13
Yiitjulu tjina tjananya kapingku kiliinamilalku
1 Tuḻku yini “Patjuwupanya” kuwarripa ngaranyingka, Yiitjulu yalatji yurrunpa kuliṉangi, “Ngulaṉa mirrirriku. Mirrirringkula ngayulu paapakutulpiṉa yankula nyinaku.” Yalatji kulira paluru piyuku kuliṉangi, “Ngayuku kutunguḻu tjuṯa palya nyinanyi. Ngayulu rawa tjanampa yunytju nyinapayi, kutu ngayulu tjanampa yunytju nyinaku rawa. Yalatji nyinarraṉa mirrirriku.”
2 Yiitjulu, palumpa kutunguḻu tuwalpalangkuṯarra tjungungku tjana mangarri ngalkuṉangi. Tjuutatjanyaṯarra tjungu nyinangu. Paluru Tjaaman Yitjikarriyataku katja nyinangu. Yurrunpa mamuku mayutjungku palunya tjingapungu paluru yankula tjananya tjakultjunkunytjaku. Yalatji paluru tjananya mayutju tjuṯangka tjakultjunu Yiitjunyaya witira tjana mirrintankunytjaku. Yalatji Tjuutatjalu kuya palyaṉu.
3 Yiitjunya ninti nyinangu, yalatjiku, “Ngayuku paapangku ngayunya watjara wantirriyaṉu, mantakutu. Ngayulu ngaangka nyinarra piyukuṉa yanku ngayuku paapalakutu, ngurra ilkarikutu. Paluruṉi ngaangka nyinatjunu mantangka mayutju tiṉa palumpaṉu ngangkaritjarrangku palyarinkunytjaku.” Wangka yalatji Yiitjulu nintingku kuliṉingi.
4 Yiitjulu mangarri ngalkura pakaranku kuuta yarralytjara tjunu. Mantarra tawulalpi mantjira palurunku walytjangku tjunu tjina tjananya paltjira turayinkukitjangku, palumpa kutunguḻu tjuṯa.
5-6 Kapi mantjira tjutiṉu tiitji tiṉangka tjina tjananya paltjilkitjangku. Maṉkurrpa kutju tjananya tjina paltjira tawula palula turayinangi. Tjaaman Piitalalpi Yiitjunya pupakatingu, paltjilkitja. Paluru watjaṉu, “Mayutju, tjina wiyaṉi paltjintjaku.”
7 Yiitjulu palunya watjaṉu, “Ngayuluṉanta paltjintjala kuwarri nyuntu puṯu kuliṉi, ngulanu nintirriku.”
8 Piitalu piyuku watjaṉu, “Ngayunyaṉi wanti paltjilwiyangku!” Yiitjululpi palunya piyuku watjaṉu, “Ngayuluṉanta paltjintjawiyangka walytja wiyatjunu ngayuku nyinaku, wiyalingku.”
9 Piitalu watjaṉu, “Mayutju, ngayunyaṉi tjina kutju paltjintjawiya, mara, kataṯarratju paltjila!”
10 Yiitjulu palunya watjaṉu, “Yurrunpa nyuntu walytjangku paltjiṉutjangka ngayuluṉanta wiya mara kataṯarra paltjilku, tjina kutjarra kutju.” Yiitjulu tjananya piyuku watjaṉu, “Kala, nyurrangarri walytjangku paltjiṉutja tjuṯa kiliinalpi nyinanyi. Kala, ngayulu nyurrangarrimpa kuya waṉingu kuyatjarra wiyanyurra nyinanyi. Kutju ngaangka nyinanyi paluru kutu kuyatjarra nyinaku.”
11 Yiitjunyara ninti nyinangu wati panyapa kuya palyalpayiku. Paluru yurrunpa tjananya mayutju tjuṯangka tjakultjunu Yiitjunyaya witintjaku. Yiitjulu yalatji kulira wangka panyapa tjananya watjaṉu, “Kutjukunyu nyinanyi, kuya palyalpayi nganaṉalawana.”
12 Tjina yuwankarra tjananya paltjira turayinkula kuuta walytjangka tjarrparra tjanala nyinakatingu. Nyinarra paluru tjananya yalatji tjapiṉu, “Nyaa nguwanpanyurra kuliṉi?, ngayulu nyurrangarrinya tjina paltjiṉutjangka. Tjinguru nyurrangarri kuliṉi, nyaa?
