Da 96. Psalm.
Gott Is Da Graysht Kaynich
1 Singet en nei leet zumm Hah,
di gans veld, singet zumm Hah!
2 Singet zumm Hah, un lohvet sei nohma;
fakindichet sei saylichkeit dawk noch dawk.
3 Fazaylet veyyich sei hallichkeit unnich di heida,
un veyyich sei vundahboahri verka unnich awl di leit!
4 Da Hah is grohs un is diveaht fa glohbt sei,
un eah muss kfircht sei ovvich awl di gettah.
5 Fa awl di gettah funn di leit sinn abgettah,
avvah da Hah hott di himla gmacht.
6 Hallichkeit un kaynich-eah sinn fannich eem,
graft un glitz sinn in seim tempel.
7 Gevvet zumm Hah, diah leit uf di eaht,
gevvet hallichkeit un graft zumm Hah!
8 Gevvet zumm Hah di hallichkeit es zu sei nohma heaht,
bringet en opfah un kummet in sei tempel-hohf.
9 Lohvet da Hah in seim heilicha glayt,
loss di gans veld ziddahra fannich eem.
10 Sawwet unnich di heida, “Da Hah is kaynich!”
Eah hott di veld fesht ksetzt, un si kann nett gmooft sei;
eah richt di leit recht.
11 Loss di himla froh sei, un di eaht sich froiya,
loss da say roahra, un alles es drinn is.
12 Loss di feldah fraylich sei, un alles es drinn is,
no doon awl di baym im bush singa mitt frayt.
13 Si singa fannich em Hah, fa eah kumd,
eah kumd fa di eaht richta.
Eah zayld di veld richta in gerechtichkeit,
un di leit in sei voahheit.