Unang Surat i Pablo dut mengeꞌ tawʼt
TESALONIKA
Kepurisnan et itueng Surat neng 1 Tesalonika
Maya tantung lungsud eset tampar kilid et dagat pegneranaʼt Tesalonika, itue sakup et Probinsiya et Masedonia, sembatung probinsiya et bangsa neng Roma. Diminuntin si Pablo apang tumagnaꞌ duun sembatung ketimung-timungan et mengeꞌ mengengandel i Jesus Kristo. De Silas bekeꞌ si Timoteo megbebayaꞌ kenye. Segwaꞌ sengkerit neng timpu ga tineteg dye esentin sabab sebarang ibang mengeꞌ saliꞌsaling Judio in minendinan dye pebunayag i Pablo. Indyari pinenempeg dye esentin.
Pegketbes na dye in sempegen, siminusa si Pablo pasal eset mengeꞌ mengengandel esentin. Pegpikiren ye na kaluꞌ seulinen dye kedyeng pegbuwaten, sabab sebarang pemanta kedye eset ating lelegdengan na tantung tiksaen dye banar. Bekeꞌ masi nega kaya ne misan sembatung meibut dye. Atin ne punsabab pineseuliꞌ i Pablo si Timoteo apang mesewran itueng pegbuwaten dye duntin.
Enung kesegyaan i Pablo ganang nekepeuliꞌ ne si Timoteo mewanan duntin bekeꞌ nesewran ye na itueng mengeꞌ mengengandel pelahyun et pegandel misan ne sebarang pemanta kedye in peglahyun peniksaꞌ eset kedye.
Sasat si Pablo dut lungsud et Korinto, ya in negsurat kedye. Tantu banar na pegbentugen ye Empuꞌ eset kedyeng kepuspusaʼt penggiginewanan, kumseg dye apang meglahyun mengengandel na misan enu nega meinabung ketiksaan dye. Sinambag ye gasi kedyeng mengeꞌ keingkutan pasal eset pegpeuliꞌ i Jesus Kristo, bekeꞌ pasal dut baꞌ enukwanen et Empuꞌ biyagen peuliꞌ dut kedyeng lelebngan pegdateng et ating eldew.
Ketulduan et itueng Surat
Penegnaan 1:1
Si Pablo Megbegey et Peseselamat bekeꞌ Pegdayew 1:2—3:13
Pegtulduan Dye i Pablo pasal eset Kedyeng Diring Arat 4:1-12
Ketulduan i Pablo pasal et Pegseuliꞌ i Jesus neng Kristo 4:13—5:11
Si Pablo Pegtulduꞌ et Emuring Induanan 5:12-22
Penelang i Pablo dut Empuꞌ eset mengeꞌ Mengengandel 5:23-24
Emuring Beres bekeꞌ Penektak i Pablo Kedye 5:25-28
1
1 Mawaꞌ kire Pablo, ki Silas bekeꞌ ki Timoteo.
Dut ketimung-timungan et mengeꞌ taaw et lungsud et Tesalonika, dye in nemengandel dut Empuꞌ Amaꞌ bekeꞌ Begerar neng si Jesus Kristo. Meseʼt dimyu teyen redyikiꞌ bekeꞌ kesenangan.
Kebiyagan bekeꞌ Pegandel et mengeꞌ Taaw dut Lungsud et Tesalonika
2 Daran-peraran kay pegpeselamat dut Empuꞌ pasal et dimyu ginsan, bekeꞌ pegbentuen kay kemyu et damen neng pegpenelangin.
3 Daran kay pegrendemen dut elepan et Empuꞌ Amaꞌ tyu dimyung menungang keradya et pegandel myu. Sampay daran kay pegrendemen dimyung pengsengsaraꞌ, sabab et dimyung pegmergaꞌ dut Empuꞌ, bekeꞌ dimyung mepangger na pegarap dut Begerar tyu, ne si Jesus Kristo, na peguliꞌ ye atuʼt dunyaꞌ.
4 Mengeꞌ ketipusdan, sewd kay ne pegmerganen kew et Empuꞌ, bekeꞌ sewd kay gasi kemyu mengeꞌ piniliꞌ ye.
5 Sabab pineabar kay et dimyu na Menungang Abar, na diki lamang et merugey na bebresan et taaw, temed teyeg et keksegan et Empung Nakem. Bekeꞌ sewd kay ne itue tantung kebenaran mawaꞌ negaʼt Empuꞌ. Kwit tiꞌ pegbeꞌbayaꞌ tyu negaʼt dimyu tiꞌ nebiriꞌ myu baꞌ enukwan arat kay. Binaal kay ginsan dut kenunganan myu.
6 Nesunsunan myu kami bekeꞌ ating Begerar neng si Jesus, misan ne kelang ketiksaan, sabab et tinerima myu Menungang Abar na maya keksanan na binggey et Empung Nakem.
7 Na, negmendyaring sungtuhan kew et ginsan neng megpengandel dut probinsiya et Masedonia bekeꞌ probinsiya et Akaya.
8 Sabab bebresen et Begerar limingkep teyeg dimyu dut mengeꞌ probinsiya et Masedonia bekeꞌ Akaya. Misan diki lang atin, sampay dimyung pegandel nesewran et embe-embe. Angkansa misan diki kay ne megsugid pasal et atin, sewd dye ne.
9 Dye ne pegsugid baꞌ enukwan pegterima myu damen. Pegsugiren dye baꞌ enukwan ne seulinen myu Empuꞌ, teyeg dut pegempuꞌempuen. Na tiban megpenimbahat kew ne dut kebiyag-biyagan naꞌ Empuꞌ banar.
10 Sampay tumagey kew et pegdateng et ating Yegang et Empuꞌ naꞌ si Jesus, teyeg dut langit. Na ya ne in binyag peuliꞌ et Empuꞌ Amaꞌ teyeg dut kepeteyan ye. Na itueng si Jesus gasi tumabang kityu, eset megderateng naꞌ iseg et Empuꞌ dut emuring eldew.