13 Ngayunya nyurrangarri waḻkulpayi yalatji, ‘Mayutju tiṉakunyu nyinanyi paluru.’ Yalatjiṯarra nyurrangarri ngayunya waḻkulpayi, nintilpayinyaṯarra. Yalatji tjukarurrunyurra waḻkulpayi, ngayulu yilta nyurrangarrimpa nintilpayi nyinanyi, mayutjuṯarra.
14 Ngayulu mayutjungku nyurrangarrinya tjina paltjiṉingi, waarrkana nguwanpangku. Nyurrangarri waarrkana nguwanpa waarrkarringkula nyinanytjaku ngaa tjuṯaku.
15 Ngayulu nyurrangarrimpa waarrkana nguwanpa waarrkarrinytjala nyakula yalatjinyurra waarrkana nguwanpa kiina waarrkarrinytjaku ngaa tjuṯaku. Yalatji waarrkarringkula wiya mayutju tiṉa nyinakitjangku kulintjaku.
16 Wangka ngaatjanyaya kulila! Ngayulu mayutju nyurrangarrimpa tjukarurru waarrkarringu waarrkana nguwanpa. Yalatji nyurrangarri kutjupa tjuṯawana tjukarurru waarrkarrinytjaku waarrkana nguwanpa. Ngayulu nintilpayingku waarrkarringkula nyurrangarrinya tjina paltjintja nguwanpa, nyurrangarri kutjupa tjuṯaku waarrkarrinytjaku. Wiyanyurra yalatji kulintjaku, ‘Ngayulu mayutju nintilpayi nyinanyi ngayulu wiya kutjupaku waarrkarriku.’
17 Nyurrangarri yalatji kutjupa tjuṯaku kulira waarrkarrinytjaku. Yalatji tjanampa nyurrangarri waarrkarrinytjala Katutjanya nyurrangarrimpa yunypa nyinaku.
18 “Yurrunpa, ngayulu nyurrangarrinya yaḻṯingu ngayulawana nintirringkula ngayuku waarrka palyantjaku. Yurrunpa ngayulu nintingku kuliṉu, ‘Yuwa ngaa tjuṯangku ngayuku waarrka palyanmalpa, kutjungku ngayuku waarrka palyara wantiku.’ Katutjaku wangka yurrunpa tjunutja yalatji ngarrinyi, ‘Wati kutju ngayulawana yunytjuwiya nyinarra tjungungku ngalkuku. Paluru tjananya nintilku ngayunya witintjaku.’ Wangka palunya kuwarri yiltarriku.
19 Wangka panyapa ngayulu nyurrangarrinya yurrunpa watjaṉi. Yalatji tjana ngayunya witintjala nyurrangarri yalatjilpi kulilku, ‘Yiitjulu nganaṉanya yurrunpa watjaṉu, “Ngayunyakunyu tjana witilku.” Palulanguru palumpa wangka iltarringu. Paluru Katutjakuṉungku yurrunpa wangka palunya watjaṉutjangka.’
20 Ngayulu nyurrangarrinya wantirriyalku ngayukuṉu wangka tjakultjurinkunytjaku. Wangka ngaatjanyaya kulila! Tjinguru yaṉangu yunyparriku ngayuku wangka tjakultjunkupayiku. Yalatjira yunyparringkula ngayukuṯarra paluru yunyparriku. Tjinguru yaṉangu ngayuku yunyparringkula Katutjakuṯarra paluru yunyparriku. Walytjalpilimpatju paluru nyinaku.”
Yiitjulu tjananya nintilku kutju palumpa yunytjuwiya nyinanyingka
21 Wangka panyapa wangkarra Yiitjunya watjilarringu. Paluru tjananya piyuku watjaṉu yalatji, “Wangka ngaatjanyaya kulila! Wati kutju ngaangka nyinanyi. Paluru yankula mayutju tjuṯangka tjanala tjakultjunku, tjana ngayunya witintjaku.”
22 Nyinarraya puṯu kuliṉingi, kurungkuyanku nyakula pungu, “Ngananya paluru watjaṉi?”
23 Ngayulu Tjaananya Yiitjula maḻpa yila nyinangu.
24 Tjaaman Piitalu ngayunya marangku nintiṉu Yiitjunya tjapintjaku yalatji, “Ngananya nyuntu watjaṉi?”
25 Ngayulu Yiitjulakutu ilarringkula tjapiṉu, “Mayutju, nganalu tjananya nintilku nyuntunyantaya witintjaku?”
26 Yiitjuluṉi watjaṉu, “Mangarri ngaatja ngayulu karakuwatjangka tjarrpatjunkula wati palunya yunganyi.” Yilta paluru mangarri karakuwatjangka tjarrpatjunkula Tjuutatjanya yungu, Tjaaman Yitjikarriyataku katja.
