9
1 Ilkari ngurrara kutjupangku turampata puyura mirratjingaṉu. Ngayulu nyangu piṉṯirri ilkaringuru mantakutu patangaranytjala. Patangarala yaṉangu nguwanparringkula ngarangi. Kutjupangku palulakutu ngalya yankula kii yungu, ngaṯi tiṉanya alytjuranytjaku. Ngaṯi paluru yunngulingku ngarangi.
2 Kii mantjira paluru yankula ngaṯi palunya alytjurankula nyangu. Alytjuranytjala ngaṯinguru puyu tiṉalingku pakara ngarangu. Puyu paluru tjiṉṯu tjutuṉu, tjiṉṯu wiya irrnyaṉangi.
3 Puyu palulanguru pakara tjiṉṯilyka nguwanpaya mantawana nyinarra waṉingi. Tjiṉṯilyka nguwanpa palunya tjananya kutjupangku ngangkari yungu, yankulaya yaṉangu tjuṯa wakara puntura pikantankunytjaku, wanatjiṯingku wiima nguwanpa wakara mikinmankupayi.
4 Mayutju kutjupangku tjananya tjiṉṯilyka nguwanpa tjuṯa marrkuṉu, “Yukiri tjuṯa, watiya tjuṯaṯarra kuyalwiyangkuya wanti!, yaṉangu tjuṯa kutju wakaraya pikantanama! Katutjalu ngalyangka maakatjunkula wantingutja tjuṯa wiya tjananyanyurra wakara pikantankunytjaku. Kutjupa tjuṯa kutju tjananya wakara pikantarra!, maakatjunkuwiya tjuṯa kutju.”
5 Mayutju paluru tjananya tjiṉṯilyka nguwanpa tjuṯa marrkura watjaṉu, yaṉangu maakatjunkunytjawiya tjuṯa tjananya wakara pikantankunytjaku pira payipalangka. Marrkuṉu tjananya wiya tjananya wakara mirrintankunytjaku.
6 Paluru tjana wakara pikantankunytjala mikintjarraya nyinarra kulinmalpa mirrirrikitjangku. Tjana puṯuya kulilku mirrirrikitjangku, kana kutuya nyinamalpa.
7 Yirriṯi yaṉangu tjuṯa naanytja tjikipakangka yankupayi pikangku pungkukitja. Tjiṉṯilyka paluru tjana naanytja tjikipaka nguwanpa ngarala waṉingi. Paluru tjana kata mukaṯitjarra nyinarra waṉipayi kuultatjanu palyaṉutjatjarra. Wati yuṉpa nguwanpaya nyinarra waṉingi,
8 kata mangka waṯawara kungka nguwanpa. Kaṯiṯi tiṉatjarraya nyinarra waṉingi, kaṯiṯi layina nguwanpa.
9 Ngarrkawana mantarra yayinatjarraya nyinarra waṉingi, wakaltjipingkamarra. Nyaḻpi pirrtjipirrtjirra waṉingi nyinarra. Punturaya pirrtjipirrtjirra taatjingara waṉipayi, layitningingku rungkara waṉinytja nguwanpa.
10 Wanatjiṯi nguwanpaya ngarangi kunangku tjananyaya wakara mikinmankupayi. Pira payipala tjananyaya yaṉangu tjuṯa kunangkuya wakara mikinmankupayi.
11 Mayutju tiṉa, ilkari ngurrara tjanampa tjiṉṯilyka tjuṯaku nyinangi. Paluru ngaṯi palumpa mayutju nyinangi. Yipuru wangkatjarrangku yini palunya tjana yalatji watjalpayi, “Yapatananya”. Kiriki wangkatjarrangku yini palunya, “Yapuliyananya” watjalpayi.
12 Ngayulu Tjaanalu tjananya nyangu yalatji mikintjarraya nyinanyingka. Palunyatjanu paluru tjana yaṉangu tjuṯa kutjarrangara piyuku kuyalku.
13 Palulanguru ilkari ngurrara kutjupangku puyura turampata mirratjingaṉu. Ngayulu Tjaanalu kuliṉu tiipula palulanguru, kuultatjanu palyaṉutjalanguru wangkanytjala. Tiipula paluru Katutjala yila ngarangi.
14-15 Karru yini Yupurititjalaya ilkari ngurrara puupala tayimapira wantingutja rawa ngarapayi. Tjana paṯalpayi walatjunkula wantirriyantjala yankula yaṉangu tjuṯa mirri pungkunytjaku. Yalatji tiipulanguru ilkari ngurrara palula wangkangu, “Walatjurra tjananya ilkari ngurrara puupala!, karru tiṉangka yini Yupurititjala, irriṯi tayimapira nyinatjunutja puupala. Walatjunkula tjananya wantirriyala!”
16 Tjuulytji tjuṯalingku naanytjatjarraya ngarala waṉingi. Kutjupangkuṉi nampa watjaṉu yalatji, “Tuu yantaṯa milyan tjana ngarala waṉinyi.”
17 Naanytjatjarra tjuṯa nyinarra waṉingi yayina ngarrkawanatjarra, wakaltjipingkamarra. Tjaampalaya ngaḻkilpayi tjatjakatjarra nyinangi. Tjaampalaya ngalkilpayi marutjarra nyinangi. Tjaampalaya ngalkilpayi yiluwanatjarra nyinangi. Naanytja tjuṯaya kata kutjupaya ngarala waṉingi, kata layina nguwanpa. Waru tili puyuṯarra naanytja tjaanguru pakaṉangi, puyu yiluwanaṯarra.
18 Yaṉangu tjuṯangku puyu palunya paṉṯira mirrirringangi. Kutjupa tjuṯaya kana kutu nyinangi ngurra kutjupa tjuṯawana.
19 Yuwa, naanytjatjanu paṉṯira yaṉangu tjuṯa mirrirringangi. Naanytja paluru tjana wipu piḻkaṯi nguwanpangku yaṉangu kutjupa tjuṯa tjananya patjara mirrintankupayi.
20 Yaṉangu kana tjuṯangku kulilwiyangku kutu kuya palyalpayi, wiyaya Katutjaku tjukarurru nyinapayi. Paluru tjana kutu Katutjanya nguwanpa tjuṯa, mamu tjuṯaṯarra puḻkapungkupayi. Paluru tjana Katutjanya nguwanpa tjuṯa palyalpayi puḻitjanu, watiyatjanu, puḻi kuultatjanu, puḻi tjiilpatjanu, yayinatjanuṯarra. Katutjanya nguwanpa paluru tjana wiya yaṉangu tjuṯa yaṉṯayaṉṯaṉi, wiyaya pinangku kulira wangkapayi, wiya. Yaṉangu paluru tjana palunya tjananya kutu puḻkapungkupayi.
21 Paluru tjana kutu kuya palyalpayi. Tjaampalangkuya yaṉangu tjuṯa mirri pungkupayi. Tjaampalangkuya kutjupa tjuṯa yinkarra kuyalpayi. Tjaampalangkuya mulyaṯangku mantjilpayi. Tjaampalangkuya miiṯa kutjupa kutjupangka ngarripayi.