14
Abram kas kala raja-raja di timur untuk tolong Lot
14:1-16
1 Pas waktu itu, orang Babilonia pu raja Amrafel, orang Elasar pu raja Ariok, orang Elam pu raja Kedorlaomer, deng orang Goyim pu raja Tideal,
2 dong ada mo baku prang lawan kota Sodom pu raja Bera, kota Gomora pu raja Birsya, kota Adma pu raja Syinab, kota Zeboim pu raja Syemeber, gabung deng kota Bela pu raja. Kota Bela tu kota Zoar suda.
3 Jadi, lima raja ni dong gabung sama-sama di bagian tana renda di Sidim, di daera Laut Mati.
4 Dong su 12 taun dapa injak-injak sama raja Kedorlaomer jadi, pas taun ke 13, lima raja ini dong balik lawan.
5 Di taun ke 14, raja Kedorlaomer deng raja-raja yang sama-sama deng dia, dong gabung untuk mo baku lawan deng raja lima itu. Dong mulai deng kas kala orang-orang dari suku-suku lain dulu. Mulai dari orang-orang Refaim di daera Asterot-Karnaim, orang-orang Zuzim di daera Ham, deng orang-orang Emim di daera Syawe-Kiryataim.
6 Trus dong kas kala orang-orang Hori yang di gunung-gunung Seir tu, dong kejar sampe ke daera El-Paran pas di batas tempat sepi yang kring.
7 Habis dari situ, dong balik ke daera En-Mispat, yang orang lebi kenal deng nama Kades. Trus raja-raja itu dong kas kala orang Amalek trus ambil dong pu daera smua. Dong juga kas kala orang Amori yang tinggal di daera Hazezon-Tamar.
8-9 Habis empat raja ini dong kas kala orang-orang smua tu, dong siap-siap pi baku lawan deng lima raja yang ada gabung di daera tana renda di Sidim. Dong mo pi kas kala lima raja itu. Jadi, kota Sodom, kota Gomora, kota Adma, kota Zeboim, deng kota Bela yang pu nama lain Zoar ni, dong pu raja-raja atur barisan pigi prang lawan orang Elam pu raja Kedorlaomer, orang Goyim pu raja Tideal, orang Babilonia pu raja Amrafel, deng orang Elasar pu raja Ariok. Jadi, ada empat raja lawan lima raja.
10 Di daera tana renda di Sidim ni, ada sumur aspal banyak di situ. Jadi, pas waktu kota Sodom pu raja deng kota Gomora pu raja dong mo lari dari prang, ada yang jatu ke dalam situ. Orang-orang lain yang masi hidup tu, dong lari pi ke daera gunung-gunung.
11 Kota Sodom deng kota Gomora pu barang-barang smua deng makanan-makanan juga, dong pu lawan ambil smua, trus bawa pigi.
12 Waktu itu, Lot yang Abram pu sodara pu anak tu dapa bawa juga. Lot pu barang-barang smua juga dong bawa pigi. Itu gara-gara Lot dong waktu itu tinggal di kota Sodom.
13 Begini, ada orang satu yang slamat. De lari trus pi crita yang jadi tu sama Abram, orang Ibrani itu. Waktu itu, Abram de tinggal di tenda dekat pohon-pohon besar yang di Mamre pu tempat itu. Mamre itu orang Amori, de pu sodara Eskol deng Aner. Dong tiga deng Abram su baku janji untuk baku bantu waktu ada prang nanti.
14 Waktu Abram dengar kalo de pu sodara pu anak ada dapa tahan, Abram de kas kumpul de pu orang-orang yang memang su dapa kas siap untuk prang. De pu orang-orang ni yang memang lahir besar di de pu ruma. Dong pu banyak tu ada 318 orang. Dong kejar dong pu lawan ni sampe ke daera tana Dan.
15 Pas malam yang dong mo mulai srang, Abram bagi-bagi de pu orang-orang jadi brapa klompok trus dong maju srang dong pu lawan dari smua ara. Abram dong kas kala, trus dong kejar dong pu lawan tu sampe ke daera Hoba di kota Damsik pu sebla utara.
16 Baru, Abram de bawa kembali smua barang-barang yang de pu lawan bawa itu. Abram juga bawa de pu sodara pu anak Lot ni deng Lot de pu barang-barang smua juga. Orang-orang deng prempuan-prempuan yang dapa tahan juga tu, Abram bawa kembali.
Abram ketemu deng Melkisedek
14:17-24
17 Waktu Abram de kembali dari kas kala Kedorlaomer deng raja-raja yang sama-sama deng Kedorlaomer itu, kota Sodom pu raja kluar sambut dia, di daera tana renda Syawe. Ini tempat yang dong biasa bilang ‘Raja pu Tana Renda.’
18 Waktu itu, Melkisedek yang jadi raja tana Salem ni, de juga datang bawa roti deng minuman anggur. De ni juga imam dari Allah Yang Paling Besar.
19 De datang trus de minta berkat untuk Abram. De bilang begini,
“Sa minta Allah Yang Paling Besar, yang bikin langit deng bumi,
De kasi berkat ke Abram.
20 Puji Allah Yang Paling Besar!
Karna Allah su kasi ko pu lawan-lawan ke ko, supaya ko kas kala dorang.”
Baru, Abram de kasi satu dari tiap spulu barang yang de ada bawa smua tu.
21 Habis itu, kota Sodom pu raja bilang ke Abram begini, “Abram, barang-barang yang ko ada bawa kembali tu, ko bisa ambil. Tapi, sa pu orang-orang yang ko ada bawa pulang tu, mari! Kas kembali ke sa suda.”
22 Tapi Abram bilang ke Sodom pu raja itu begini,
“Sa su sumpa demi TUHAN, Allah Yang Paling Besar yang bikin langit deng bumi, begini,
23 ‘Sa trakan ambil apapa dari yang ko punya ini. Biar mo benang ato sendal pu tali juga, sa trakan ambil.’ Itu supaya, jang sampe nanti ko bilang kalo ko yang bikin Abram jadi kaya lagi.
24 Kalo sa, sa trakan ambil apapa! Hanya yang sa pu orang-orang dong su makan itu, deng Aner, Eskol, sama Mamre dong yang pigi ikut sa prang, biar dong saja yang ambil dong pu bagian masing-masing.”