus jawab dong begini,
“Bisa ka, kalo pengantin laki-laki pu teman-teman dong puasa waktu pengantin itu ada sama-sama deng dorang? Dong tra bisa puasa slama pengantin itu ada sama-sama deng dorang. 20 Tapi nanti ada de pu waktu untuk pengantin dapa ambil dari dorang, pas waktu itu baru dong puasa.
21 Trada orang yang tempel kain spanggal yang baru di baju lama to? Karna kalo bikin begitu, kain yang baru itu nanti bikin robek baju yang lama itu, trus de pu robek tamba besar lagi.
22 Begitu juga trada orang yang isi air anggur yang baru ke dalam kantong kulit yang lama. Karna kalo bikin begitu, nanti air anggur yang baru itu bikin robek kantong itu, jadi nanti kantong rusak trus anggur tabuang.‡ Jadi, air anggur yang baru itu orang harus simpan di dalam kantong kulit yang baru juga.”§
Yesus kas ajar tentang orang Yahudi pu hari Sabat
2:23-28
(Mat 12:1-8; Luk 6:1-5)
23 Satu hari begini, waktu orang Yahudi pu hari Sabat, Yesus deng De pu murid-murid jalan di kebun gandum. Waktu dong jalan, De pu murid-murid petik biji-biji gandum. 24 Trus orang-orang Farisi bilang ke Yesus, “Liat! Knapa di tong pu hari Sabat dong bikin apa yang hukum Musa larang?”
25 De jawab dorang,
“Kam blum perna baca ka yang Daud bikin, waktu de sama orang-orang yang ikut dia dong trada apapa trus dong lapar? 26 De masuk ke dalam Ruma Allah waktu Abyatar jadi Pemimpin Imam, trus makan roti yang su kasi sama Allah itu, baru kasi sama dong yang ikut de juga.✡ De bikin begitu padahal hukum Musa larang orang-orang makan roti itu, hanya imam-imam saja yang bisa makan.”
27 Trus Yesus bilang ke dorang, “Hari Sabat itu Allah bikin untuk tolong manusia, Allah tra bikin manusia cuma untuk ikut praturan hari Sabat saja.* 28 24 Jadi, Sa Anak Manusia pu kuasa atas hari Sabat juga.”
* 2:15 tukang tagi pajak ‒ Orang Yahudi tra suka skali sama orang-orang yang tagi pajak karna dong kerja untuk pemrinta Roma, trus dong tagi lebi dari yang orang harus bayar, biar dapat untung. † 2:16 Orang Farisi ‒ Itu nama klompok di agama Yahudi, klompok ini dong rajin skali ikut aturan-aturan yang Musa kasi, juga ada banyak aturan lain yang dong su tamba. Dong ikut smua aturan itu karna dong pikir kalo bikin begitu, dong jadi bersi deng pantas untuk ibada ke Tuhan. ‡ 2:22 kantong rusak trus anggur tabuang ‒ Kantong ini dong bikin dari binatang pu kulit. Kantong kulit yang baru itu bisa tatarik, tapi kalo yang su lama itu su kras deng kaku jadi gampang pica. Air anggur yang baru itu ada gas dari proses fermentasi, jadi air anggur yang baru harus isi di kantong kulit yang baru. Kalo isi di kantong kulit yang lama, nanti bisa pica karna anggur pu gas. § 2:22 Dari dua conto ini, Yesus kas beda hal yang lama deng hal yang baru. Trus conto ini De bicara waktu De dapa tanya tentang orang Yahudi pu aturan tentang puasa. Jadi, Yesus pu maksud tu, De pu ajaran tra bisa kas satu deng ajaran yang lama dari nene moyang. ✡ 2:26 1 Samuel 21:6 * 2:27 Hari Sabat itu ... ikut praturan hari Sabat saja ‒ Bahasa Yunani: Hari Sabat dapa buat untuk manusia, bukan manusia untuk hari Sabat.
☰