Da 82. Psalm.
Da Haychsht Richtah
En Psalm fumm Asaph.
1 Gott nemd sei blatz in di grohs fasamling,
un is richtah unnich di gettah.
2 Vi lang zayla diah unrecht richta,
un ufshtay fa di gottlohsa?
(Sela)
3 Shtaynd uf fa di oahma un di kinnah unni eldra,
helfet di shvacha un nunnah-gedreddana fa iahra recht greeya.
4 Machet selli frei es oahm sinn un noht henn,
machet si frei funn di gottlohsa iahra gvald.
5 Dee gettah vissa nix, un fashtayn nix,
si lawfa rumm im dunkla;
awl di foundations funn di eaht sinn kshiddeld.
6 Ich habb ksawt, “Diah sind gettah,
un sind awl kinnah fumm Alli-Haychshta.
7 Avvah diah zaylet shtauva vi mensha,
diah zaylet falla grawt vi ennichah anra roolah.”
8 Shtay uf, oh Gott, un richt di eaht;
awl di kaynich-reicha sinn dei eahbshaft.