21
Yiitjunyaya waḻkuyinamalpa
1-2 Palulanguru Yiitjunyangarri tawunu Tjarutjalumalakutu yanangi. Yankulaya tawunu Pitjapatjila yilarringkula puḻi Yalipatjalaya nyinangu. Palumpa kutunguḻu kutjarra pulanya wantirriyalkitjangku Yiitjulu watjaṉu, “Tawunu nyarrakutupula yarra! Nyupali yankula nyaku tuungkiyi kutjarra maamararra ruupatjarra ngaranytjala. Ruupa yarrarapula palunya kutjarra ngalya kati ngayulakutu!
3-6 Tjinguru nyupalinya kutjupangku watjalku, ‘Nyaakitjangkupulan yarraṉi?’ Yalatjipula watjala!, ‘Mayutjunya yunytjurringanyi, kanyiranta ngaa kutjarra ngalya wantirriyalku nyuntulakutu.’ ” Palulanguru paluru kutjarra tawunu palulakutu yanu, Yiitjulu pulanya watjaṉutjangka. Yankulapula tuungkiyi palunya kutjarra maamararra ngalya katingu. Katutjaku wangka watjalpayingku yirriṯi nyinarra watjaṉu Kurayitjanya tuungkiyingka kaḻparra yananyingka. Wangka palunya yiltarringu. Watjalpayi paluru watjaṉu yalatji,
“Watjala tjananya tawunu Tjarutjalumanya ngurrara tjuṯangka!,
‘Nyurrangarrimpa mayutju tiṉa kuwarri ngalya yankuku tuungkiyi wiimangka kaḻparra.
Wiya paluru walytjangku waḻkulku, palya paluru tuungkiyi wiimatjarra ngalya yankuku.’ ”
7 Paluru kutjarra tuungkiyi maamararra pulanya katirra Yiitjula ngaratjunu. Kuuta waṯawarapula yarrara tuungkiyi wiimangka yinytjamitjunkula wantingu. Yiitjunyalpi kaḻpangu tuungkiyi palula.
8 Ruutuwanaya tjungu yanangi Yiitjunya, palumpa kutunguḻu tjuṯa, yaṉangu kutjupa tjuṯaṯarra. Kuuta waṯawarayanku yarrara ruutungka yinytjamitjunangi tuungkiyingku tjinangku kanturinkunytjaku. Kutjupa tjuṯangkuya parrka kilytjuntankula tjunangi parrkalpi tuungkiyilu kanturinkunytjaku. Paluru tjana kuliṉangi, “Nganaṉa mayutju tiṉa tjuṯaku kuuta tjuṯa parrka tjuṯaṯarra ruutungka tjunkupayi. Palunya nguwanpa nganaṉa wati ngaaku kuuta tjuṯa parrka tjuṯaṯarra tjunkunytjaku, paluru ilta mayutju tiṉalampa nyinanyi.”
9 Yaṉangu tjuṯa Yiitjulawana yurrunpa yanangi, tjana palunya waḻkuṉangi. Yiitjula ngaṉṯiwanangkuṯarra kutjupa tjuṯangku palunya waḻkuṉingi, “Mayutju tiṉa ngaatjanyalaka waḻkula!, Tapitaku walytja ngaṉṯitja. Ngaatjanya Katutjakuṉu ngangkari tiṉatjarra. Nganaṉa palunya waḻkuntjaku. Kurayitjalulanya walytja tjuṯa kanyilku, palunya nganaṉa waḻkuntjaku! Katutjanyaṯarralaka waḻkunma!”
10 Yiitjunya tuungkiyingka kaḻparra nyinayinanyingka yaṉangu tjuṯaya tjungu yankula Tjarutjalumala tjarrpangu. Yaṉangu tjuṯangku mirrarra wanaṉingi. Kulira Tjarutjalumanya ngurrara tjuṯangku wangkarra waṉingi, “Ngananyampa tuungkiyitjarra ngururrwana yananyi?”
11 Yiitjulawana yankupayi tjuṯangku tjananya watjaṉu, “Palatja Yiitjunya, Katutjaku wangka watjalpayi, manta Kaliliyinya ngurrara, tawunu Natjaritjanya ngurrara.”
