6
Keyeatan et Ginsan Taaw
1 Neinabu itue ganang kiminansang ne taaw et sengkelungsuran sampay ipinengyegang dye mengeꞌ kelilibunan.
2 Pegkaꞌ nebiriꞌ et mengeꞌ keyegangan et Empuꞌ Elohim na mededagbes mengeꞌ kelilibunan neng keyegangan et mengeꞌ taaw, inesawa dye mayang negayan dye.
3 Sinugid i Yahweh, kwan, “Diki ne tumeteg misan ingyan Nakem ku sabab taaw dye lang na matey. Segwaꞌ tihad tiban, senggatus duwampulung teun mene umur dye.”
4 Ating masa neng tagnaꞌ tiꞌ, inulid et mengeꞌ keyegangan et Empuꞌ Elohim mengeꞌ kelilibunan et taaw. Pinengyegang dye derekerang taaw neng betangen Nepilim. Metaas bekeꞌ bantug banar neng taaw mengeꞌ itue.
5 Mekansang ne banar mengeꞌ kedusaan et mengeꞌ taaw atuʼt dunyaꞌ bekeꞌ meraat ginsan penedseled bekeꞌ pikir dye. Nesewran itue i Yahweh.
6 Angkansa, negsusun si Yahweh sabab ginuna ye ketaawan, bekeꞌ riminupuk ya set seled ye.
7 Angkansa, sinugid i Yahweh, “Imeteyen ku ne mengeꞌ taaw neng ginuna ku et sengkedunyaan bekeꞌ mengeꞌ ayup sampay mengeꞌ kebegitan, sabab merupuk ku na ginuna ku dye.”
8 Segwaꞌ, si Noe ga metignaꞌ bekeꞌ pinenep ye si Yahweh.
Si Upuꞌ Noe
9 Itue ne tuturan pasal ki Noe sampay mengeꞌ keyegangan ye. Metignang taaw si Noe. Kaya nesumbung kenye et mengeꞌ tawʼt timpu ye. Mesinunuren ya et Empuꞌ Elohim.
10 Telung kelelekian keyegangan i Noe. Mengeꞌ ngaran dye si Sem, si Ham sampay si Japet.
11 Segwaꞌ mesewala banar mengeꞌ tawʼt dunyaꞌ eset pemiriꞌ et Empuꞌ, bekeꞌ limingkep keeriweraan dut ginsaʼt dunyaꞌ.
12 Nebiriꞌ et Empuꞌ Elohim na meyaat banar mengeꞌ tawʼt sengkelungsuran. Pineraat et ginsan neng taaw keradya dye atueʼt dunyaꞌ.
Pinebaal et Kelang Kapal Letew si Noe
13 Angkansa, sinugid et Empuꞌ Elohim ki Noe, kwan, “Nepikir ku tepuen ku ne ginsan taaw sabab melanduꞌ ne keeriweraan et dunyaꞌ sabab et keradya dye. Angkansa, tepuen ku ne dye bekeꞌ binesanen ku dunyaꞌ.
14 Angkansa, pemaal ke ne et kelang kapal letew neng kayu na ingaran sipres. Baalaꞌ et mengeꞌ bibilik dut seled bekeꞌ tensekiꞌ et saleng liwan sampay seled.
15 Kwantin baalaꞌ. Siyam neng pulung depa kebuwaten bekeꞌ sempuluꞌ limang depa lekbang ye sampay siyam neng depa langkew.
16 Sepewiꞌ bekeꞌ dingdingaꞌ seked duwang dangew tengaꞌ mene metinda. Sembelang kilid lang baalaꞌ et lelengewan. Petagiꞌ et telung patag.
17 Sabab aku banar, aku megpeliyud et dunyaꞌ apang mebinasa ginsan neng ayup bekeꞌ taaw dut sengkedunyaan. Matey ginsan indeginis neng megiginawa.
18 Segwaꞌ, pegsulutan ku ikew ipebeyaaꞌ esawa mu bekeꞌ keyegangan mu lelaki sampay kesewanan dye, megsesakat kew seled et kapal letew.
19 Pesakat ke gasi dut kapal letew et tegsembatung ginisan et mengeꞌ megesawa neng ayup apang dye gasi megbiyag kebayaꞌ dimyu.
20 Pesakat gasi et tegduruwang ginisan et mengeꞌ begit bekeꞌ mengeꞌ ayup iba gasi mengeꞌ meglempey et lugtaꞌ apang dye gasi megbiyag.
21 Pegpanyap et ginsan neng pegkaan apang kekaan kew bekeꞌ ginsan neng ayup.”
22 Kineradya i Noe ginsan neng tinahag kenye et Empuꞌ Elohim.