20
Yiitjunya kanarringkula pakara yanku
1 Tjuuntiyi tjiṉṯu pakalkitjangka Miirinya, Makatalanya ngurrara kuḻpi palulakutu yanu. Yankula nyangu puḻi palunya ruulamilara wantingutja, alytjuralpi ngarangi.
2 Paluru rayitpayiki tjalkaḻungu tjakultjunkunytjaku Yiitjuku kutunguḻu kutjarrangka Piitala ngayulaṯarra Tjaanala. Paluru tjakultjunu ngalinya yalatji, “Ngalyankulapula nyawa! Nganampa mayutju mirri palunya tjana kuḻpingka mantjira katingu. Katirraya yaalytjingka tjana ngarritjunu?”
3 Ngalitju Tjaanalu Piitalu kulira tjalkaḻungu kuḻpi palulakutu.
4-5 Tjungulitju tjalkaḻungkula ngayulu Tjaananya yurrunarringu kuḻpikutu nyakukitja. Pupakatirraṉa nyangu mirritjanu pantitji tjuṯa kutju ngarringi. Nyakula kutjuṉa wantirra ngarangi.
6 Tjaaman Piitanya ngalya yankula kuḻpingka tjarrpangu. Pantitji tjuṯa mirritjanu ngarrinytjala nyangu.
7 Pantitji kutjupaṯarra nyangu katawana karrpiṉutja ngarringutja. Pantitji paluru katatjanu tjaalpa ngarringi.
8 Ngayulu Tjaanalulpi kuḻpingka tjarrparra nyangu, “Yilta, pantitji kutju ngarrinyi. Yiitjunya yilta kanarringkula pakara yanu.”
9 Palunya tayimi wiyalatju nganaṉa Yiitjuku kutunguḻu tjuṯangku Katutjaku wangka yurrunpa tjunutja nintingku kuliṉingi. Katutjaku wangka panyapa, yalatji ngaranyi, “Kurayitjanya mirringuru kana pakalku.”
10 Kuḻpingka yalatjilitju nyakula rayitpayiki yanu ngurrakutu.
Yiitjunya Miirila yutitjarriku
11 Miiri paluru ngaṉṯi piyuku ngalya yankula ngarala yulangi, kuḻpingka aatjayiṯi. Yularra pupakatingu kuḻpi yunngu nyakukitja.
12 Paluru pulanya nyangu ilkari ngurrara kutjarra, mantarra tjulkuratjarra. Paluru kutjarra kuḻpi yunngu yutitjarringkula nyinangi. Yiitjunya ngarringutjawanapula nyinangu tjinatjayiṯi katatjayiṯiṯarra.
13 Tjapiṉupula, “Minyma. Nyaanguru nyuntu yulanyi?” Watjaṉu pulanya, “Kutjupa tjuṯangku ngayuku mayutju mantjira katingu. Yaalytjingkaya tjana katirra tjunu, palunya?”
14 Panyapa watjara taaṉarringkula nyangu wati kutjupa ngaranytjala. Wiya paluru Yiitjunya kuliṉu.
15 Yiitjulu palunya tjapiṉu, “Minyma. Nganakuranu yularra ngurriṉi?” Ngurra palula waarrkarripayikutjura kulira Miirilu tjapiṉu, “Tjinguru nyuntu Yiitjunya mantjira katingu? Yaalytjingkanu ngarritjunu, nintilaṉi!, ngayululpiṉa yankula nyakunytjaku. Nganaṉatjulpi palunya katirra ngurra kutjupangka ngarritjunku.”
16 Yiitjulu palunya yini wangkangu, “Miiri.” Miirilu taaṉarringkula nyakula yunyparringu, “Ngaatja Yiitjunya yilta ngaranyi.” Miirilu Yaramayiki wangkatjarrangku watjaṉu, “Rapuni.” Yalatji paluru watjaṉu, “Nintilpayi.”
17 Yiitjulu marrkuṉu, “Wiyaṉi mara witintjaku. Paapalakutu ngayulu yananyi. Ngayuku kutunguḻu tjuṯakutu yankula tjananya watjala yalatji!, ‘Ngayulukunyu yananyi ngayuku paapalakutu, paluru nyurrangarrimpaṯarra paapa nyinanyi. Paluru ngayuku mayutju tiṉa nyinanyi, nyurrangarrimpaṯarra mayutju tiṉa nyinanyi.’ ”
18 Miiri paluru kulira yankula tjananya Yiitjuku kutunguḻu tjuṯangka tjakultjunu. “Kulilaya! Ngayulu nyangu nganampa mayutju. Paluru ngayula yutitjarringu.” Piyuku tjananya tjakultjunu palumpaṉu wangka.
