Es 4. Gabiddel.
Di Philishtah Nemma Di Bundes-Lawt
1 Un so is em Samuel sei vatt zu gans Israel kumma. Nau Israel is naus ganga fa fechta geyyich di Philishtah. Di Israeliddah henn sich ufketzt an Ebenezer un di Philishtah an Aphek.
2 Di Philishtah henn sich anna kshteld fa greek macha mitt Israel un vi si kfochta henn, is Israel gebodda vadda bei di Philishtah. Di Philishtah henn baut fiah dausend doht gmacht uf em greeks-feld.
3 Vo di greeks-gnechta zrikk an iahra camp kumma sinn henn di eldishti funn Israel ksawt, “Favass hott da Hah uns kshlauwa heit bei di Philishtah? Vella gay di Bundes-Lawt fumm Hah hohla an Silo, so es see mitt uns gayt un helft uns geyyich di graft funn unsah feinda.”
4 So sinn di leit an Silo ganga un henn di Bundes-Lawt fumm Awlmechticha Hah es zvishich di cherubim hokt zrikk gebrocht. Em Eli sei zvay boova, da Hophni un da Pinehas, voahra datt bei di Bundes-Lawt fumm Hah.
5 Un vo di Bundes-Lawt fumm Hah in di camp kumma is, hott gans Israel so laut naus gegrisha es da bodda kshiddeld hott.
6 Vo di Philishtah di yacht funn demm gegreish keaht henn, henn si ksawt, “Vass is awl dess gegreish in di Hebrayah camp?” No henn si auskfunna es di Bundes-Lawt fumm Hah in di camp kumma is.
7 Vo si dess auskfunna henn, henn di Philishtah sich kfeicht un henn ksawt, “Gott is in di camp kumma. Dess is shreklich fa uns. Nix vi dess hott selayva blatz gnumma difoah.
8 Miah sinn in druvvel! Veah kann uns frei macha funn di hand funn dee mechticha gettah? Dess sinn di gettah es di Egyptah kshlauwa henn mitt alli sadda veeshti grank-heida in di vildahnis.
9 Faliahret nett moot, diah Philishtah! Seind mennah, adda diah vaddet gnechta funn di Hebrayah vi si gnechta voahra funn eich. So fechtet vi mennah.”
10 So henn di Philishtah kfochta un di Israeliddah voahra ivvah-kumma. Alli mann is zu sei ayknah tent kshprunga. Es voah en grohsi shlawdahrei; Israel hott dreisich dausend greeks-gnechta faloahra.
11 Di Bundes-Lawt funn Gott voah gnumma, un em Eli sei zvay boova da Hophni un da Pinehas voahra doht gmacht.
12 Nau sellah dawk is en mann funn di shtamm fumm Benjamin fumm greeks-feld kshprunga un is an Silo kumma. Eah hott sei glaydah farissa katt un hott shtawb uf sei kobb gedu katt.
13 Vo eah kumma is, voah da Eli am uf seim shtool hokka nayvich em vayk am vatsha, veil sei hatz sich kfeicht hott veyyich di Bundes-Lawt funn Gott. Vo da mann in di shtatt kumma is un hott fazayld vass blatz gnumma katt hott, hott di gans shtatt naus gegrisha.
14 Vo da Eli selli yacht keaht hott, hott eah kfrohkt, “Vass maynd awl dee yacht?” No is da mann kshvind zumm Eli ganga un hott eem's ksawt.
15 Nau da Eli voah acht un neintzich yoah ald, un sei awwa voahra dunkel so es eah nett sayna hott kenna.
16 Da mann hott ksawt zumm Eli, “Ich binn yusht fumm greeks-feld kumma; ich habb mich vekk gebutzt funn datt yusht heit.” Da Eli hott kfrohkt, “Vee is es ganga datt, mei sohn?”
17 Da mann es di zeiya gebrocht hott, hott ksawt, “Israel voah ivvah-kumma bei di Philishtah un hott missa shpringa funn eena. Feel leit voahra doht gmacht; dei zvay boova, da Hophni un da Pinehas, sinn doht, un di Bundes-Lawt funn Gott is gnumma vadda.”
18 Vo eah ksawt hott veyyich di Bundes-Lawt funn Gott, is da Eli hinnahsich ab funn seim shtool kfalla nayvich em doah. Sei hals is fabrocha un eah is kshtauva, fa eah voah en aldah mann un oahrich shveah. Eah is Israel foah-ganga fa fatzich yoah.
19 Sei boo em Pinehas sei fraw voah uf em family vayk un's voah nayksht an di zeit fa's kind geboahra sei. Vo see's vatt grikt hott es di Bundes-Lawt funn Gott gnumma voah, un es iahra shviah-daett un iahra mann doht voahra, hott see ohkfanga iahra kind havva. Avvah see voah ivvah-kumma mitt shmatza.
20 Vi see am shtauva voah, henn di veibsleit es am iahra helfa voahra, ksawt, “Feich dich nett, du hosht en glennah boo.” Avvah see hott kenn andvat gevva un hott's nett acht katt.
21 See hott da boo Ikabod kaysa un hott ksawt, “Di hallichkeit hott Israel falossa.” Dess voah veil di Bundes-Lawt funn Gott gnumma gvest voah un iahra shviah-faddah un iahra mann doht voahra.
22 See hott ksawt, “Di hallichkeit is funn Israel ganga, fa di Bundes-Lawt funn Gott is gnumma vadda.”