4
Pinatey i Kain si Abel
1 Gana-gana, inulid i Adan esawa ye empaꞌ ne negbeteng. Ganang nengganak ne si Eba, sinugid ye, kwan, “Negyegang ku et lelaki sabab et tabang i Yahweh.” Angkansa, si Kain ngineranan kenye.
2 Indyari, sinunuran nega si Kain et sembatung lelaki. Abel gasi ngineranan kenye. Mengingipat et ayup itue. Si Kain gasi mengunguma.
3 Neinabu ganang nekwit ne, negey si Kain ki Yahweh et inumanan ye.
4 Nisiꞌ gasi si Abel et ukaꞌ et ipatan ye. Pinatey ye bekeꞌ binggey ki Yahweh menungang bagiꞌ. Tinerima i Yahweh si Abel sampay begey ye.
5 Segwaꞌ, kaya tinerima i Yahweh si Kain sabab et begey ye. Angkansa, niseg si Kain bekeꞌ negyeat rupa ye.
6 Angkansa, sinugid i Yahweh, “Enu pegisgan mu, bekeꞌ manu negyeat rupa mu?
7 Baꞌ menunga kineradya mu, manu diki terimanen ke? Segwaꞌ, baꞌ kaya menunga pegkeredyanen mu, megapaꞌ dimu keselaan. Gay ye ikew. Segwaꞌ, keilangan deagen mu ya.”
8 Na, sembatung eldew pinekebian i Kain tipused ye. Kwan ye, “Abel, dumun teʼt uma.” Giminay gasi si Abel. Ganang duun dye neʼt uma, rinuhub i Kain si Abel bekeꞌ pinatey ye.
9 Indyariꞌ kwan i Yahweh ki Kain, “Embe si Abel neng tipused mu?” Kwan ye, “Iste ku. Pegtetengman ku takuꞌ tipused ku?”
10 Sinugid i Yahweh, “Kain, enu takuꞌ binwat mu kenye? Kinggaꞌ, duguꞌ et tipused mu samat pengliliguan ye na negpepeingasiꞌ na dusaen ku ating taaw na nematey kenye.
11 Tiban terwanan ke et lugtaꞌ neng siminepsep et duguʼt tipused mu neng pinatey mu.
12 Ganang menguma ke, diki ke ne beraan et luluwaken. Sampay daran ke mepinenewen et misan embe-embe lang.”
13 Indyariꞌ sinugid i Kain ki Yahweh, “Limimbi ne et gees ku pengrega daken.
14 Birinaꞌ tiban, sinempeg mu ne aku et atueng lungsud sampay pinerayuꞌ mu aku eset elepan mu. Mepinenewen et misan embe-embe lang atueʼt dunyaꞌ, sampay kaya lelegdengan ku. Sinu-sinu kekita daken mengimatey daken.”
15 Kwan i Yahweh kenye, “Diki ne. Sebarang mematey ki Kain belsen et kepitung pengrega.” Angkansa, binggeyan si Kain et tendaꞌ apang diki ya imeteyen et misan sinung kesusup kenye.
16 Indyariꞌ nugad si Kain ki Yahweh, negubuꞌ dut lungsud et Nod, dut tampar emihan et Eden.
Keyegangan i Adan mura et Kelang Liyud
17 Inulid i Kain esawa ye. Negebteng sampay pinengganak ye yegang ne lelaki neng si Enok. Negpetiyeg et kelang kebebenwanan si Kain. Ngineranan ye et Enok samat ingaran et yegang ye.
18 Yegang i Enok si Irad. Yegang i Irad si Mehujael. Yegang i Mehujael si Metusael. Yegang i Metusael si Lamek.
19 Si Lamek in maya duwa esawa ye, de Ada bekeꞌ si Silla.
20 Pinengyegang dut ki Ada si Jabal. Dye in minewanan et mengeꞌ taaw na nemenglegdeng et tetluan bekeꞌ mengingipat mengeꞌ ayup.
21 Tipused i Jabal si Jubal. Amaꞌ ya et mengeꞌ mememagang bekeꞌ menunuling.
22 Dut ki Silla neng sembatung esawa i Lamek pinengyegang si Tubal Kain. Ya menenelsal et ginsan ginisan neng kesengkapan teyeg et tumbaga bekeꞌ besiꞌ. Maya nega gasi tipused ye libun, ngaran ye si Naama.
23 Kwan i Lamek et duwey ye, “Ada, Silla, kinggaꞌ myu aku. Kemyung mengeꞌ duwey ku, kinggaꞌ myu beres ku. Maya pinesakit daken et budyang lelaki, tebes pinatey ku ya.
24 Baꞌ maya peteyen si Kain, beles dut nepepatey kepitu. Segwaꞌ, baꞌ aku peteyan, pitumpuluꞌ pitung beles gasi.”
Si Set bekeꞌ si Enos
25 Inulid gasi i Adan esawa ye. Negebteng bekeꞌ pinengganak sembatu gasing lelaki. Sinugid et induꞌ, “Binggeyan aku et Empuꞌ Elohim et yegang neng ganti i Abel neng pinatey i Kain.” Ngineranan dye ye si Set.
26 Yegang i Set si Enos. Ating timpu timinagnaꞌ pegempuꞌ dye ki Yahweh neng Empuꞌ banar.