Yiitjunya tjaatji tiṉakutu yanku
12 Palulanguru Yiitjunya tjarukatirra tuungkiyi wantirra tjaatji tiṉangka yankula tjarrpangu. Tjarrparra tjananya Yiitjulu nyangu yaṉangu tjuṯangkuya tjuḻpu tjuṯa tjawirrilyi tjalamilaṉingka. Kutjupa tjuṯangkuya tjawirrilyi payimilara tuḻkuku mayutjuku yungkupayi. Yiitjulu tjananya payira wantirriyaṉu. Tiipula tjuṯa tjanampa mani ngurrara tjuṯaku, mantjira waṉingu, tjuḻpu ngurrarakuṯarra. Payira tjananya wantirriyaṉu yaatjayiṯi.
13 Paluru tjananya payiṉu yalatji, “Wiyanyurra ngaangka kuka tjuṯa tjalamilantjaku, mani tiṉa mantjilkitjangku. Ngaatja Katutjaku ngurra. Katutjaku wangka ngaranyi yalatji, ‘Ngayuku tjaatji tiṉangka nyurrangarri tjarrparra ngayunya waḻkuntjaku, yaṉangu tjuṯangku.’ ”
14 Palulanguru tjaatji tiṉangka nyinarra Yiitjulu kuru paanga tjuṯa, nyumpu tjuṯaṯarra paluru palyaṉingi.
15 Paluru tjananya palyaṉingka pipirri tjuṯangku puḻkawaṉingi yalatji, “Mayutju tiṉa ngaatjanyalaka puḻkawaṉi, Tapitaku walytja ngaṉṯitja!” Tuḻkuku mayutju tjuṯangkuya Muutjaku wangka nintilpayi tjuṯangkuṯarra pipirri tjuṯaku wangka kulira tjana Yiitjuku ngurrkurringu paluru yaṉangu tjuṯa palyantjala.
16 Ngurrkurringkula tjana tjapiṉu, “Nyuntu pipirri tjuṯa tjananya kuliṉi?” Yiitjulu tjananya watjaṉu, “Yuwa. Kuliṉiṉa tjananya. Tjana palya wangkanyi. Nyurrangarri Katutjaku wangka yirriṯi tjunutja kulinmara. Yalatji ngaranyi,
‘Pipirri wiima tjuṯangku, tiṉa tjuṯangkuṯarra tjukarurru palunya puḻkawaṉiku.’ ”
17 Yalatji wangkarra tjanala Yiitjulu tjananya wantikatirra yanu tawunu Piitjaniyilakutu. Yankula paluru ngurra palula ngarringu.
Yiitjulu watiya awalyurrungka watjalku
18 Yiitjunya, palumpa kutunguḻu tjuṯa ngarrirraya aaḻi pakaṉu. Tjana ruutuwanalpi yanangi, Tjarutjalumalakutu. Yiitjunya paḻtjatjirratja yanangi.
19 Ruutungka tjayiṯi paluru nyangu watiya awalyurru yukiritjarra. Yankula mangarriku puṯu nyangu, yukiri kuwarripa ngaranytjala. Puṯu nyakula watiyangka yalatji watjaṉu yaṉangu nguwanpakutu, “Nyuntula mangarri wiya piyuku ngaraku.” Yalatji watjantjala watiya palunya piḻṯirringulpi.
20 Watiya paluru parrpaṯu piḻṯirringutjangka palumpa kutunguḻu tjuṯangku punturaya nyangangi. Nyakula tjana wangkarra waṉingu, “Yaalytjiyaalytji ngaatja parrpaṯu piḻṯirringu?”
21 Yiitjulu tjananya watjaṉu, “Wangka ngaatjanyaya kulila! Katutjanya tjapilkitjangkunyurra yalatji kulintjaku, ‘Ngayulu tjapintjala Katutjalu yilta ngayuku palyalku.’ Yalatjinyurra kulira watiya kutjupangka watjantjala Katutjalu yilta watiya palunya piḻṯilku, ngayuku paluru ngaatjanya piḻṯintja nguwanpa. Puḻi nyarrangka yaṉangu nguwanpa nyuntu tjinguru yalatji watjaṉingka, ‘Pakara yankula yuru tiṉangka tjarrpa!’ Palulanguru yilta puḻi nyarratja pakara yankula yuru tiṉangka tjarrpaku.
