9
Tiinta Miḻmiḻpa Mantatja Munu Ilkaṟitja
1-3 Palu aṟa ngaṉmanyitjangka Godalu tjukurpa tjuṯa wangkara ungu tjana kuliṟa tjukaṟurungku palunya waḻkuntjaku inmangka. Munu tjukurpa kutjupa tjuṯa wangkara ungu tiinta miḻmiḻpa tjukaṟurungku palunyaṯu palyantjaku inmaku. Kaya mulapaṯu palyaṉu tiinta panya palunya munuya pala palula inma kanyiningi. Ka tiinta panya paluṟu kampa kutjaratjara, kampa tjangaṯitja ngura miḻmiḻpa, ka kampa kutjupa munkaritja ngura miḻmiḻpa mulapa, ka nguṟur-kutjara mantara wiṟu waṟaly-waṟalyngaṟala angatjunangi kampa nyara munkaritja. Ka kampa tjangaṯitjangka puṉu tili tjuṯatjara ngaṟangi. Ka taipula kuḻu ngaṟangi mai nyumatjara panya miḻmiḻmaṟa Godanya ungkunytja.
4 Ka kampa munkaritjangka ngura panya miḻmiḻpa mulata piti gold-nguṟu palyantja ngaṟangi. Ka piti unngu kutjupa kutjupa ngaringi panya tjana kutjalpai wiṟu paṉṯinytjaku. Ka pakutja puḻka panya kalkuntjitja kuḻu kampa pala palula ngaringi puṉunguṟu gold-nguṟu palyantja. Ka pakutjangka unngu walpayaṯa puṟunypa gold-nguṟu palyantja ngaṟangi mai panya manna-tjara. Ka Aaronku tjukara kuḻu ngaringi pakutjangka unngu. Panya iriti puṉu tjalytjaṟuru tjuṯa pakaṉu tjukara pala palula. Ka apu tjiwa kutjara kuḻu pakutja palula unngu ngaringi, tjukurpa panya puḻka tjuṯatjara panya Godalu walkatjuṟa ungkunytja.
5 Ka pakutja pala palula katu angelpa puṟunypa kutjara nyinangi nyaḻpitjara gold-nguṟu palyantja. Nyanga paluṟu pula panya Godanya nyinanytja utini. Munu pula nyaḻpi kutjara lipiringkula ngaparku nyinara pakutja anga-tjutuṟa nyinangi. Ka palula pulala nguṟurpa nyinara Godalu aṉangu tjuṯaku ngaḻṯuringkupai, munu tjukurtjara puḻkangku pakutja palunya milkaḻingka kurpinnyangka paluṟu aṉangu tjuṯa kura tjuṯa palyantjitjanguṟu kalypangku wantipai pungkunytja wiyangku. (Uwa, tjinguṟuṉa tjukurpa kutjupa tjuṯa wangkama tiinta nyanga palunyatjara, palu kuwariṉa wantinyi muṯumuṯu walkatjunkunytjikitjangku.)
6 Ka panya tjana tiinta, munu pakutja panya, kutjupa kutjupa tjuṯa kuḻu tjukaṟurungku palyaṟa wiyaṉu. Kaya palulanguṟu tjiṉṯu kutjupa tjiṉṯu kutjupa wati tjukurtjara tjuṯa tjarpangi tiinta panya kampa tjangaṯitjangka, ngura panya miḻmiḻṯa, munuya waṟka tjanampa palyaningi.
7 Palu kampa panya munkaritja miḻmiḻpa mulapa, ka wati tjukurtjara puḻka kutju tjarpapai nyara palula, kuḻingka kutju tjuṯa-aṟa wiya, kutju-aṟa. Munu paluṟu maṟalpa tjarpanytja wiya, kukaku milkaḻi pitingka katira kutju tjarpapai, munu Godanya nintilpai paluṟu nyakula palunya munu aṉangu tjuṯa kuḻu kalypangku pungkuwiyangku wantinytjaku paluṟu tjana kura tjuṯa watarkungku palyannyangka.
8 Ka aṟa nyanga palula tjanalanguṟu Kurunpa Miḻmiḻṯu nganaṉanya nintini nyanga alatji kulintjaku, panya aṟa ngaṉmanyitja tiinta miḻmiḻpatjara ngaṟanyangka nganaṉa puṯu tjarpanyi kampa munkaritjangka panya miḻmiḻpa mulata. Nyanga paluṟu nganaṉanya nintini panya nganaṉa puṯu Godala tjunguringanyi.
9 Ka pala palulanguṟu nganaṉa kuwari kulini aṟa panya ngaṉmanyitjangku nganaṉanya puṯu kurunpa palyaṉi Godala tjunguringkunytjaku. Panya tjana kuka mai katira ungkunyangka Godalu tjananya kura palyantjitjanguṟu kalypangku wantipai, palu kurunpaya Godala tjungu mulapa nyinanytja wiya ngaṟangi.
