Es 19. Gabiddel.
1 No is da Josaphat, da kaynich funn Juda, in fridda zrikk an sei haus in Jerusalem kumma.
2 Da Jehu, em Hanani sei boo, da brofayt, is naus ganga fa een ohdreffa un hott ksawt zumm kaynich, “Setsht du di gottlohsa helfa un selli lohva es da Hah hassa? Fasell kumd da zann fumm Hah uf dich.
3 Doch, 'sis noch samm goodes in diah veil du di Ashera-poshta vekk aus em land gedu hosht, un dei hatz ksetzt hosht fa da Hah sucha.”
Da Josaphat Macht Sich Richtah
4 Da Josaphat hott in Jerusalem gvoond un eah is viddah naus ganga unnich di leit funn Beer-Seba biss an's hivvel-land funn Ephraim. Eah hott di leit viddah zrikk gedrayt zumm Hah, da Gott funn iahra foah-feddah.
5 Eah hott richtah ufkokt im land, in yaydahs funn di fashteikta shtett in Juda.
6 Eah hott ksawt zu di richtah, “Denket drivvah vass diah am du sind, fa diah doond nett richta fa da mensh avvah fa da Hah, deah es bei eich is vann diah richtet.
7 Losset di furcht fumm Hah uf eich sei, un gevvet acht vi diah richtet, fa da Hah unsah Gott hott nix zu du mitt ungerechtichkeit, ayseidich sei, adda kshenkah nemma hinna rumm.”
8 Aw in Jerusalem hott da Josaphat edlichi Lefiddah, preeshtah un evvahshti funn families in Israel eikshteld fa's gericht fumm Hah ausfiahra, un fa richta vann shtreit unnich di leit funn Jerusalem voah.
9 Eah hott eena dess gebott gevva: “Diah sellet dess du in di furcht fumm Hah, un seind shtandhaftich mitt eiyah gans hatz.
10 Vann-evvah es shtreit zvishich breedah zu eich gebrocht vatt funn di leit in di shtett—eb's zu du hott mitt bloot fageesa, mitt em ksetz un gebodda adda veyyich adninga un richtes—diah misset si vanna es si nett sindicha geyyich da Hah, so es sei zann nett uf eich un eiyah breedah kumd. Doond dess un diah doond eich nett fashuldicha.
11 Da Amaria, da evvahsht preeshtah, is ivvah eich in di sacha fumm Hah; da Sebadia, em Ismael sei boo, un da evvahsht funn di shtamm funn Juda, is ivvah eich in di sacha veyyich em kaynich, un di Lefiddah shaffa unnich eich fa sayna es di leit iahra recht greeya. Seind shteik un doond's, da Hah is mitt selli es recht doon.”