Da 84. Psalm.
En Falanga Fa Gott Sei Haus
Zumm foah-singah. En Psalm funn di kinnah funn Korah. Noch em Gittith.
1 Vi leeblich is dei voon-blatz,
oh Awlmechtichah Hah.
2 Mei sayl hott en falanga un en oahrichah vinsh
fa im hohf fumm Hah sei haus sei.
Mei hatz un leib froiya sich
im levendicha Gott.
3 Even di shpatz hott en haymet kfunna,
un di shvalma en nesht fa iahra yungi,
en blatz nayksht an deim awldah,
oh Almechtichah Hah, mei Kaynich un mei Gott.
4 Ksaykend sinn selli es in deim haus voona;
si sinn immah am dich lohva.
(Sela)
5 Ksaykend sinn di mensha es iahra graft greeya funn diah,
un es iahra hatz ksetzt henn fa zu diah kumma.
6 Vi si deich's Deich funn Baca gayn,
dann macha si's en blatz funn vassah-shprings,
di freeya reyya henn's gedekt mitt vassah-lechah.
7 Si gayn funn graft zu may graft,
biss alli-ebbah fannich Gott kumd in Zion.
8 Heich mei gebayt ab, oh Hah, Almechtichah Gott,
heich mitt deim oah, oh Gott fumm Jakob.
(Sela)
9 Gukk an unsah shield, oh Gott,
un gukk uf's ksicht funn deim ksalbdah.
10 'Sis bessah fa ay dawk im hohf funn deim haus sei,
es en dausend eiyets shunsht.
Ich vett leevah en deah-heedah sei in mei Gott sei haus,
es vi in di tents funn di gottlohsa voona.
11 Fa Gott da Hah is en sunn un en shield;
da Hah gebt gnawt un hallichkeit.
Eah haybt nix goodes zrikk
funn selli es ufrichtich lawfa.
12 Oh Almechtichah Hah,
ksaykend is da mann es sich falost uf dich.