22 Palunya nguwanpa Katutjangkanyurra tjapintjaku, tjukarurrungku. Tjapilkitjangkuya yalatji kulila!, ‘Ngayulu tjapintjala, Katutjalu yilta ngayuku palyalku.’ Tjinguru nyuntu tjapilku Katutjalu yaṉangu kutjupa yaṉṯayaṉṯantjaku. Kala, palurunta kulira yilta yaṉṯayaṉṯalku yalatji nyuntu tjapintjala. Tjinguru nyuntu tjapilku palumpa wangkaku nintirrikitjangku. Kala, paluru kuliranta nintilku. Yalatji Katutjalu kulira palyaṉi, nganaṉa palunya tjukarurrungku kulira tjapintjala.”
“Mayutju nganalunta watjaṉu yaṉangu tjuṯa nintintjaku?”
23 Tjarutjalumala tjana tjarrparra Yiitjunya palumpa kutunguḻu tjuṯaṯarra tjaatji tiṉa palulakutuya yanu. Tjaatji palula Yiitjulu tjananya nintintjala tuḻkuku mayutju tiṉa tjuṯangku, tjiḻpi tjuṯangkuṯarra yankula Yiitjunya tjapiṉu, “Watjalalanyatju! Mayutju nganalunta watjaṉu, yaṉangu tjuṯa tjananya nyuntu nintira palyantjaku?”
24 Yiitjulu tjananya watjaṉu, “Wanyuwarri, ngayulu nyurrangarrinya tjapilku. Ngayuluṉa nyurrangarrinya tjapintjala, tjukarurruya watjala! Tjukarurrunyurra ngayunya watjantjala ngayululpi nyurranya ngaparrtjingku tjukarurru watjalku, mayutjungkuṉi watjara wantirriyaṉutjangka.”
25 Yiitjulu tjananya alatji tjapiṉu, “Tjaanalu tjananya yaṉangu tjuṯa kapingka tjarrpatjunkula papatatjimilalpayi. Mayutju nganalu Tjaananya watjaṉu, yaṉangu tjuṯa tjarrpatjunkula papatatjimilantjaku?, tjinguru Katutjalu?, tjinguru mayutju yaṉangungku, nganalu? Watjalaṉiya ngayunya!” Kulira tjana wangkarra waṉingi yalatji, “Tjinguru mayutju Katutjanya nganaṉa watjantjala, Yiitjulu nganaṉanya tjapilku, ‘Nyaaku nyurrangarri Tjaananya kulira wantipayi?’ Yalatji tjapilpayingkamarra nganaṉa wiya mayutju Katutjanya watjalku.
26 Tjinguru nganaṉa mayutju yaṉangu watjantjala, yaṉangu tjuṯangku kulira nganampa tjana pikarringkula pungkupayingka. Tjana kuliṉi Katutjalu Tjaananya wantirriyaṉutja. Palulamarra nganaṉa wiya yaṉangu mayutju watjalku, Yiitjunya.”
27 Tuḻkuku mayutju paluru tjana watjalkitjangku puṯu kulira Yiitjula ngurrpa wangkangu. Palulanguru Yiitjulu tjananya watjaṉu, “Nyurrangarri ngayunya tjukarurru watjanmara mayutju nganalu Tjaananya watjaṉu, yaṉangu tjuṯa papatatjimilantjaku. Kala nyurrangarri ngayunya ngurrpa watjaṉutjangka, ngayulu nyurrangarrila wiya watjaṉi, mayutjungkuṉi ngayunya wantirriyaṉutja.”
Tjiḻpingku katja kutjarra watjalku waarrkarrinytjaku kaanangka
28 Yara kutjupa Yiitjulu tjananya watjaṉu nintilkitjangku, “Tjiḻpi nyinaku katja kutjarratjarra. Katja yurruntitjanya watjalku, ‘Katja, yankula waarrkarri kaanangka!, kiripitji mantjira tjunkuwanantjaku.’
29 Katja yurruntitjangku palunya watjalku, ‘Wiyaṉa ngayulu yankuku, nyinanyiṉa.’ Katja paluru rawawiya nyinarra walytjangku kulira yankula waarrkarriku, kaanangka.
30 Paapara ngurrpa nyinangi paluru waarrkaku kulira yanutjangka. Tjiḻpi paluru yankula katja ngaṉṯinya watjalku, ‘Katja, yankula waarrkarri!, kaanangka kiripitji mantjira tjunkuwanantjaku!’ Katja paluru yalatji watjalku, ‘Yuwa, yankulaṉa waarrkarriku.’ Palunyatjanu paluru nyinaku, wiya paluru kulira yankula waarrkarriku.”
