Da 78. Psalm.
Gott Un Sei Leit
En lanning fumm Asaph.
1 Heichet, oh mei leit, zu vass ich eich lann,
heichet zu di vadda funn meim maul.
2 Ich mach mei maul uf un sawk gleichnisa;
ich shvetz veyyich fashtekkeldi sacha funn aldi zeida—
3 di sacha es miah keaht un gvist henn,
sell vass unsah feddah uns ksawt henn.
4 Miah fashtekla dess nett funn iahra kinnah,
avvah miah fazayla's zu iahra nohch-kummashaft,
di hohch gepreisti kshefta fumm Hah,
sei macht, un di vundahboahra sacha es eah gedu hott.
5 Eah hott en zeiknis ausgricht im Jakob,
un hott en ksetz gevva in Israel.
Eah hott unsah foah-feddah gebodda es si
sei ksetz zu iahra kinnah lanna.
6 Dess is so es iahra nohch-kummashaft si lanna doon,
even di kinnah es noch nett geboahra sinn,
un es si no iahra kinnah dess sawwa sella.
7 Dess is so es si iahra hofning in Gott doon,
un nett di kshefta funn Gott fagessa,
avvah es si sei gebodda halda sella,
8 un so es si nett sinn vi iahra foah-feddah voahra—
en dikk-kebbichi un shteibahrichi nohch-kummashaft,
en leit es kenn shtandhaftichi hatza katt henn,
un iahra geisht voah aw nett shtandhaftich zu Gott.
9 Di Ephraimiddah voahra grisht fa greek mitt bows,
avvah si sinn zrikk gedrayt vo shtreit kumma is.
10 Si henn Gott sei bund nett kalda,
un henn's nett gedu fa lawfa unnich em ksetz.
11 Si henn fagessa vass eah gedu katt hott,
un sei zaycha es eah eena gvissa katt hott.
12 Eah hott zaycha gedu fannich iahra foah-feddah,
im land Egypta in di feldah funn Zoan.
13 Eah hott da say fadayld un hott si deich gay glost;
eah hott's vassah ufshtay gmacht vi en vand.
14 Eah hott si kfiaht mitt en volk deich da dawk,
un gans deich di nacht mitt helling funn feiyah.
15 Eah hott di felsa kshpalda in di vildahnis,
un hott eena feel vassah gevva es vi aus em deefa.
16 Eah hott vassah aus em felsa kumma gmacht,
un hott's lawfa gmacht vi en revvah.
17 Avvah doch henn si ohkalda sindicha geyyich een,
un henn sich geyyich da Alli-Haychsht kshteld in di vildahnis.
18 Si henn Gott fasucht in iahra hatza,
bei frohwa fa ess-sach es si falangd henn.
19 Si henn geyyich Gott kshvetzt, un henn ksawt,
“Kann Gott en dish rishta in di vildahnis?
20 Eah hott da felsa kshlauwa so es vassah raus kumma is,
un en grohsah shtrayma vassah is raus gloffa.
Avvah kann eah aw broht gevva?
Kann eah macha es sei leit flaysh henn?”
21 Un vo da Hah dess keaht hott, voah eah oahrich bays;
feiyah is ausgebrocha geyyich da Jakob,
un sei zann is ivvah Israel kumma,
22 veil si nett an Gott geglawbt henn,
un iahra hofning nett in sei hilf gedu henn.
23 Avvah doch hott eah en gebott gevva drovva zu di volka,
un eah hott di deahra fumm himmel uf gmacht.
24 Eah hott manna runnah greyyaht uf si fa essa,
un hott eena ess-sach gevva fumm himmel.
25 Si henn's broht funn engel gessa;
eah hott eena awl's ess-sach kshikt es si essa henn kenna.
26 Eah hott da east vind gmacht blohsa fumm himmel,
un deich sei macht hott eah da saut vind kfiaht.
27 Eah hott flaysh uf si reyyahra gmacht vi shtawb,
un fekkel vi da sand am say.
28 Si sinn in di mitt funn iahra camp kfalla,
un gans um iahra tents rumm.
29 Si henn gessa biss si satt voahra;
eah hott eena iahra falanga gevva.
30 Avvah even eb si gans satt voahra,
diveil es noch ess-sach in iahra meilah voah,
31 is da zann funn Gott uf si kumma,
un hott di shteikshta funn eena doht gmacht,
di beshta yungi mennah funn Israel.
32 Avvah mitt awl demm, henn si alsnoch ohkalda sindicha,
un henn nett an sei vundahboahri kshefta geglawbt.
33 So hott eah iahra dawwa gmacht fagay vi en ohften,
un si henn iahra yoahra ausglaybt mitt furcht.
34 Vann eah da doht unnich si gebrocht hott,
henn si Gott ksucht un henn sich zu eem gedrayt.
35 Si henn gmeind es Gott iahra Felsa is,
es da Alli-Haychsht Gott iahra Frei-Shtellah is.
36 Avvah si henn een ohkfiaht mitt iahra meilah;
si henn glowwa zu eem mitt iahra zunga.