10 Panya aṟa ngaṉmanytjitjangku kutjupa kutjupa tjuṯa wangkapai, panya mai kuka kutjupa kutjupa tjuṯa ngalkuntjaku munu kutjupa kutjupa tjuṯa wantinytjaku, munu kutjupa kutjupa tjuṯa tjikintjaku, kutjupa kutjupa tjuṯa tjikilwiyangku wantinytjaku. Munu piṟuku wangkapai yaaltjingaṟa tjananku puntu tjukaṟurungku paltjintjaku, munu kutjupa kutjupa tjuṯa kuḻu paltjintjaku. Palu aṟa nyangantu uwankarangku puntutja wangkapai kurunitja wiya, panya aṟa nyanga paluṟu tjana unytju paṯaṟa ngaṟangi Godalu aṟa kuwaritja utintjaku.
11-12 Palu panya Christanya tjukurtjara puḻka nyinanyi aṟa panya kuwaritjaku. Panya paluṟu tjarpangu Godaku ngura miḻmiḻṯa nganaṉanya ngalkiṟa wiṟu tjuṯa nganampa palyantjikitja. Palu ngura nyara palunya watingku palyantja wiyaṯu, panya nyaratja ngura mantatja wiya, ilkaṟitja wiṟu mulapa. Ka panya Jesulu milkaḻi nanikutanguṟu puluka kuḻunypanguṟu mantjiṟa katinytja wiyaṯu ngura nyara palulakutu. Palu paluṟunku ilura milkaḻi paluṟunku tjutingu, munu ngura panya miḻmiḻṯa ma-tjarpangu kutju-aṟa alatjiṯu, tjuṯa-aṟa wiya, munu nyara palulanguṟu paluṟu nganaṉanya kuranguṟu wankaṟunu nganaṉa Godala miṟangka kuṉṯa wiya nyinanytjaku tiṯutjara.
13-14 Aṟa panya ngaṉmanyitjangku alatji wangkanyi panya watingku kutjupa kutjupa pampuntjatjanu puṯu tiinta miḻmiḻṯa tjarpapai, palu uti paluṟu wati tjukurtjarangka ngaṉmanypa wirkanama, ka paluṟu nanikutaku milkaḻingka, munu puluka nyiṯayiraku milkaḻingka kuḻu mantjiṟa palunya puntu winki kurpinma, munu tjinguṟu puluka kungka kuḻunypa kampara tjuṉparingkunytjitja tjuṉpa mantjiṟa minangka uṟuṟa palunya kurpinmaṯu. Ka nyara palulanguṟulta wati paluṟu palyaringanyi Godanya waḻkuntjikitja tiinta nyara miḻmiḻṯa tjarpara.
Uwa, panya kukaku milkaḻingku tjuṉpangku kuḻu wati nyara palunya palyaṉi Godanya waḻkuntjaku. Palu milkaḻi nyanga kuka tjuṯanguṟu unytju kutju ngaṟanyi mantatja. Palu Christaku milkaḻi palya mulapa uwankarangka waintarinytja. Panya Kurunpa Miḻmiḻṯu tiṯutjara nyinapailu Jesunya kuṉpunnyangka paluṟu wiṟu mulapa nyinanytjatjanungku puṉu kaṯakutjarangka ilura paluṟunku puntu winki Godanya ungu milkaḻi tjutira. Nyara palulanguṟu paluṟu nganaṉanya unngu tjukaṟuruṉi, kala aṟa panya ngaṉmanyitja tjuṯa palyantja wiyaringu, panya aṟa palunya tjananya waṉaṟa nganaṉa puṯu palyaringangi kuka pungkula rawangku ungkula ungkula. Palu panya Jesulu nganaṉanya mulapa kulintja tjukaṟuruṉu nganaṉa kuṉṯa wiya Godala tjunguringkula rapa nyinanytjaku munu palula wangaṉarangku kuliṟa waṟkarinytjaku, panya paluṟu wanka alatjiṯu nyinanyi witulya puḻkanya.
15 Uwa, Christalu aṟa kutjupa wirkakatingu kuwaritja Godalanguṟu nganampa palumpa walytja tjuṯaku, nganaṉa mulamularingkula Godalu kalkuntjitja mantjintjaku. Panya Godalu nganaṉanya ngurkantaṟa kalkuṉu palula tjungu tiṯutjara nyinanytjaku. Palu nyangatjala mantjini nganampa anga-ilunyangka kutju. Panya aṟa ngaṉmanyitjangkala nyinakatira puṯu kuliningi kura wantinytjikitjangku, palu panya Jesunya nganampa ngalkilpa ilunyangka kutjula kaṟalyarira wankaringu.
16-17 Aṟa nganampa alatji ngaṟanyi, panya nganaṉa nyiringka walkatjuṟa kalkulpai wanka nyinaralpi nyanga alatji ngayulu ilunyangka maḻangka uti ngayuku tjitji tjuṯangku mantjinma ngayulu kanyintja uwankara. Nyanga alatjila kalkulpai. Palu tjitji tjuṯangku ngayulu wanka nyinanyangka puṯu ngayuku uwankara mantjini panya nganaṉa tjungu nyinanyi, palu kalkuntja nyanga paluṟu utiringkuku ngayulu ilunyangka kutju.