31 Yiitjulu tjananya tjapiṉu yalatji, “Kulilaya! Katja nganalu paapaku wangka kulira palyaṉu?” Mayutju tjuṯangku watjaṉu, “Katja yurruntitjangku kutju.”
Yiitjulu tjananya piyuku watjaṉu, “Wangka ngaatjanyaya kulila! Katutjalu yaṉangu tjuṯa ngulytjuṉi palumpa walytja nyinanytjaku. Paluru kamantaku mani mantjilpayi tjuṯa, kungka kuya palyalkitja watiku paṯalpayi tjuṯaṯarra ngulytjulku, tjana palumpa wangka kulintjala. Tjana katja yurruntitja nguwanpa, paapaku wangka kulira palyalpayi. Nyurrangarrinya wantiku, palumpa wangkanyurra kulira wantipayi tjuṯa, katja ngaṉṯitja nguwanpa nyurrangarri nyinanyi.
32 Yirriṯi Tjaanalu tjananya yaṉangu tjuṯa tjarrpatjunkula papatatjimilalpayi. Paluru nyurrangarrinya nintiṉu Katutjaku wangkaku tjukarurru nyinanytjaku. Palumpa wangkanyurra kulira wantingu, kanya kamantaku mani mantjilpayi tjuṯangku Tjaanaku wangka kuliṉu, kungka watiku paṯalpayi tjuṯangkuṯarra. Tjana Tjaanaku wangkaya kulira tjukarurru nyinanytjala nyakulanyurra kutu palumpa wangka wantipayi.”
Kaana kanyilpayi tjuṯa
33 Yiitjulu tjananya yaṉangu tjuṯanya yalatji yara watjara nintiṉingi, “Wati mayutjungku kiripitji tjiiṯa tjuṯa kaanangka tjunkula wanalku. Piinytjilpi parra tjunkula wanalku. Ngururrpa ngaṯi puḻingka tjawara wantiku, ngula kiripitji tjinangku paḻira tjuutja yintintjaku. Katunguru nyakupayitjarralpi palyalku waarrkanangku kaḻparra nyakunytjaku, kiripitji mulyaṯangku mantjira katitjipingkamarra. Kaana waaḻaṯarra palyara mayutju paluru tjananya wati tjuṯa yaḻṯiku, kaana an waaḻaṯarra waarrkarringkulaya yaṉṯayaṉṯantjaku. Ngurra kutjupakutu yankukitjangku piyuku tjananya paluru watjalku kaana kanyilpayi tjuṯangka, ‘Kiripitji yuṉmirringanyingka yantaratjuya aapa mantjira kanyila!, ngayuku waarrkana kutjupa tjuṯangku katirra tjalamilantjaku.’ Ngurra kutjupakutulpi mayutju paluru yanku.
34 “Kiripitji yuṉmirringanyingka mayutju paluru waarrkana tjuṯa wantirriyalku tjanalakutu kiripitji palumpa mantjira katinytjaku.
35 Kaana palula, kaana ngurrara tjuṯangku tjananya waarrkana palunya tjananya pungkuku. Kutjuya pungkula mirrintanku. Tjana kutjarra kutjupa puḻitjarrangku rungkara wantirriyalku, kiripitjiwiya.
36 Waarrkana kutjupa tjuṯa tjananya mayutju paluru piyuku wantirriyalku kaana palulakutu. Palulanguru kaana ngurrara tjuṯangku tjananya pungkula wantirriyalku kiripitjiwiya.
37 Palumpa waarrkana tjuṯaya wiyarringanyingka palumpa katjalpi nyinaku. Mayutju paluru yalatji kulilku, ‘Tjinguru ngayuku katja ngayulu wantirriyalku tjanalakutu kiripitji tjunutja katirra tjalamilantjaku. Tjinguru ngayuku katjakulpi tjana kuṉṯarringkula yungku.’ Yalatji kulira mayutju palurulpi katja palunya kaana kanyilpayi tjuṯakutu wantirriyalku.
38 Kaana ngurrara paluru tjana katja palunya ngalya yananyingka nyakula wangkarra waṉiku, ‘Katja palumpa ngalya yananyi. Tjiḻpi wiyarringanyingka katja nyarrangkulpi kaana yulytjaṯarra kanyilpayingka, nganaṉa palunya mirri puwa!, kaana ngaatja nganaṉalpi kanyintjaku.’