37 Iahra hatza voahra nett shtandhaftich zu eem,
si henn sei bund nett ufrichtich kalda.
38 Avvah eah voah bamhatzich zu eena,
un hott iahra sinda fagevva.
Eah hott si nett umgebrocht.
Eah hott sei zann oft zrikk kohva,
un hott sei baysi gedanka nett auskfiaht.
39 Eah hott gmeind es si yusht flaysh voahra,
en vind es fabei blohst un kumd nett viddah zrikk.
40 Vi oft henn si geyyich een kshaft in di vildahnis,
un henn een bedreebt gmacht draus im veeshta land!
41 Ivvah un ivvah henn si Gott ausbroviaht,
un henn da Heilich Gott funn Israel fa'eiyaht.
42 Si henn fagessa veyyich sei graft,
un da dawk es eah si frei gmacht hott funn iahra feinda,
43 vi eah sei zaycha gedu hott in Egypta,
un grohsi vundahra gedu hott in Zoan.
44 Eah hott di revvahra zu bloot gedrayt,
un si henn's vassah nett drinka kenna in di grikka.
45 Eah hott mukka kshikt, so es si oahrich deich gmacht henn,
un fresh es si gmacht henn feel ausleida.
46 Eah hott iahra crops zu di hoi-shrekka gevva,
un di frucht funn iahra eahvet zu di locusts.
47 Eah hott iahra vei-shtekk fadauva mitt shlohsa,
un iahra feiya-baym mitt frosht.
48 Eah hott iahra kee kshlauwa mitt shlohsa
un iahra fee mitt gviddah-shtrawla.
49 Eah hott sei gleedichah zann lohs gedrayt uf si.
Mitt rawses, baysi gedanka un bedreebnis
hott eah baysi engel kshikt es da doht gedrawwa henn.
50 Eah hott sei zann lohs gay glost,
un hott iahra sayla nett kalda fumm doht,
avvah hott iahra layva ivvah-gevva zu en heslichi granket.
51 Eah hott di eahsht-geboahrana funn Egypta nunnah kshlauwa,
di eahsht-frucht funn di mensha in di tents fumm Ham.
52 Avvah eah hott sei aykni leit raus kfiaht vi shohf,
un is eena foah-ganga in di vildahnis.
53 Eah hott si aus di kfoah raus kfiaht, un si henn sich nett kfeicht,
avvah da say hott iahra feinda zu gedekt.
54 So hott eah si zu sei heilich land gebrocht,
zumm hivvel-land es sei rechtsi hand gnumma katt hott.
55 Eah hott's folk in di lendah raus gedrivva fannich eena,
un hott di lendah fadayld zu eena fa en eahbshaft;
eah hott di shtamma funn Israel in iahra haymeda voona glost.
56 Doch henn si Gott fasucht,
un henn geyyich da Alli-Haychsht kshaft;
si henn sei gebodda nett kalda.
57 Avvah si henn zrikk gedrayt un voahra nett shtandhaftich,
grawt vi iahra foah-feddah nett voahra.
Si henn so vennich gedraut sei kenna es en shlechtah bow.
58 Si henn een fa'eiyaht mitt iahra hohchi opfah-bletz,
un henn een jealous gmacht mitt iahra abgettah.
59 Vo Gott si keaht hott, voah eah oahrich bays,
eah hott Israel nimmi ohgnumma.
60 Eah hott sei voon-blatz an Shiloh falossa,
da tent es eah drinn gvoond hott unnich di mensha.
61 Eah hott di Bundes-Lawt funn sei macht glost kfanga vadda,
un hott sei hallichkeit glost in di hend funn di feinda gay.
62 Eah hott sei leit ivvah-gevva zumm shvatt,
un hott sei zann ausnemma glost uf sei eahbshaft.
63 Es feiyah funn greek hott iahra yungi mennah kfressa,
un di yungi mayt henn nimmand katt fa heiyahra.
64 Iahra preeshtah sinn umkumma bei em shvatt,
un iahra vitt-veivah henn nett heila kenna.
65 No is da Hah uf gvekt es vi aynah funn seim shlohf,
vi en shteikah mann eifahrich vatt funn vei.
66 Eah hott sei feinda hinnahsich gedrivva,
un hott si sich ayvichlich shemma gmacht.
67 Eah hott da tent fumm Joseph nunnah gedrayt,
un hott aw da shtamm fumm Ephraim nett raus glaysa.
68 Avvah eah hott da shtamm fumm Juda ohgnumma,
da Berg Zion, es eah leeb hott.
69 Eah hott sei tempel hohch gebaut vi di himla,
vi di eaht es eah kshaffa hott fa'immah.
70 Eah hott sei gnecht da Dawfit raus glaysa,
un hott een funn di shohf-penna gnumma;
71 funn shohf heeda mitt shiblen hott eah een raus gebrocht,
fa sei folk Jakob heeda,
di Kinnah-Israel, sei eahbshaft.
72 So mitt en ufrichtich hatz hott eah si keet,
un hott si kfiaht mitt begawbdi hend.