5
Queẍén ján na nchao tsixian na ngain cosa jianha
1 Cain chojni que ditticaon que ixin Jesús tti Cristo que Dios rroanha ngataha nontte, chojni mé xenhe Dios. Co si sinao ni ná ndodaha, cai rinao ni xenhe ndodaha mé.
2 Mexinxin si rinao na Dios co nttoho na tti jehe ttetonha, noa na que cai rinao na cain xenhe Dios, rroc̈ho cain chojni que ditticaon ngain Jesucristo.
3 Ixin si rinao ni Dios, chonda que sitticaon ni tti jehe ttetonha, co tti jehe ttetonha tanguiha,
4 ixin cainxin chojni que xenhe Dios nchao tsixinhi na ngain cosa jianha ngataha nontte. Co tti confianza que ján na chonda na ngain Jesucristo, mé tti jointtagacha na de cain cosa jianha que jí ngataha nontte.
5 Co jeho chojni que ditticaon ixin Jesús Xenhe Dios nchao tsixinhi ngain cain cosa jianha mé.
Tti ndac̈ho Juan de ixin Jesucristo Xenhe Dios
6 Jesucristo joiguitte ngain jinda co vinttji jní are ndavenhe, jañá para cjoagoe chojni ixin Dios tti rroanha jehe. Jeoha cjoago mé are joiguitte, ixin cai cjoago mé are vinttji jní co ndavenhe. Co Espíritu Santo tti ndac̈ho ján que ixin Dios rroanha Jesucristo, co Espíritu mé tti ndoa.
7 Ngajni jí ní tti ndac̈ho ján de ixin cain jihi: Ndodá na, co Jesucristo tti dinhi Palabra, co Espíritu Santo, co canio jihi inchin jeho nacoa.
8 Co cai jí ní ngataha nontte que ndac̈ho ján de ixin cain jihi: Espíritu Santo, jinda, co jni, co canio jihi ndac̈ho ẍajeho.
9 Ján na dotticaon na tti ndac̈ho chojni, pero tti ndac̈ho Dios icha rentte, mexinxin chonda na que sotticaon na tti ndac̈ho Dios de ixin Xenhe.
10 Co tti chojni que ditticaon ngain Xenhe Dios, chojni mé ditticaon ngain ansén tti ndac̈ho Dios de ixin Jesús, pero tti ditticaonha jamé, jehe ncheguinhi Dios inchin ná tti nichja ndoaha ixin chojni mé ditticaonha tti ndac̈ho Dios de ixin Xenhe Ndo.
11 Janhi tti ndac̈ho Dios: que de ixin Xenhe, jehe Dios chjá na iná vida naroaxin que ẍonhi tiempo tsjexin.
12 Chojni que ditticaon Xenhe Dios cai chonda na jehe vida naroaxin jihi, pero tti chojni que ditticaonha Xenhe Dios, chojni mé chondaha vida naroaxin.
Juan ttjexin carté co danjo icha consejo
13 Janha rricjin nganji jaha ra ẍo ditticaon ra ngain Jesucristo, para que noha ra jian que ixin chonda ra iná vida naroaxin que ẍonhi tiempo tsjexin.
14 Ján na chonda na confianza ngain Dios ixin noa na que si sanchiehe na quexeho cosa inchin jehe rinao, jehe tsinhi quehe sanchiehe na.
15 Co jañá inchin noa na que Dios ttian na tti ján na danchiehe na jehe, cai noa na que orrochonda na tti joanchiehe na.
16 Si c̈honja chojni sicon que ná chojní Cristo jinchehe ná cosa jianha, pero cosa mé jiquininxinha para que Dios rrorroanha castigo de ndasitján almé chojni mé, chojni que sicon jamé chonda que sinchetsenhe ñao Dios para ixin chojni que jinchehe cosa jianha mé, co Dios sanjo iná vida naroaxin para ngain chojni que jinchehe cosa jianha mé, si jeha ná cosa jianha que jiquininxin castigo de ndasitján almé chojni. Jí cosa jianha que jiquininxin para Dios rrorroanha castigo de sitján almé chojni que nchehe cosa mé, co ndac̈hjanha que sinchetsenhe ni ñao Dios para chojni que nchehe cosa jianha mé.
17 Cainxin cosa jianha ncheẍoxinha Dios, pero te cosa jianha que ẍa jiquininxinha castigo de sitján almé ni.
18 Noa na que tti chojni que chonda Dios inchin Ndodé, chojni mé ncheha na sigue nchehe na cosa jianha ixin Xenhe Dios jinda chojni mé co inchínji catteha na.
19 Noa na que ján na chojní Dios na, pero tti icha chojni que ditticaonha Jesucristo, chojni mé inchínji ttetonhe.
20 Noa na cai que Xenhe Dios joí Xan ngataha nontte para ttjenguijna na Xan para datsoan na Dios tti ján ndoa. Co ján na te na ngain tti mero ndoa, rroc̈ho, ngain Jesucristo, Xenhe Dios. Jehe Xan tti mero Dios ndoa co jehe Xan tti chjá na iná vida naroaxin que ẍonhi tiempo tsjexin.
21 Jaha ra ẍo inchin xannchinnchinchjanhna, ncheha ra caso cain cosa que chojni nchesayehe inchin Dios pero que jeha Dios ndoa. Amén.