Da 76. Psalm.
Gott, Da Richtah Funn Di Gans Veld
Zumm foah-singah: Mitt kshtringdi harfa. En Psalm fumm Asaph, en leet.
1 Gott is bekand in Juda,
un in Israel is sei nohma uf kohva.
2 Sei tempel-tent is in Salem,
un sei voon-blatz is in Zion.
3 Datt hott eah di flammichi arrows funn di feinda fabrocha,
un aw iahra shields, shvadda un greeks-ksha.
(Sela)
4 Du bisht hallich,
un mechtichah es berga mitt diahra.
5 Di shtaut-hatzicha greeks-gnechta sinn grawbt vadda;
si sinn in da shlohf funn di dohda kfalla,
un kens funn di greeks-gnechta kann sei hend uf hayva.
6 Funn deim gezank, oh Gott fumm Jakob,
hott da gaul un da vauwa shtill uf em bodda gleyya.
7 Avvah alli-ebbah soll sich feicha veyyich diah.
Veah kann fannich diah shtay vann du bays bisht?
8 Du hosht dei richtes vissa glost fumm himmel,
un di eaht hott sich kfeicht un voah shtill,
9 vo du, oh Gott, ufkshtanna bisht fa richta
fa awl di aylendicha helfa im land.
(Sela)
10 Da zann funn mensha gebt diah yusht may eah,
un mitt em zann vo ivvahrich is glaytsht du dich.
11 Machet fashprechinga zumm Hah eiyah Gott, un haldet si.
Awl selli um een rumm sella kshenkah zu eem bringa,
un sella sich feicha veyyich eem.
12 Eah nemd da moot vekk funn di roolahs,
un di kaynicha funn di eaht feicha sich veyyich eem.