18 Ka nyanga palu puṟunypa ngaṟangi aṟa panya ngaṉmanyitjangka, panya Godalu kalkuntja utiringangi kuka pungkunyangka kutju, palu kuka pungkunytja wiyangka wiyaṯu ngaṟangi. Panya kuka pungkula kutju milkaḻi mantjiṟa Godanya ungkupai, ka nyara palulanguṟu kutju Godanya tjanampa kalyparingkupai.
19 Panya Moselu tjukurpa uwankara Godalu ungkunytja tjanala wangkangu aṉangu panya uwankarangka. Munu palulanguṟu iluntanu puluka kuḻunypa, nanikuta kuḻunypa munu mantjiṟa milkaḻi minangka tjunguṉu. Munu palulanguṟu puṉu miṉa tjukutjuku maṉkurpa kaṯantanu nyaḻpitjara munu karpiṟa tjunguṉu nyaḻpi winki puṯuru tjitin-tjitinta. Munu puṉu panya nyaḻpi winki karpintjitja kukaku milkaḻingka tjaḻatjunu munu nyiri Godaku tjukurtjara kurpinu milkaḻingka, munu aṉangu uwankara kuḻu.
20 Munu paluṟu wangkangu, “Nyawaya milkaḻi nyangatja, panya Godalu nyuranya tjukurpa puḻka tjuṯa ungu nyura wangaṉarangku kulintjaku. Ka nyanga kukaku milkaḻingku nyuranya nintini panya tjukurpa nyanganpa kuwaringuṟu ma-ngaṟanyi.” Alatji Moselu tjanala wangkangu mulamulangku kulintjaku.
21-22 Ka panya Moselu kukaku milkaḻi katingu tiinta miḻmiḻpa unngu munu tiinta kurpinu munu unngu panya ngaṟanytja uwankara kuḻu. Panya Godaku tjukurtu alatji wangkanyi, “Milkaḻingka kurpinnyangka kutju kutjupa kutjupa uwankara palya ngaṟapai Godala miṟangka. Ka panya milkaḻi ilura tjutinyangka kutju Godalu aṉangu tjuṯangku kura palyantjitjanguṟu kalypangku pungkuwiyangku wantipai.”
Christanya Milkaḻi Tjutira Ilunyangka Kutju Godalu Nganaṉanya Kalypangku Wantipai
23 Ka panya tiinta nyara palunya munu unngutja tjuṯa kuḻu tjana arkaṟa palyaṉu nyara ngura ilkaṟitjangka ngaṟanytja puṟunypa. Ka wati tjukurtjarangku kukaku milkaḻingka kurpilpai tiinta munu unngu ngaṟanytja uwankara kuḻu Godala miṟangka palya mulapa ngaṟanytjaku. Palu tiinta nyara ilkaṟitja kukaku milkaḻingku puṯu palyaṉi. Wiya, Christaku milkaḻingku kutju ngura nyara palunya palyaṉi nganaṉa tjarpara Godala tjungu nyinanytjaku.
24 Panya Christanya tjarpanytja wiya watingku palyantjitjangka tiinta panya miḻmiḻṯa. Nyaratja arkaṟa palyantja ngura panya ilkaṟingka ngaṟanytja puṟunypa. Palu Christanya ngura ilkaṟitja mulata tjarpangu munu paluṟu Godala anga-wangkanyi nganampa ngalkiltu.
25-26 Palu wati tjukurtjara puḻka kampa panya munkaritjangka miḻmiḻpa panya mulata waintaṟa tjarpapai kukaku milkaḻitjara kuḻi kutjupa kuḻi kutjupa. Palu Jesulu yaaltjiṯu aṟangku paluṟunku ungu? Paluṟu wanyu rawa ilaṯu-ilaṯu ilukatingi kuwaripatjaranguṟu alatjiṯu panya Godalu manta palyantjalanguṟu? Wiya, ngula mulapa tjiṉṯu waṯalpi ilaringkunyangka paluṟu pitjangu munu paluṟunku ungu iluntankunytjaku kutju-aṟa alatjiṯu Godanya nganampa kalyparingkunytjaku.
27-28 Aṉangu uwankara kutju-aṟa ilunytjaku ngaṟanyi. Ka ilunyangka maḻangka Godalu nganaṉanya ngurkantankuku. Ka panya palu puṟunypa nganaṉa kura palyantjitjanguṟu Christanya kutju-aṟa ilungu nganampa ngalkilpa. Uwa, paluṟu walytja intjanuringu iluntankunytjaku Godalu nganaṉanya kalypangku pungkuwiyangku wantinytjaku. Munu paluṟu ngula maḻaku pitjala piṟuku kuranguṟu ilunytja wiya aṉangu panya palumpa paṯaṟa nyinanytja tjuṯa wankaṟu katiku.