Walytja tjuṯangka tjanala yutitjarriku
19 Tjuuntiyi palula mungangka Yiitjuku kutunguḻu tjuṯaya waaḻa unngu nyinangi. Tuuwa wintawu tjuṯaya patira laakamilara nguḻunguḻu nyinangi Tjuwuku mayutju tjuṯangkamarra. Yiitjunya tjanala yutitjarringkula ngarangi. Paluru tjananya watjaṉu, “Palyaya nyinama!, nguḻurrinytjawiya.”
20 Paluru tjananya nintiṉu, mara kutjarra nyiiḻatjanu, kantilypa wakaṉutjaṯarra. Nyakulaya Yiitjuku yunyparringu.
21 Piyuku Yiitjulu tjananya watjaṉu, “Palyaya nyinama!, nguḻurrinytjawiya. Ngayuku paapangkuṉi mantakutu ngalya wantirriyantja nguwanpa, ngayululpiṉa nyurrangarrinya wantirriyaṉi ngayuku waarrka palyarinkunytjaku.”
22 Paluru tjananya puyura watjaṉu, “Katutjaku kurrunpa nyurrangarrila kuwarri tjarrpaku.
23-24 Nyurrangarri ngayuku waarrka palyara yaṉangu tjuṯa tjananya watjalku, kuya tjanampa waṉinytjaku. Yalatji tjanala nyurrangarri watjantjala Katutjalu yilta kuya tjanampa waṉiku. Nyurrangarri tjanala kuya waṉinytjaku watjantjawiyangka Katutjalu kuya tjanampa wiya waṉiku, kuyatjarra kutuya nyinaku.” Yiitjulu tjanala yutitjarringkula wangka panyapa wangkanytjala wati Tamatjanya wiya tjanalawana tjungu nyinangi. Paluruṯarra Yiitjuku kutunguḻu nyinangu, yini kutjupaya palunya watjalpayi, “Tuwinanya”.
Yiitjulu Tamatjala wangkaku
25 Yiitjunya yutitjarringutja nyakula paluru tjana yankula Tamatjalalpi tjakultjunu yalatji, “Nganampa mayutju Yiitjunya nganaṉatju kuwarri nyangu.” Tamatjalu tjananya watjaṉu, “Ngunytjinyurra wangkanyi, wiya paluru kanarringu, wiya. Ngayulu palunya nyakula kutju kanarringutja kulilku. Mara palunya nyiiḻatjanu wakaṉutja kantilypa wakaṉutjaṯarra pampura ngayulu yalatji kulilku, ‘Yilta ngaatja kana ngaranyi.’ ”
26 Palulanguru wiika kutju nyinarra piyuku tjana tjungurringkula waaḻa panyapangka tjarrparra unngu nyinangi, Tamatjanyaṯarra. Tuuwa wintawu tjuṯaya patira laakamilara wantingu. Yiitjunya tjanala yutitjarringkula ngarangi. Ngarala tjananya watjaṉu, “Palyaya nyinama!, nguḻurrinytjawiya.”
27 Paluru Tamatjanya nyakula watjaṉu, “Nyuntu kulinmara tjana watjaṉutjangka, yilta ngayuluṉa ngaatja kanarringu. Marangkuṉi pampula mara kutjarra!, kantilypaṯarraṉi pampula! Pampuraṉi kulila!, ngayulu ngaatja kanarringkula ngaranyi.”
28 Tamatjalu palunya watjaṉu, “Nyuntu yilta ngayuku mayutju ngaranyi, Katutjakuṉu.” Yiitjulu palunya watjaṉu,
29 “Ngayunya yutitja nyakula nyuntu ngayunya Katutjakuṉu kuliṉi. Kutjupa tjuṯangku ngayunya wiya yutitja nyakuku. Tjana ngayunya Katutjakuṉu palya kulilku yutitja nyakunytjawiyangku. Yalatji kulira tjana yilta yunypa nyinaku.”
30 Yiitjulu Katutjakuṉu ngangkaritjarrangku tjuṯangara palyaṉangi, palumpa kutunguḻu tjuṯangkuya nyanganyingka. Paluru yilta yaṉangu tjuṯa ngangkaritjarrangku palyalpayi. Ngayulu Tjaanalu ngaatjanya watjaṉi. Yiitjulu tjuṯangara palyaṉutja wiyaṉa yuwankarra piipa ngaangka wakaṉu, yara aapa kutju ngarrinyi.
31 Yara tjuṯa ngaatjaṉa wakaṉu, nyurrangarri riitarringkula yalatji kulintjaku, “Yiitjunya Katutjaku katja nyinanyi. Katutjalu palunya watjara ngalya wantirriyaṉu mantakutu.” Wangka palunya Yiitjunya Katutjaku katjatjarra nyurrangarri kulira kana kutu nyinaku. Ngayulu yara ngaa tjuṯa piipa ngaangka wakaṉu, nyurrangarri kulira kana kutu nyinanytjaku.