39 Katja paluru kaanangka tjarrpanytjala, witiraya katirra kaanangka yaatjayiṯi mirri pungku.” Yara palunya watjara Yiitjulu tjananya yaṉangu tjuṯa tjapiṉu yalatji,
40 “Kaanaku mayutjungku tjakulpa palumpa katja tjana pungutjangka kulira yankula tjanalakutu yaalytjinku?”
41 Yaṉangu tjuṯangkuya Yiitjunya watjaṉu, “Kaana ngurrara kuyakuya tjuṯa tjananya mirri pungkula waarrkana kutjupa tjuṯalpi tjananya yaḻṯiku, tjukarurrungkulpiya kaana kanyintjaku. Paluru tjana kiripitji kanyira mayutjuku waarrkana tjuṯaku kiripitji tjukarurru yungku.”
Yiitjulu yara palunya tjananya kampa kutjupa yalatji watjaṉu. Kaanaku mayutju nguwanpa Katutjanya mayutju Tjuwu tjuṯaku nyinanyi, kaana kanyilpayi tjuṯa nguwanpaku. Paluru tjanalakutu palumpa wangka watjalpayi tjuṯa wantirriyalpayi. Tjana kulilwiyangku tjananya pungkupayi. Palulanguru paluru tjanalakutu palumpa katja wantirriyaṉu. Paluru tjana katja palunyaṯarraya pungu.
42 Yiitjulu yara palunya watjara ngaatjanyalpi tjananya watjaṉu, mayutju tjuṯangku kulintjaku, “Yara palunya nguwanpa Katutjaku wangka yalatji ngaranyi. Wangka palumpanyurra riitarrirra ninti nyinamara. Katutjaku wangka palunya yalatji ngaranyi,
‘Wati tjuṯangkuya puri palyalkitjangku watiya kutjarra yaṉṯaḻatjarra tjawara ngaratjunku. Watiya waṯawaraya yiipiwana mantjira ngarritjunku katuwana yaṉṯaḻatjarra kutjarrangka. Nyakulaya watiya palunya yiipiwana mantjira waṉiku, kuyakuyakutjura kulira.
Watiya yiipiwana palunya Katutjalu mantjira puri palyalku. Palulanguru nganaṉa nyaku puri palyalingku, watiya yiipiwana palunyatjarra.’ ”
Yiitjulu tjananya yara palunya watjaṉu, mayutju tjuṯangku kulintjaku yalatji, “Ngayulu Yiitjunya nyinanyi paawu puntu watiya yiipiwana palunya nguwanpa. Tjuwu tjuṯangku ngayunya witira katirra mirrintanku, kuyakuyakutjura kulira, watiya yiipiwana palunya kuyaltakunyu kulira waṉingutja nguwanpa.”
43-44 Yiitjulu tjananya piyuku watjaṉu, “Kaana wiyawana kanyilpayi tjuṯa nguwanpanyurra nyinanyi Katutjaku wangkanyurra kulira wantipayi. Palulanguru Katutjalu nyurrangarrinya Yitjurilaku walytja ngaṉṯitja tjuṯa wantirra kutjupa tjuṯa tjananya ngulytjulku, tjanalpi palumpa waarrka tjukarurru palyantjaku.” Yiitjulu tjananya piyuku watjaṉu, “Yaṉangungku ngayuku wangka kulira wantinytjala, ngula Katutjalu kuutawutjungka palunya watjara wantirriyalku warukutu.”
45 Yara palunya kulira tuḻkuku mayutju tiṉa tjuṯangku Paratji tjuṯangkuṯarra kuliṉingi, “Yiitjululanya watjaṉu, nganaṉa kaana ngurrara tjuṯa nguwanpa nyinanyi. Paluru watjaṉu tjinguru nganaṉa pungkupayi nguwanpa nyinanyi. Nganaṉanya payilkitjangku yara palunya watjaṉu.”
46 Yiitjukuraya pikarringkula yalatji kuliṉu, “Kuwarri nganaṉa Yiitjunya witira katinytjaku.” Yalatji kuliraya Yiitjuku pikarringkula puṯuya kuliṉu witilkitjangku, yaṉangu tjuṯangku ngaparrtjingku pikarringkula pungkupayingkamarra. Yaṉangu tjuṯangkuya Yiitjuku wangka kulira yunyparringkula nyinapayi. Kuliṉuya, “Ngaangku Katutjaku wangka watjalpayi tjukarurru.”