Da 70. Psalm.
En Gebayt Fa Hilf
Zumm foah-singah. En Psalm fumm Dawfit fa en ohdenkes.
1 Dummel dich, oh Gott, un mach mich frei;
kumm kshvind, oh Hah, un helf miah.
2 Loss selli es mich doht macha vella sich shemma,
un mach si fashtatzt sei.
Loss selli es miah evil vinsha
zrikk gedrayt sei un fashohmd sei.
3 Dray selli zrikk es sawwa, “Aha! Aha!”
veil si sich shemma missa.
4 Loss selli es dich sucha sich froiya un froh sei;
loss selli es dei saylichkeit leeva immah sawwa,
“Gott soll hohch glohbt sei.”
5 Avvah ich binn shvach un habb noht;
kumm kshvind zu miah, oh Gott.
Du bisht mei hilf un machsht mich frei,
oh Hah, voaht nett.