20
Paluru waṉampi palunya witira tayimapira tjarrpatjunku
1 Palulanguru ngayulu Tjaanalu nyangu ilkari ngurrara kutjupa, ilkaringuru ngalya tjarukatirra ngaranytjala. Paluru marangku kii kanyiṉingi ngaṯi tiṉaku, tuuwa alytjurankunytjaku. Ngaṯi paluru yunngulingku ngarangi. Tjiina tiṉaṯarra paluru marangku kanyiṉingi.
2-3 Paluru yankula waṉampi palunya witira tjiinatjarrangku tayimapiṉu. Tuuwa alytjurankula waṉampi palunya katirra ngaṯi palula waṉingu. Tuuwa patira laakamilara wantingu ngaṯi palula kutu ngarrinytjaku waan tjawutjun yiiyangka. Waṉampi palunya nganaṉa watjalpayi, “Mamuku mayutju.” Yalatji ilkari ngurrara paluru waṉampi palunya waṉirra laakamilara wantingu, yaṉangu tjuṯa paluru tjingapungkupayingka, Katutjanya nguwanpa tjuṯa tjana puḻkawaṉipayingka. Paluru ngaṯi palula kutu nyinaku. Katutjalu ngula watjalku palunya pakantjaku. Paluru ngaṯinguru pakara rawawiya mantangka parra nyinaku. Mantangka nyinarra Katutjalulpi palunya mirri pungku.
4 Palulanguru ngayulu Tjaanalu mayutju kutjupa tjuṯa nyangu, tjiiyi tjuṯangka nyinanytjala. Kutjupa tjuṯaṯarra ngayulu nyangu aṉangukuṉu kurrunpa tjuṯa. Palunya tjananya irriṯi mantangka Yiitjuku yunytjuwiya tjuṯangku kata kuntara waṉingi, Yiitjuku, Katutjaku wangkaṯarra tjana tjakultjunutjangka. Paluru tjana wiya tjikipaka palunya, watiyatjanu palunya nguwanpa palyaṉutjaṯarra tjana puḻkawaṉipayi, wiya. Paluru tjana Yiitjuku yunytjuwiya tjuṯangka tjanala yalatji watjalpayi, “Nganaṉa wiya tjikipakaku walytja tjuṯa nyinanyi. Nyurrangarri wiya nganaṉanya ngalyangka palumpa nampa wakantjaku. Nganaṉanya marangka wiya nyurrangarri yalatji nampa tjunkunytjaku, wanti nganaṉanya!” Nampatjarrawiya tjana nyinangu. Kurrunpa paluru tjana kanarringkula yaṉangurriku. Paluru tjana mayutju tjuṯa Yiitju Kurayitjalawana nyinaku waan tjawutjuna yiiyangka.
5-6 Katutjalu yaṉangu palunya tjananya yurrunpa mirringuru kanalku, nganaṉanya yaṉangu kutjupa tjuṯaṯarra ngulalpi kanalku. Palumpa tjanampa Katutjanya yunypalingku nyinaku, wiya tjana piyuku mirrirriku waru tiṉangka kamparra, wiya. Paluru tjana tuḻkuku mayutju tjuṯangkulpi Katutjaku, Yiitjuku waarrkaṯarra palyanmalpa. Kutjupa tjuṯaku tjana tjungu mayutju tjuṯa nyinaku waan tjawutjun yiiyangka. Yiiya palunya wiyarrinytjala nganaṉanya yaṉangu kutjupa tjuṯaṯarra Katutjalu mirringuru kanalku.
Mamuku mayutju waṉiku waru tiṉakutu
7 Waan tjawutjun yiiya palunya wiyarringanyingka, mamuku mayutju yini Tjaatinanya ngaṯinguru pakaltjingalku.
8-9 Pakara paluru tjananya yaṉangu kutjupa tjuṯa tjingapungku palumpa waarrkana tjuṯa nyinanytjaku. Yaṉangu paluru tjana manta kutjarrangka nyinaku, kutjupa yini Kaakala, kutjupa yini Maakaakala. Ngurra tjuṯawana Tjaatinaku waarrkana tjuṯalingku nyinaku. Paluru tjananya tjungulku Katutjaku walytja tjuṯa pikangku pungkunytjaku, ngurra Tjarutjalumala. Tawunu palula Katutjaku walytja tjuṯa nyinaku. Katutjalu tjananya palumpa walytja tjuṯa kanyilku, mamuku waarrkana tjuṯa tjananya waru waṉirra kamparra wiyalku.
10 Ilkari ngurrara tjuṯangkuya mamuku mayutju palunya witira waṉiku waru tiṉangka. Waru palula puyu yiluwana pakanmalpa. Mamu paluru, tjikipaka paluru yuru ngurraraṯarra, Katutjaku wangka ngunytji watjalpayi paluruṯarra waru palula kutu kampamalpa mikinpa puntutjarra, wiyaya warunguru pakalku, wiya.
Yaṉangu yuwankarraya kuutawutjungka ngaraku
11-13 Palulanguru ngayulu Tjaanalu nyangu tjiiyi tjulkurangka Katutjanya nyinanyingka. Palunya tayimi manta ilkariṯarra wiyarringu, wiya ngarapayi, wiya. Tjiiyingka yurrunpa ngayulu nyangu yaṉangu tjuṯalingku ngarala waṉinytjala kuutawutjungka nguwanpa. Paluru tjana irriṯi mirrirringu. Palunyatjanu tjana kanarringu. Tjaampalaya mayutju tjuṯa ngarangi, kutjupa tjuṯa waarrkanaya ngarangi, waarrkawiya tjuṯaṯarra ngarangi. Tjaampalaya irriṯi yuru tiṉangka mirrirringu. Mirri ngarrirraya kanarringu. Kutjupa tjuṯaya ngurra waṉma kurrunpa nyinarra wiyarringutja kanarringuya. Tjiiyi tjulkura palula piipa tjuṯa ngarripayi. Ilkari ngurrara kutjupangku yankula piipa tjuṯa ruulamilara yarrara wantingu. Piipa kutjupaṯarra paluru ruulamilara yarrara wantingu. Piipa palula yini tjuṯa ngarringu, kana kutu nyinapayi tjuṯa. Katutjalu piipa palunya tjuṯangka ngurrira nyakula riitarripayi yaṉangu paluru mantangka nyinarra palyantjala. Tjinguru palya nyinapayi, palumpa walytja nyinaku. Tjinguru kuya kutu palyalpayi wiya palumpa walytja nyinaku.
14-15 Katutjalu tjanampa piipangka palumpa walytja tjuṯaku yini ngurrira nyakupayi. Yini tjanampa nyakula tjananya wantirriyalpayi palumpa ngurrakutu kana kutuya nyinanytjaku. Yini kutjupa tjuṯa wiya piipa palula ngarripayi. Palunya tjananya ilkari ngurrara tjuṯangku warungka katirra waṉipayi. Yalatjiya piyuku mirrirriku warungka. Katutjaku walytja panyapa tjuṯa piyuku wiya tjana mirrirriku warungka, kana kutuya nyinamalpa ngurra palula. Wiyaya kurrunpa paluru tjana ngurra waṉma palulakutu piyuku yankula nyinamalpa, wiya. Ngurra waṉma paluru wiyarriku. Yuḻṯa palula ngaṉṯi yaṉangu tjuṯa kana kutu nyinamalpa, wiyarrinytjawiya.