Wati Wangkatjarangku Tjawiltu Walkatjunkunytja
Joel
Nyangatja Ngaṉmanytju Nyakula Wangkanytjaku
Nyangatja Godaku tjukurpa wati wangkatjara ini Tjawiltu walkatjunkunytja. Panya wati nyanga palulawanungku Godalu wangkangu aṉangu panya Jew tjuṯangka palumpa panya walytja tjuṯangka. Munu tjananya wangkara nguḻutjunu panya tjanampa mirpaṉtju tjuṯangku tjananya pitjala pikangku pungkuku. Munu paluṟu tjanala tjukurpa tjiṉṯilykatjara wangkara aṟa kampa kutjupa utiningi, panya ngula kura puḻka mulapa tjanampa utiringkuku. Panya paluṟu tjanampa wati warmaḻa tjuṯa iyalku pitjala tjananya pikangku pungkunytjaku.
Palu Mayatja Godalu tjananya wangkara kalkuṉu panya paluṟu tjana palulakutu maḻaku aṟuringkunyangkampa paluṟu tjananya wiṟuṟa aṯunymaṟa kanyilku. Ka Tjawiltu wangkangi ngula Godaku kurunpa pitjala tjarpanytjaku tjukurtjara munu wangkatjara tjuṯangka kutju wiya palu aṉangu uwankarangka tjarpaku wati yangupala tjuṯangka, munu tjiḻpi tjuṯangka, minyma pampa tjuṯangka munu kungkawaṟa tjuṯangka kuḻu.
Munu paluṟu alatji kuḻu wangkangi panya tjiṉṯu maḻatjangka Godalu aṉangu palumpa tjuṯa tjaralku aṉangu kura tjuṯanguṟu munu tjananya paiṟa alatjiṯu iyalku ngura kurakutu kaya nyara palula tjituṟu-tjituṟu puḻka nyinaku tiṯutjara.
Ka ngula Jesunya ilkaṟikutu maḻaku ankunyangka Peterlu kulinu Tjawiltu panya walkatjunkunytja munu paluṟu Jerusalemala aṉangu tjuṯangka tjakultjunangi tjukurpa panya palunya. (Nyawa Tjawilku tjukurpa 2:28-32 munu tjukurpa panya Iyantja Tjuṯangku Palyantja 2:17-21.)
Uwa, nyangatja Tjawiltu tjukurpa walkatjunkunytja tjara kutju ngarinyi, panya nganaṉa kuwaripangkuṯu palyaṉi, palu uwankarala walkatjuṟa wiyantja wiyaṯu.
Tjukurpa nyanganpa ngarinyi:
1:1-20 Godalu aṉangu tjuṯa kura palyannyangka ngurkantaṟa wiyalku
2:12-14 Godalu aṉangu tjuṯa paintja piiwiyaringkula kura wantinytjaku
2:18-32 Godalu palumpa walytja tjuṯa aṯunymankunytjikitjangku kalkuntja
1
Godalu Aṉangu Tjuṯa Kura Palyannyangka Ngurkantaṟa Wiyalku
1 Ngayuluṉa wati ini Tjawilnga panya wati Pitjuwilku katja, munuṉa tjukurpa nyangatja Mayatja Godalu nintinnyangka kulintjatjanungku nyurala tjakultjunanyi.
2-4 Munu ngayulu nyanga alatji wangkanyi, “Kulilaya aṉangu Judah-nya nguraṟa tjuṯangku, tjiḻpi tjuṯangku kuḻu! Panya kuwari kura puḻka nganaṉala wirkanu kura ngaṉmanyitja tjuṯangka waintaṟa mulapa. Panya tjiṉṯilyka mungilyi mulapa wirkanu kapuṯu winki munuya ukiṟi uwankara ngalkuṉu. Kaya palula tjanala maḻangka kapuṯu kutjupa wirkanu munuya ukiṟi panya palunyaṯu ngalkuṉu. Ka paluṟu tjana ankunyangka maḻangka kutjupa tjuṯa ngapartji wirkanu kapuṯu kutjupa munuya ngalkuṉu panya tjana ngaṉmanytju ngalkula wantinytjitja. Kaya maḻa kapuṯu kutjupalta pitjangu munuya paluṟu tjana uwankara ngalkula wiyaṉu nyura mai wiya alatjiṯu nyinanytjaku. Ka nyura uti aṟa nyanga palunya watarkurinytjaku-tawara nyurampa tjitji tjuṯangka tjakultjura, kaya paluṟu tjana ngapartji tjanampa tjitji tjuṯangka ngula tjakultjunkuku, kaya palu puṟunypaṯu ngula ngapartji tjakultjunkuku tjanampa tjitji tjuṯangka.
16 “Uwa, tjiṉṯilyka mungilyingkuya pitjala nganampa mai ngalkula wiyaṉu nganaṉa ngaṟala nyakunyangka. Kala nyanga alatjirinyangka nyakula nganaṉa uwankara timpulangka tjarpara Godanya waḻkuntjikitja puṯu alatjiṯu pukuḻarinyi.
17 Panya nganaṉa mai puḻka kaana tjuṯangka pakaltjingaṉu, ka nyanga kuwari uwankara wiya ngaṟanyi, ka uṉinypa kutjupa tjuṯa manta unngu kutju ngarinyi pakantja wiya. Ka wiltja panya mai uṯuḻuṟa tjunkupai tjuṯa uḻṯu ngaṟala piḻukatira mantangka ngarinyi.
18 “Kaya puluka tjuṯa waara para-pitjaliṟa mai-tjiratja mirara waṉinyi ukiṟi puṯu nguriṟa. Kaya tjiipi munu nanikuta tjuṯa kuḻu paḻtjatjiratja wawanyarira ngarira waṉinyi.
19-20 Kaṉa Mayatja kuwari nyuntula tjapini nganaṉanya alpamilantjaku. Panya kuḻi puḻka ngaṟanyangka ailuru puḻkaringu, ka ukiṟi puṉu kuḻu uwankara wiyaringkula piḻṯiringu. Ka wanyu kuka puṯitja tjuṯa kuḻu alpamilala, panya tjanampa mina wala tjuṯa kuḻu piḻṯiringkula waṉaṉu uwankara alatjiṯu.”