27 Tjuutatjalu mangarri panyapa mantjintjala kala, mamuku mayutjungku palunya nintiṉu palumpa wangkawana palyantjaku. Yiitjulu Tjuutatjanya yalatji watjaṉu, “Panyapa nyuntu palyalkitjangku kulira yankula parrpaṯu palyala!”
28 Yiitjulu parrpaṯu palyantjaku watjaṉutjangka paluru tjana puṯu kuliṉu.
29 Tjuutatjalu mani tjanampa kanyintjala, tjaampalangkuya yalatjikutjura kuliṉu, “Yiitjulu Tjuutatjanya wantirriyaṉu mangarrilampa payimilantjaku, tuḻku Patjuwupangka tjungungku ngalkunytjaku.” Kutjupa tjuṯangkuya kuliṉu yalatjikutjura, “Paluru Tjuutatjanya wantirriyaṉu, mani katirra yungkunytjaku maralpa tjuṯaku.”
30 Mangarri panyapa Yiitjulu yungutja mantjira Tjuutatjanya pakara mungangka yarrka yanu mayutju kuya tjuṯangka piyuku tjakultjunkunytjaku.
31 Paluru yanutjangka ngaṉṯi Yiitjulu tjananya palumpa kutunguḻu tjuṯa watjaṉu, “Kuwarri ngayulu yaṉanguku katjaṉa tjitjanyingka Katutjaluṉi ngayunya puḻkawaṉiku. Yalatjiṉa tjitjanyingka wangka ngayunyatjarra kulira yaṉangu tjuṯangku Katutjanyalpiya puḻkawaṉiku.
32 Yalatji paluru tjana ngayunya kulira Katutjanya puḻkawaṉinytjala, Katutjalulpi ngayunya kuwarri puḻkawaṉiku.
33 Ngayuku maḻpa tjuṯanyurra nyinanyi, kutu ngayulu nyurrangarrinya kuliṉi. Nyurrangarrilawana ngayulu rawawiya nyinaku. Ngayulu ngurra kutjupakutu kuwarri yananyingka, puṯulpitju nyurrangarri ngayuku ngurrilku. Wangka panyapa ngayulu tjananya mayutju tjuṯangka watjaṉu yalatji, ‘Ngurra kutjupakutuṉa yanku. Nyurrangarri ngayuku puṯu ngurrilku.’
34 Wangka kutjupa ngaatjanya nyurrangarri kulintjaku. Yunytjuyanku nyinama! Ngayulu nyurrangarrimpa yunytju nyinapayi nguwanpa, yunytjuyanku nyinama!
35 Nyurrangarri yalatji yunytju nyinanytjala yaṉangu kutjupa tjuṯangku nyakula yalatji kulilku, ‘Yiitjuku walytja tjuṯaya yilta yunytju nyinanyi, Yiitjunya nguwanpa. Paluru, palumpa walytja tjuṯaku yunytju nyinapayi nguwanpa.’ Wangka panyapa yaṉangu tjuṯangku kulilku, nyurrangarri yaṉangu kutjupa tjuṯaku yunytjunyurra nyinanytjala.”
Yiitjulu watjalku, “Piita, ngurrpatjunu watjalku”
36 Tjaaman Piitalu tjapiṉu Yiitjunya, “Mayutju, ngurra yaalytjikutu nyuntu yananyi?” Yiitjulu watjaṉu, “Ngurra palulakutu wiyali kuwarri tjungu yanku. Ngula ngurra palulakutu nyuntu ngaṉṯi yanku.”
37 Piitalu piyuku palunya tjapiṉu, “Mayutju, nyaaku nyuntu ngayunya wantirra yananyi? Ngayulu yunytjurringanyi ngali tjungu ngurra palulakutu kuwarri yankunytjaku. Nyuntunya tjana pungkunytjala ngayulu nyuntulawana yurrunpa ngaraku, tjana ngayunyawarri pungkunytjaku, nyuntulamarra.”
38 Yiitjulu Piitanya watjaṉu, “Wangka palatja nyuntu ngunytji wangkanyi. Yiltaṉanta tjukarurru watjaṉi. Luuki aaḻi mirranyingka yurrunpa nyuntu nguḻurringkula ngurrpanymanku tjirripalangara yalatji watjara, ‘Ngayulu Yiitjuku ngurrpa.’ ”